ടാസ്മാനിയയിലെ ജലനിരക്ക് നാല് വർഷത്തിനുള്ളിൽ 40 ശതമാനം വർദ്ധിപ്പിക്കണമെന്ന ടാസ്വാട്ടറിന്റെ ആവശ്യം സംസ്ഥാന സാമ്പത്തിക റെഗുലേറ്റർ തള്ളി. നിലവിലുള്ള പഴയ ജലവിതരണ-മലിനജല സംസ്കരണ സംവിധാനങ്ങൾ നവീകരിക്കുന്നതിനും പുതിയ ഭവന പദ്ധതികൾക്ക് സൗകര്യമൊരുക്കുന്നതിനും ഈ തുക അത്യാവശ്യമാണെന്ന് ടാസ്വാട്ടർ വാദിക്കുന്നു. എന്നാൽ, ജനങ്ങൾക്ക് താങ്ങാനാവുന്നതിലും വലിയ വർദ്ധനവാണിതെന്ന് ചൂണ്ടിക്കാട്ടി റെഗുലേറ്ററായ ജോ ഡിമാസി ഈ നിർദ്ദേശം നിരസിക്കുകയായിരുന്നു.
ടാസ്വാട്ടർ ഓരോ വർഷവും 8.8 ശതമാനം വർദ്ധനവ് ആവശ്യപ്പെട്ടപ്പോൾ, റെഗുലേറ്റർ അത് 4.3 ശതമാനമായി കുറച്ചു. ഇത് നടപ്പിലായാൽ ഒരു സാധാരണ കുടുംബത്തിന് വർഷം 91 ഡോളർ അധികം നൽകേണ്ടി വരുന്ന സ്ഥാനത്ത് 54 ഡോളർ മാത്രമേ വർദ്ധനവ് ഉണ്ടാവുകയുള്ളൂ. റെഗുലേറ്ററുടെ ഈ കരട് റിപ്പോർട്ടിന്മേൽ പൊതുജനങ്ങൾക്ക് മാർച്ച് 13 വരെ അഭിപ്രായം അറിയിക്കാം. അന്തിമ തീരുമാനം മെയ് മാസത്തിൽ പുറപ്പെടുവിക്കും.
അതേസമയം, ടാസ്വാട്ടറിന്റെ നിലപാടിനെതിരെ പ്രതിപക്ഷം കടുത്ത വിമർശനവുമായി രംഗത്തെത്തി. 40 ശതമാനം വർദ്ധനവ് എന്നത് യാഥാർത്ഥ്യബോധമില്ലാത്തതാണെന്ന് ലേബർ പാർട്ടി ഷാഡോ ട്രഷറർ ഡീൻ വിന്റർ പറഞ്ഞു. എന്നാൽ, ടാസ്മാനിയയിലെ 110 മലിനജല സംസ്കരണ പ്ലാന്റുകളിൽ 100 എണ്ണവും നിലവിൽ പരിസ്ഥിതി നിബന്ധനകൾ പാലിക്കുന്നില്ലെന്നും നിക്ഷേപം വൈകുന്നത് ഭാവിയിൽ കൂടുതൽ ചിലവേറാൻ കാരണമാകുമെന്നുമാണ് ടാസ്വാട്ടർ സി.ഇ.ഒ ജോർജ്ജ് തിയോയുടെ വിശദീകരണം.
