കീവ്: യുക്രെയ്‌നിലെ സ്റ്റാർലിങ്ക് ഇന്റർനെറ്റ് സേവനത്തിന്റെ വേഗത നിയന്ത്രിച്ചതിന് പിന്നിൽ യുഎസ് സർക്കാരാണെന്ന് വ്യക്തമാക്കി ശതകോടീശ്വരൻ ഇലോൺ മസ്‌ക്. സൈനിക ആവശ്യങ്ങൾക്കായി ഉപയോഗിക്കുന്ന സ്റ്റാർലിങ്കിന്റെ പതിപ്പായ സ്റ്റാർഷീൽഡിന്റെ സേവനങ്ങളിൽ നിയന്ത്രണം ഏർപ്പെടുത്തിയതുമായി തനിക്ക് ബന്ധമില്ലെന്നാണ് മസ്കിന്റെ പ്രതികരണം. യുഎസ് സൈന്യവും പ്രസിഡന്റ് ഡോണൾഡ് ട്രംപുമാണ് വേഗതയും ഉപയോഗവും സംബന്ധിച്ച നിയന്ത്രണങ്ങൾ തീരുമാനിക്കുന്നതെന്നും അദ്ദേഹം സമൂഹമാധ്യമമായ എക്സിൽ കുറിച്ചു.
സ്റ്റാർഷീൽഡ് സേവനത്തിന്റെ ലഭ്യതയിൽ ഉണ്ടായ നിയന്ത്രണം യുക്രെയ്ൻ അധികൃതരെ അപ്രതീക്ഷിതമായി ബാധിച്ചതായാണ് റിപ്പോർട്ട്. സംഭവത്തെക്കുറിച്ച് യുക്രെയ്ൻ പ്രസിഡന്റ് വൊളോഡിമിർ സെലൻസ്കിയും ആശങ്ക പ്രകടിപ്പിച്ചു. സ്റ്റാർലിങ്ക് പ്രവർത്തനം തടസ്സപ്പെട്ടാൽ റഷ്യയുടെ ആക്രമണങ്ങളിൽ കൂടുതൽ ജീവനുകൾ നഷ്ടപ്പെടാനിടയുണ്ടെന്ന് അദ്ദേഹം പറഞ്ഞു. സ്റ്റാർലിങ്ക് കണക്റ്റിവിറ്റി മണിക്കൂറിൽ 160 കിലോമീറ്റർ വരെ വേഗതയിൽ പുനഃസ്ഥാപിച്ചുവരികയാണെന്ന് യുക്രെയ്ൻ ഉപപ്രധാനമന്ത്രി മൈഖൈലോ ഫെഡറോവ് അറിയിച്ചു. സ്റ്റാർഷീൽഡിന്റെ വേഗനിയന്ത്രണം പൂർണമായി നീക്കുന്നത് യുക്രെയ്‌ന്റെ പ്രതിരോധത്തിന് നിർണായകമാണെന്നും അദ്ദേഹം കൂട്ടിച്ചേർത്തു. യുക്രെയ്ൻ റഷ്യയുടെ ഊർജകേന്ദ്രങ്ങൾ ലക്ഷ്യമിട്ട് നടത്തുന്ന ആക്രമണങ്ങളെ ട്രംപ് വിമർശിച്ചതിന് പിന്നാലെയാണ് ഇന്റർനെറ്റ് സേവനത്തിലെ തടസ്സം ഉണ്ടായതെന്നാണ് റിപ്പോർട്ട്. ദീർഘദൂര ആക്രമണങ്ങൾ അവസാനിപ്പിച്ചില്ലെങ്കിൽ യുക്രെയ്‌നുമായുള്ള രഹസ്യാന്വേഷണ വിവരങ്ങൾ പങ്കിടുന്നതും യൂറോപ്യൻ രാജ്യങ്ങൾ വഴി യുഎസ് ആയുധങ്ങൾ ലഭ്യമാക്കുന്നതും നിർത്തിവയ്ക്കാമെന്ന് ട്രംപ് ഭരണകൂടം മുന്നറിയിപ്പ് നൽകിയതായും റിപ്പോർട്ടുകളുണ്ട്.
റഷ്യയുടെ ബാലിസ്റ്റിക് മിസൈൽ ആക്രമണങ്ങളെ പ്രതിരോധിക്കാൻ യുഎസും മറ്റ് പങ്കാളികളും നൽകുന്ന രഹസ്യാന്വേഷണ വിവരങ്ങൾ യുക്രെയ്‌ന് സഹായകരമാണ്. മിസൈൽ വിക്ഷേപണ കേന്ദ്രങ്ങളുടെ സ്ഥാനവും ആക്രമണങ്ങളുടെ ദിശയും സമയവും സംബന്ധിച്ച വിവരങ്ങൾ ഇതിൽ ഉൾപ്പെടുന്നു.
ലണ്ടൻ സന്ദർശനത്തിനിടെ ബ്രിട്ടീഷ് മാധ്യമപ്രവർത്തകൻ പിയേഴ്‌സ് മോർഗനുമായി നടത്തിയ അഭിമുഖത്തിൽ, യുഎസിന്റെ പിന്തുണ നഷ്ടമാകുന്നുണ്ടോയെന്ന ചോദ്യത്തിന് സെലൻസ്കി ‘അതെ’ എന്ന് മറുപടി നൽകി. എന്നാൽ അതിന് കാരണം യുക്രെയ്‌നല്ലെന്നും രാജ്യത്തിന് ദുർബലമാകാനാവില്ലെന്നും അദ്ദേഹം പറഞ്ഞു. ട്രംപ് യുക്രെയ്‌നെക്കാൾ റഷ്യയുടെ പക്ഷം ചേരുന്നതിൽ വേദനയുണ്ടെന്നും സെലൻസ്കി കൂട്ടിച്ചേർത്തു. അതേസമയം, യുക്രെയ്‌നുമായി രഹസ്യാന്വേഷണ വിവരങ്ങൾ പങ്കിടുന്നത് തുടരുകയാണെന്ന് ട്രംപ് ചൊവ്വാഴ്ച വ്യക്തമാക്കി.
റഷ്യയിലെ യാൻഡെക്സ് ഡാറ്റാ സെന്ററുകൾ ആക്രമിച്ചതായി സെലൻസ്കി
റഷ്യയിലെ പ്രധാന സാങ്കേതികവിദ്യാ കമ്പനിയായ യാൻഡെക്സിന്റെ ഒന്നിലധികം ഡാറ്റാ സെന്ററുകൾ യുക്രെയ്ൻ ആക്രമിച്ചതായും ഇതോടെ ഓൺലൈൻ ബോട്ടുകളുടെ പ്രവർത്തനം കുറഞ്ഞതായും സെലൻസ്കി അവകാശപ്പെട്ടു. സമൂഹമാധ്യമങ്ങളിൽ വിദ്വേഷവും ഭിന്നിപ്പും പ്രകോപനങ്ങളും കുറഞ്ഞതായി പലരും ശ്രദ്ധിച്ചെന്നും അദ്ദേഹം പറഞ്ഞു.
റഷ്യയുടെ ഓൺലൈൻ ഇടപെടൽ പ്രവർത്തനങ്ങളിൽ ബോട്ടുകൾ വഹിക്കുന്ന പങ്കിനെക്കുറിച്ച് ഈ സംഭവങ്ങൾ ചോദ്യങ്ങളുയർത്തുന്നതായും സെലൻസ്കി അഭിപ്രായപ്പെട്ടു. സസോവോ, കലുഗ, വ്ലാദിമിർ മേഖലകളിലെ മൂന്ന് ഡാറ്റാ സെന്ററുകൾ ആക്രമിക്കപ്പെട്ടതായി യാൻഡെക്സ് സ്ഥിരീകരിച്ചിട്ടുണ്ട്.