വിക്ടോറിയയിലെ ദശലക്ഷക്കണക്കിന് പൊതുഗതാഗത യാത്രക്കാരിൽ നിന്ന് ഒരു വർഷത്തിലേറെയായി അറിയാതെയാണ് സബർബൻ റെയിൽ ലൂപ്പ് (SRL) പദ്ധതിക്കായി അധിക തുക ഈടാക്കിയിരുന്നതായി റിപ്പോർട്ട്. $34.5 ബില്യൺ ചെലവ് പ്രതീക്ഷിക്കുന്ന പദ്ധതിക്ക് വേണ്ടിയാണ് ഈ തുക പിരിച്ചെടുത്തത്. വിക്ടോറിയൻ ഓഡിറ്റർ ജനറലിന്റെ കടുത്ത വിമർശനങ്ങളടങ്ങിയ ഓഡിറ്റ് റിപ്പോർട്ടിലാണ് ഇക്കാര്യം പുറത്തുവന്നത്. ‘റെയിൽ ഇംപ്രൂവ്മെന്റ് ചാർജ്’ എന്ന പേരിലുള്ള ലെവി 2025 ജനുവരിയിൽ സംസ്ഥാനത്തെ എല്ലാ പൊതുഗതാഗത നിരക്കുകളിലും ഉൾപ്പെടുത്തിയെങ്കിലും ഇക്കാര്യം പൊതുജനങ്ങളെ അറിയിച്ചിരുന്നില്ലെന്നാണ് റിപ്പോർട്ട്.
പൊതുഗതാഗത ടിക്കറ്റ് നിരക്കിന്റെ ഭാഗമായാണ് ലെവി ഈടാക്കുന്നത്. ഒരു വർഷത്തിലേറെയായി ഇതിലൂടെ SRL പദ്ധതിക്കായി പണം സമാഹരിച്ചുവരികയാണ്. “പദ്ധതിക്ക് പണം കണ്ടെത്തുന്നതിനുള്ള തന്ത്രം സുതാര്യമല്ല. ഇതിൽ കാര്യമായ അനിശ്ചിതത്വമുണ്ട്,” ഓഡിറ്റ് റിപ്പോർട്ടിൽ പറയുന്നു. ലെവി ഏർപ്പെടുത്തുന്നതിന് സർക്കാർ 2021 ഓഗസ്റ്റിൽ തന്നെ അംഗീകാരം നൽകിയിരുന്നതായും റിപ്പോർട്ട് വ്യക്തമാക്കുന്നു. അന്ന് ബെൻ കരോൾ ആയിരുന്നു പൊതുഗതാഗത മന്ത്രി.
അതേസമയം, പദ്ധതിയുടെ ആദ്യഘട്ടമായ 26 കിലോമീറ്റർ SRL East-ന്റെ ചെലവ്, സമയക്രമം, ധനസമാഹരണം എന്നിവയെക്കുറിച്ചും ഓഡിറ്റർ ജനറൽ ഗുരുതര ആശങ്കകൾ ഉന്നയിച്ചു. പദ്ധതിയുടെ ഔദ്യോഗിക ചെലവ് കണക്കിനെ മറികടക്കാനുള്ള സാധ്യത കൂടുതലാണെന്നാണ് മുന്നറിയിപ്പ്. ഭൂമിശാസ്ത്രപരമായ സാഹചര്യങ്ങൾ, നിർമാണ വിപണിയിലെ ഉയർന്ന ചെലവുകൾ, അധിക ചിലവുകൾ എന്നിവയാണ് ഇതിന് പ്രധാന കാരണങ്ങളായി ചൂണ്ടിക്കാട്ടുന്നത്. ഈ വർഷം ജൂൺ വരെയുള്ള കണക്കനുസരിച്ച് പദ്ധതിക്ക് $5.5 ബില്യണിന്റെ ഫണ്ടിംഗ് കുറവ് നിലവിലുണ്ട്. പ്രധാന ധനസ്രോതസ്സുകളെ ചുറ്റിപ്പറ്റിയുള്ള അനിശ്ചിതത്വം തുടരുകയാണെങ്കിൽ കൂടുതൽ വായ്പയെടുക്കുകയോ പുതിയ വരുമാന മാർഗങ്ങൾ കണ്ടെത്തുകയോ ചെയ്യേണ്ടിവരുമെന്നും ഓഡിറ്റർമാർ മുന്നറിയിപ്പ് നൽകി. പദ്ധതി പൂർത്തിയാക്കുന്നതിലെ കാലതാമസവും സർക്കാരിന്റെ 2035ലെ ഉദ്ഘാടനം ലക്ഷ്യത്തെ ബാധിക്കുന്നുണ്ട്. ആദ്യഘട്ടത്തിലെ ഒരു നിർമാണ പാക്കേജ് ഏകദേശം ആറ് മാസം വൈകിയാണ് പൂർത്തിയായത്. സ്റ്റേഷൻ നിർമാണ പാക്കേജുകളുടെ കരാർ നടപടികളും ഏകദേശം ഒരു വർഷം പിന്നിലാണ്.
ജൂൺ വരെ സർക്കാർ $13.2 ബില്യൺ മൂല്യമുള്ള കരാറുകളിൽ ഒപ്പുവച്ചിട്ടുണ്ട്. എന്നാൽ രണ്ടാമത്തെ സ്റ്റേഷൻ പാക്കേജിൽ കരാർ ഒപ്പിടുന്നതിനാവശ്യമായ അംഗീകൃത ഫണ്ടിംഗ് ഇതുവരെ ലഭിച്ചിട്ടില്ല. SRL East-ന്റെ ചെലവിൽ നിന്ന് $2 ബില്യൺ കുറയ്ക്കുമെന്ന് ബെൻ കരോൾ പ്രഖ്യാപിച്ച് വെറും 24 മണിക്കൂറിനുള്ളിലാണ് ഓഡിറ്റ് റിപ്പോർട്ട് പുറത്തുവന്നത്.
അതേസമയം, പ്രതിപക്ഷ നേതാവ് ജെസ് വിൽസൺ നേരത്തെ വ്യക്തമാക്കിയിരുന്നത്, കോയലിഷൻ സർക്കാർ അധികാരത്തിലെത്തിയാൽ ക്രിസ്മസിന് മുമ്പ് SRL പദ്ധതിയുടെ നിർമാണം നിർത്തിവയ്ക്കുമെന്നാണ്. സംഭവത്തിൽ പൊതുഗതാഗത മന്ത്രി വിക്കി വാർഡിന്റെ പ്രതികരണം തേടിയിട്ടുണ്ട്.