ടാസ്മാനിയയിലെ വൈറ്റ് ബീച്ചിൽ ശനിയാഴ്ച രാവിലെ ഒരു നായ വാഹനം ഓടിക്കുന്നതായി കണ്ട സംഭവത്തിൽ പോലീസ് അന്വേഷണം ആരംഭിച്ചു. ബീച്ചിലൂടെ പോവുകയായിരുന്ന വൈറ്റ് മിത്സുബിഷി ട്രൈറ്റൺ എന്ന വാഹനത്തിന്റെ ഡ്രൈവർ സീറ്റിൽ നായ ഇരിക്കുന്നതായും അരികിലെ പാസഞ്ചർ സീറ്റിൽ ഒരാൾ ഇരിക്കുന്നതായും ദൃക്സാക്ഷികൾ മൊഴി നൽകി.
സംഭവത്തെക്കുറിച്ച് നിരവധി പരാതികൾ ലഭിച്ചതിനെത്തുടർന്ന് നടത്തിയ തിരച്ചിലിൽ അടുത്തുള്ള ഒരു വീട്ടിൽ നിന്ന് പോലീസ് വാഹനവും ഉടമയെയും നായയെയും കണ്ടെത്തി. ഈ സംഭവത്തിന്റെ ദൃശ്യങ്ങളോ ഡാഷ്ക്യാം ദൃശ്യങ്ങളോ കൈവശമുള്ളവർ അത് കൈമാറണമെന്ന് പോലീസ് അഭ്യർത്ഥിച്ചു. നായയെ ഡ്രൈവർ സീറ്റിലിരുത്തി വാഹനം ഓടിച്ചതിലെ അപകടസാധ്യതയും നിയമലംഘനവും കണക്കിലെടുത്താണ് നടപടി.
