മുൻ ഗ്രീക്ക്-ഓസ്ട്രേലിയൻ എംപിയും ഗ്രീക്ക് സമൂഹത്തിന്റെ പ്രമുഖ ശബ്ദവുമായ പനാജിയോട്ടിസ് കത്സാംബാനിസ്(60) അന്തരിച്ചു. മെൽബണിലായിരുന്നു അന്ത്യം. 1996ൽ വിക്ടോറിയൻ പാർലമെന്റിലേക്ക് തിരഞ്ഞെടുക്കപ്പെട്ട അദ്ദേഹം 2002 വരെ എംപിയായി പ്രവർത്തിച്ചു. 2013ൽ രാഷ്ട്രീയത്തിലേക്ക് തിരിച്ചെത്തിയ അദ്ദേഹം പിന്നീട് വെസ്റ്റേൺ ഓസ്ട്രേലിയൻ പാർലമെന്റിൽ സേവനം തുടർന്നു. ആദ്യം ലെജിസ്ലേറ്റീവ് കൗൺസിൽ അംഗമായിരുന്ന കത്സാംബാനിസ് പിന്നീട് Hillarys മണ്ഡലത്തിൽ നിന്ന് തിരഞ്ഞെടുക്കപ്പെട്ടു. 2021 വരെ WA പാർലമെന്റിൽ തുടർന്നു. പൊലീസ്, നീതി, റോഡ് സുരക്ഷ, വ്യാവസായിക ബന്ധങ്ങൾ തുടങ്ങിയ പ്രധാന പ്രതിപക്ഷ ചുമതലകളും അദ്ദേഹം വഹിച്ചിരുന്നു.
ഗ്രീക്ക് സമൂഹത്തിന്റെ ശക്തമായ ശബ്ദം
രാഷ്ട്രീയ പ്രവർത്തനങ്ങൾക്കപ്പുറം ഓസ്ട്രേലിയയിലെ ഗ്രീക്ക് സമൂഹത്തിന്റെ ശക്തമായ പ്രതിനിധിയായിരുന്നു കത്സാംബാനിസ്. വെസ്റ്റേൺ ഓസ്ട്രേലിയയിലെ Hellenic Community of Western Australiaയുടെ വൈസ് പ്രസിഡന്റായും അദ്ദേഹം പ്രവർത്തിച്ചു. ഗ്രീസും ഓസ്ട്രേലിയയും തമ്മിലുള്ള ബന്ധം ശക്തിപ്പെടുത്തുന്നതിലും ക്രിറ്റിലെ യുദ്ധവുമായി ബന്ധപ്പെട്ട ചരിത്രസ്മരണകൾ സംരക്ഷിക്കുന്നതിലും അദ്ദേഹം സജീവമായിരുന്നു. 2017 മുതൽ 2021 വരെ World Hellenic Inter-Parliamentary Association (WHIA)യുടെ പ്രസിഡന്റായും സേവനമനുഷ്ഠിച്ചു. ലോകമെമ്പാടുമുള്ള ഗ്രീക്ക് വംശജരായ രാഷ്ട്രീയ നേതാക്കളുടെ ശൃംഖലയാണ് WHIA.
കുടിയേറ്റ കുടുംബത്തിൽ നിന്ന് പാർലമെന്റിലേക്ക്
കത്സാംബാനിസിന്റെ ജീവിതം ഓസ്ട്രേലിയയിലെ ഗ്രീക്ക് കുടിയേറ്റത്തിന്റെ ചരിത്രവുമായി ചേർന്നുനിന്നിരുന്നു. പിതാവ് അർഗിറിസ് കത്സാംബാനിസ് 1960ൽ ഗ്രീസിൽ നിന്ന് മെൽബണിലെത്തി. കുടിയേറ്റ കുടുംബത്തിൽ വളർന്ന പനാജിയോട്ടിസ് പിന്നീട് പാർലമെന്റിലെത്തിയ ഗ്രീക്ക്-ഓസ്ട്രേലിയൻ തലമുറയുടെ പ്രതിനിധിയായി മാറി. വെസ്റ്റേൺ ഓസ്ട്രേലിയൻ ലിബറൽ പാർട്ടി ഡയറക്ടർ സൈമൺ മോർഗൻ അദ്ദേഹത്തെ പാർട്ടിയുടെ “ഏറ്റവും ശക്തരും മികച്ചവരുമായ പോരാളികളിൽ ഒരാൾ” എന്നാണ് വിശേഷിപ്പിച്ചത്. വെസ്റ്റേൺ ഓസ്ട്രേലിയൻ പ്രതിപക്ഷ നേതാവ് ബേസിൽ സെംപിലാസും അദ്ദേഹത്തിന്റെ പൊതുപ്രവർത്തനത്തെയും ഗ്രീക്ക് സമൂഹത്തിനായുള്ള സംഭാവനകളെയും അനുസ്മരിച്ചു.
ഭാര്യ കരാലി കത്സാംബാനിസ് ഭർത്താവിനെ തന്റെ “ജീവിതത്തിലെ പ്രണയം” എന്നും “ആത്മസുഹൃത്ത്” എന്നും വിശേഷിപ്പിച്ചു. മെൽബണിലെ The Alfred Hospitalലെ ഹൃദയ മാറ്റിവെക്കൽ സംഘത്തിനും അവർ നന്ദി അറിയിച്ചു. അന്ത്യകർമങ്ങളുടെ വിശദാംശങ്ങൾ കുടുംബം വരും ദിവസങ്ങളിൽ പ്രഖ്യാപിക്കും. മെൽബണിലായിരിക്കും സംസ്കാരച്ചടങ്ങുകൾ നടക്കുക. മെൽബണിൽ ജനിച്ച് വളർന്ന കത്സാംബാനിസ്, പെർത്തിനെ തന്റെ രാഷ്ട്രീയ ജീവിതത്തിന്റെ വേദിയാക്കി. എന്നാൽ ഗ്രീക്ക് പൈതൃകം ജീവിതത്തിലുടനീളം ഒപ്പമുണ്ടായിരുന്നു. 60-ാം വയസിൽ വിടപറയുമ്പോൾ രണ്ട് സംസ്ഥാനങ്ങളെയും രണ്ട് തലമുറകളെയും രണ്ട് നാടുകളെയും ബന്ധിപ്പിച്ച ജീവിതമാണ് അദ്ദേഹം പിന്നിലാക്കുന്നത്.