പശ്ചിമേഷ്യൻ യുദ്ധം അഞ്ചാം ദിവസത്തിലേക്ക് കടക്കുമ്പോൾ ഇറാനെതിരെ "ശക്തമായ പ്രഹരം" തുടരുമെന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു പ്രഖ്യാപിച്ചു. ഇനി ചർച്ചകൾക്ക് സമയമില്ലെന്നും ഇറാനിലെ നിലവിലെ ഭരണകൂടത്തിന് എല്ലാം വൈകിപ്പോയെന്നും യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചു. ഇതിനിടെ, സൗദി അറേബ്യയിലെ അമേരിക്കൻ എംബസിക്ക് നേരെ ഇറാന്റെ ഡ്രോൺ, മിസൈൽ ആക്രമണ ഭീഷണിയുണ്ടെന്ന മുന്നറിയിപ്പിനെത്തുടർന്ന് അതീവ ജാഗ്രത പ്രഖ്യാപിച്ചിട്ടുണ്ട്.
ജർമ്മൻ ചാൻസലർ ഫ്രീഡ്രിക്ക് മെഴ്സുമായി വൈറ്റ് ഹൗസിൽ നടത്തിയ കൂടിക്കാഴ്ചയിൽ ഇറാന്റെ സൈനിക ശേഷി പൂർണ്ണമായും തകർത്തതായി ട്രംപ് അവകാശപ്പെട്ടു. ഇറാന്റെ നാവികസേനയും വ്യോമസേനയും റഡാർ സംവിധാനങ്ങളും തകർക്കപ്പെട്ടതായും അദ്ദേഹം കൂട്ടിച്ചേർത്തു. ടെഹ്റാനിലെ ഈ ഭീകര ഭരണകൂടത്തെ അധികാരത്തിൽ നിന്ന് മാറ്റുന്ന കാര്യത്തിൽ ജർമ്മനിയും അമേരിക്കയും ഒരേ നിലപാടിലാണെന്ന് ചാൻസലർ ഫ്രീഡ്രിക്ക് മെഴ്സ് വ്യക്തമാക്കി. ഇറാനിലെ മാറ്റത്തിന് ശേഷം എന്ത് സംഭവിക്കുമെന്നതിനെക്കുറിച്ചും വ്യാപാരം, യുക്രെയ്ൻ വിഷയം എന്നിവയെക്കുറിച്ചും നേതാക്കൾ ചർച്ച ചെയ്തു.
'ഓപ്പറേഷൻ എപ്പിക് ഫ്യൂറി' (Operation Epic Fury) ആരംഭിച്ചതിന് ശേഷം ഇതുവരെ ഇറാനിലെ 1,700-ലധികം ലക്ഷ്യസ്ഥാനങ്ങളിൽ ആക്രമണം നടത്തിയതായി യുഎസ് സെൻട്രൽ കമാൻഡ് അറിയിച്ചു. ഇറാന്റെ യുദ്ധക്കപ്പലുകൾ, അന്തർവാഹിനികൾ, ആന്റി-ഷിപ്പ് മിസൈൽ കേന്ദ്രങ്ങൾ, കമാൻഡ് സെന്ററുകൾ എന്നിവയാണ് പ്രധാനമായും തകർക്കപ്പെട്ടത്. ഇറാന്റെ തിരിച്ചടി ഭയന്ന് മേഖലയിലുടനീളമുള്ള അമേരിക്കൻ താവളങ്ങളിൽ പ്രതിരോധ സംവിധാനങ്ങൾ കൂടുതൽ ശക്തമാക്കിയിട്ടുണ്ട്.