ഈ മാസത്തെ വിക്ടോറിയൻ സംസ്ഥാന തിരഞ്ഞെടുപ്പിൽ വീണ്ടും അധികാരത്തിലെത്തിയാൽ സംസ്ഥാനത്ത് 20 സൗജന്യ ദന്തചികിത്സാ കേന്ദ്രങ്ങൾ ആരംഭിക്കുമെന്ന് ലേബർ പാർട്ടി. നേരത്തെ പ്രഖ്യാപിച്ചിരുന്ന പത്ത് കേന്ദ്രങ്ങളുടെ എണ്ണം ഇരട്ടിയാക്കുമെന്ന് വിക്ടോറിയൻ പ്രീമിയർ ബെൻ കരോൾ ഞായറാഴ്ച അറിയിച്ചു. ഓഗസ്റ്റിലായിരുന്നു വീണ്ടും അധികാരത്തിലെത്തിയാൽ മൂന്ന് വർഷത്തിനുള്ളിൽ 230 ദശലക്ഷം ഡോളർ ചെലവഴിച്ച് പത്ത് പൊതുദന്തചികിത്സാ കേന്ദ്രങ്ങൾ ആരംഭിക്കുമെന്ന് ലേബർ പ്രഖ്യാപിച്ചത്. പരിശോധനകൾക്കൊപ്പം പല്ല് അടയ്ക്കൽ, റൂട്ട് കനാൽ ചികിത്സ, പല്ല് നീക്കം ചെയ്യൽ തുടങ്ങിയ സേവനങ്ങളും ഇവിടെ സൗജന്യമായി ലഭ്യമാക്കാനായിരുന്നു പദ്ധതി.
പുതിയ പ്രഖ്യാപനപ്രകാരം 20 കേന്ദ്രങ്ങളിൽ 14 എണ്ണം മെൽബണിലും ആറെണ്ണം പ്രാദേശിക വിക്ടോറിയയിലുമായിരിക്കും. ഗീലോങ്, ലാട്രോബ്, ബാലറാറ്റ്, ബെൻഡിഗോ, ഷെപ്പർട്ടൺ, മിൽഡ്യൂറ എന്നിവിടങ്ങളിലും മെൽബണിലെ പൊതുദന്തചികിത്സാ സൗകര്യങ്ങൾ കുറവുള്ള മേഖലകളിലും കേന്ദ്രങ്ങൾ ആരംഭിക്കും. പ്രതിവർഷം രണ്ട് ലക്ഷം പേർക്ക് വരെ ചികിത്സ ലഭ്യമാക്കാനാകുമെന്നാണ് ലേബറിന്റെ കണക്ക്. നിലവിൽ ഓസ്‌ട്രേലിയയിലെ മെഡികെയർ പദ്ധതിയിൽ ദന്തചികിത്സ ഉൾപ്പെടുന്നില്ല. അതിനാൽ എല്ലാവർക്കും പൊതുവായി സൗജന്യ ദന്തചികിത്സ ലഭിക്കുന്ന സാഹചര്യമില്ല. സ്വകാര്യ ചികിത്സയുടെ ഉയർന്ന ചെലവ് കാരണം പലരും ചികിത്സ വൈകിപ്പിക്കുകയാണെന്നും പൊതുദന്തചികിത്സയ്ക്കായി ജൂലൈയിൽ ശരാശരി 15 മാസം കാത്തിരിക്കേണ്ടി വന്നെന്നും കരോൾ പറഞ്ഞു. ദന്തഡോക്ടർമാരെ പൊതുജനാരോഗ്യ സംവിധാനത്തിലേക്ക് കൂടുതൽ ആകർഷിക്കാനും ലേബർ പദ്ധതിയിടുന്നുണ്ട്. മെൽബണിൽ പൊതുമേഖലയിൽ ജോലിയിൽ പ്രവേശിക്കുന്ന ദന്തഡോക്ടർമാർക്ക് 20,000 ഡോളറും പ്രാദേശിക മേഖലകളിൽ ചേരുന്നവർക്ക് 30,000 ഡോളറും പ്രോത്സാഹനത്തുകയായി നൽകും. ഇതിനായി ഏകദേശം അഞ്ച് ദശലക്ഷം ഡോളർ ചെലവഴിക്കുമെന്നും കരോൾ അറിയിച്ചു.
ഓസ്‌ട്രേലിയൻ ഇൻസ്റ്റിറ്റ്യൂട്ട് ഓഫ് ഹെൽത്ത് ആൻഡ് വെൽഫെയറിന്റെ വാക്കാലുള്ള ആരോഗ്യ റിപ്പോർട്ട് പ്രകാരം ജീവിതച്ചെലവിലെ വർധന കാരണം രാജ്യത്തെ നാലിലൊന്നിലധികം പേർ ആവശ്യമായ ദന്തചികിത്സ ഒഴിവാക്കുകയാണ്. സാമ്പത്തിക ബുദ്ധിമുട്ടുകൾ കാരണം ദന്തപരിശോധന മാറ്റിവയ്ക്കുന്നവരിൽ 18 മുതൽ 25 വയസ്സുവരെയുള്ള യുവാക്കളാണ് മുന്നിൽ. ഈ പ്രായവിഭാഗത്തിൽ ഏകദേശം 60 ശതമാനം പേരും പരിശോധന വൈകിപ്പിക്കുന്നതായി റിപ്പോർട്ട് ചൂണ്ടിക്കാട്ടുന്നു. അതേസമയം, ദന്തചികിത്സയെ മെഡികെയറിന്റെ പരിധിയിൽ ഉൾപ്പെടുത്തുന്നതിനുള്ള സാധ്യതകൾ പരിശോധിക്കുമെന്ന് ഫെഡറൽ ലേബർ സർക്കാർ നേരത്തെ വ്യക്തമാക്കിയിരുന്നു. ജൂലൈയിൽ നടന്ന ദേശീയ സമ്മേളനത്തിൽ ഇതിനായി ഒരു റോഡ്‌മാപ്പ് തയ്യാറാക്കാനുള്ള നീക്കവും പ്രഖ്യാപിച്ചു. എന്നാൽ നിലവിൽ ഇത് സർക്കാരിന്റെ മുൻഗണനാ വിഷയമല്ലെന്നും ഉടൻ നടപ്പാക്കാനുള്ള സാമ്പത്തികവും ഭരണപരവുമായ ശേഷിയില്ലെന്നും ഫെഡറൽ ആരോഗ്യമന്ത്രി മാർക്ക് ബട്‌ലർ വ്യക്തമാക്കിയിരുന്നു.