തിരുവനന്തപുരം: മികച്ച വരുമാനവുമായി കെഎസ്ആർടിസി മുന്നോട്ട് കുതിക്കുകയാണ്. മികസച്ച സർവീസുകളും യാത്രക്കാർക്ക് സൗകര്യപ്രദമായ റൂട്ടിലെ മികച്ച ബസുകളും ഒക്കെയായി വരുമാനത്തിലും സേവനത്തിലും ഒക്കെ കെഎസ്ആർടിസി ഇപ്പോൾ മുന്നേറുകയാണ്. ഇപ്പോഴിതാ, വരുമാനത്തിലും പിന്നിലല്ലെന്ന് തെളിയിച്ചിരിക്കുകയാണ് കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ.
ഒക്ടോബർ പത്താം തിയതി കെഎസ്ആർടിസി ചരിത്രത്തിലെ രണ്ടാമത്തെ മികച്ച കളക്ഷൻ നേടി. 2025 സെപ്റ്റംബർ 8-ാം തീയതിയാണ് എക്കാലത്തെയും മികച്ച പ്രതിദിന ടിക്കറ്റ് വരുമാനമായ ₹10.19 കോടി കെഎസ്ആർടിസി നേടിയത്. 06.10.2025 ന് രണ്ടാമത്തെ ഉയർന്ന കളക്ഷനായ ₹9.41 കോടി നേടാനായി.
ജീവനക്കാരുടെയും, സൂപ്പർവൈസർമാരുടെയും, ഓഫീസർമാരുടെയും ഏകോപിതമായ പരിശ്രമങ്ങളിലൂടെയാണ്തുടർച്ചയായി മികച്ച വരുമാനം നേടി മുന്നേറുന്നതിന് കെഎസ്ആർടിസിക്ക് സഹായകരമാകുന്നത്. ബഹു.ഗതാഗത വകുപ്പ് മന്ത്രിയുടെ കാലോചിതമായ പരിഷ്ക്കരണ നടപടികളും, കെഎസ്ആർടിസി മാനേജ്മെന്റിന്റെ നേതൃത്വത്തിൽ നടത്തിയ തുടർ പ്രവർത്തനങ്ങളും ഈ വലിയ മുന്നേറ്റത്തിന് നിർണായകമായി. പുതിയ ബസുകളുടെ വരവും, സേവനങ്ങളിൽ കൊണ്ടുവന്ന ഗുണപരമായ മാറ്റങ്ങളും യാത്രക്കാരിൽ വൻ സ്വീകാര്യത നേടിയിട്ടുണ്ട്.
കെഎസ്ആർടിസിയുടെ അഭിമാനകരമായ ഈ നേട്ടത്തിനായി, സമർപ്പിതമായി പ്രവർത്തിച്ച മുഴുവൻ ജീവനക്കാരോടും,കെഎസ്ആർടിസിയോട് വിശ്വാസ്യത പുലർത്തിയ യാത്രക്കാരോടും, പിന്തുണ നൽകിയ തൊഴിലാളി സംഘടനകൾ അടക്കം ഓരോരുത്തരോടും കെഎസ്ആർടിസിയുടെ പേരിൽ നന്ദി അറിയിക്കുന്നതായി ചെയർമാൻ ആൻഡ് മാനേജിങ് ഡയറക്ടർ പറഞ്ഞു.
