ന്യൂഡല്ഹി: പിഎം ശ്രീ പദ്ധതി നടപ്പാക്കുന്നത് കേരളം മരവിപ്പിച്ചതായി അറിയില്ലെന്ന് കേന്ദ്ര വിദ്യാഭ്യാസ മന്ത്രാലയം. രേഖാമൂലം കേരളത്തിന്റെ അറിയിപ്പ് കിട്ടിയാല് നിലപാട് അറിയിക്കുമെന്നും വ്യവസ്ഥകളില് ഇളവ് ഒരു സംസ്ഥാനത്തിന് മാത്രമായി നല്കണോ എന്നത് പരിശോധിക്കണമെന്നും മന്ത്രാലയം വ്യക്തമാക്കി. തല്ക്കാലം പദ്ധതി നടപ്പാക്കുന്ന നടപടികളുമായി മുന്നോട്ടുപോകും. അതിന് എന്തെങ്കിലും തടസ്സം നിലവിലില്ലെന്നും കേന്ദ്ര വിദ്യാഭ്യാസ മന്ത്രാലയം പറഞ്ഞു. അതേസമയം, പിഎം ശ്രീയില് നിന്ന് കേരളം പിന്നോട്ടെന്ന വാര്ത്തകളോട് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് പ്രതികരിച്ചില്ല.
ഇന്നലെയായിരുന്നു പിഎം ശ്രീയുടെ തുടര്നടപടികള് മരവിപ്പിക്കാനുള്ള നിര്ണായ തീരുമാനമുണ്ടായത്. മുഖ്യമന്ത്രി പിണറായി വിജയന്റെ അധ്യക്ഷതയില് ഇന്നലെ തിരുവനന്തപുരത്ത് ചേര്ന്ന എല്ഡിഎഫിന്റെ നിര്ണായക യോഗത്തിലായിരുന്നു തീരുമാനം. പിഎം ശ്രീ നടപടികള് താല്ക്കാലികമായി മരവിപ്പിക്കാനായിരുന്നു തീരുമാനം. ഇക്കാര്യം വ്യക്തമാക്കി കേന്ദ്രത്തിന് കത്തയക്കാനും തീരുമാനിച്ചിട്ടുണ്ട്. യോഗത്തിന് ശേഷം തീരുമാനം സിപിഐ സംസ്ഥാന സെക്രട്ടറി ബിനോയ് വിശ്വത്തെ അറിയിച്ചു. ഇതോടെ പിഎം ശ്രീയില് സമവായ തീരുമാനമായി. ഇത് എല്ഡിഎഫിന്റെ വിജയമെന്ന് പ്രതികരിച്ച് ബിനോയ് വിശ്വം രംഗത്തെത്തി. പിന്നാലെ ചേര്ന്ന നിര്ണായക മന്ത്രിസഭാ യോഗത്തില് സിപിഐയുടെ നാല് മന്ത്രിമാരും പങ്കെടുത്തു. ഇതിന് ശേഷം മുഖ്യമന്ത്രി നടത്തിയ വാര്ത്താസമ്മേളനത്തില് നിര്ണായ പ്രഖ്യാപനം വന്നു. അതേസമയം തമിഴ്നാടും പശ്ചിമ ബംഗാളും ഒഴികെയുള്ള സംസ്ഥാനങ്ങള് പിഎം ശ്രീയുമായി മുന്നോട്ടുപോകുകയാണ്.