ഓസ്ട്രേലിയയുടെ വിവിധ ഭാഗങ്ങളിൽ ആഴ്ചയുടെ തുടക്കം മുതൽ തുടരുന്ന ശക്തമായ മഴയും ഇടിമിന്നലും കൂടുതൽ പ്രദേശങ്ങളിലേക്ക് വ്യാപിച്ചു. സൗത്ത് ഓസ്ട്രേലിയയിലും നോർത്തേൺ ടെറിട്ടറിയിലും 1,500 കിലോമീറ്ററിലധികം നീണ്ടുനിന്ന മഴമേഘപടലമാണ് തിങ്കളാഴ്ചയും ചൊവ്വാഴ്ചയും കനത്ത മഴയ്ക്ക് കാരണമായത്. പിന്നീട് കാലാവസ്ഥാ സംവിധാനം കിഴക്കോട്ട് നീങ്ങിയതോടെ ന്യൂ സൗത്ത് വെയിൽസ്, വിക്ടോറിയ, ക്വീൻസ്ലാൻഡ് എന്നിവിടങ്ങളിലും മഴ ശക്തമായി. സൗത്ത് ഓസ്ട്രേലിയയുടെ തെക്കൻ മേഖലകളിലാണ് ഏറ്റവും ശക്തമായ മഴ ലഭിച്ചത്. മൗണ്ട് ലോഫ്റ്റി റേഞ്ചസിലും അഡിലെയ്ഡിലും 24 മണിക്കൂറിനിടെ 20 മുതൽ 50 മില്ലിമീറ്റർ വരെ മഴ രേഖപ്പെടുത്തി. ചില ഒറ്റപ്പെട്ട പ്രദേശങ്ങളിൽ ഇത് 60 മുതൽ 70 മില്ലിമീറ്റർ വരെയെത്തി. അഡിലെയ്ഡിൽ 29.8 മില്ലിമീറ്റർ മഴ ലഭിച്ചു. 34 വർഷത്തിനിടയിലെ ഓഗസ്റ്റ് മാസത്തിലെ ഏറ്റവും ശക്തമായ മഴയാണിത്. മറെ ബ്രിഡ്ജിൽ 22 മില്ലിമീറ്റർ മഴ രേഖപ്പെടുത്തിയപ്പോൾ, 40 വർഷത്തിനിടയിലെ ഓഗസ്റ്റിലെ ഏറ്റവും ശക്തമായ മഴയായിരുന്നു ഇത്.
ന്യൂ സൗത്ത് വെയിൽസിൽ വോളോംഗോങ്ങ് മുതൽ ക്വീൻസ്ലാൻഡ് അതിർത്തി വരെയുള്ള പ്രദേശങ്ങളിൽ രാത്രി മുഴുവൻ മഴയും ഇടിമിന്നലും അനുഭവപ്പെട്ടു. ബുധനാഴ്ച രാവിലെ സംസ്ഥാനത്തിന്റെ ചില ഭാഗങ്ങളിൽ മഴ തുടരുമെങ്കിലും ഉച്ചയ്ക്ക് ശേഷം ചെറിയ തോതിലുള്ള ഒറ്റപ്പെട്ട ചാറ്റൽമഴ മാത്രമായിരിക്കുമെന്ന് ഹിൻസ് പറഞ്ഞു. അതേസമയം, വിക്ടോറിയയിൽ ബുധനാഴ്ച കൂടുതൽ വരണ്ട കാലാവസ്ഥയായിരിക്കുമെന്നാണ് പ്രവചനം. രാത്രിയോടെ മഴ പൂർണമായും മാറുകയും ബുധനാഴ്ച സംസ്ഥാനത്ത് കാര്യമായ മഴ ലഭിക്കാതിരിക്കാനും സാധ്യതയുണ്ട്.
കിഴക്കൻ ഓസ്ട്രേലിയയിൽ ഒരു കാലാവസ്ഥാ സംവിധാനം പിൻവാങ്ങുന്നതിനിടെ മറ്റൊരു ശക്തമായ സംവിധാനം പടിഞ്ഞാറൻ ഓസ്ട്രേലിയയിലേക്ക് നീങ്ങുകയാണ്. പെർത്തിന് തെക്കുള്ള ലോവർ വെസ്റ്റ്, സൗത്ത് വെസ്റ്റ് ജില്ലകളിൽ കനത്ത മഴയ്ക്ക് പിന്നാലെ ശക്തമായ കാലാവസ്ഥാ മുന്നറിയിപ്പ് പുറപ്പെടുവിച്ചു. റേവൻസ്ക്ലിഫിൽ അർധരാത്രി 12.30 വരെ വെറും അഞ്ച് മണിക്കൂറിനിടെ 50.8 മില്ലിമീറ്റർ മഴ രേഖപ്പെടുത്തി. അടുത്ത മണിക്കൂറുകളിൽ ആറ് മണിക്കൂറിനിടെ 30 മുതൽ 60 മില്ലിമീറ്റർ വരെ മഴയും ചില പ്രദേശങ്ങളിൽ 70 മില്ലിമീറ്റർ വരെയുള്ള ശക്തമായ മഴയും ലഭിക്കാമെന്നാണ് മുന്നറിയിപ്പ്. പ്രളയ സാധ്യതയുള്ള പ്രദേശങ്ങളിലുള്ളവർ ജാഗ്രത പാലിക്കണമെന്നും ഏറ്റവും പുതിയ കാലാവസ്ഥാ മുന്നറിയിപ്പുകൾക്കായി ബ്യൂറോ ഓഫ് മീറ്റിയറോളജിയുടെ അറിയിപ്പുകൾ നിരന്തരം പരിശോധിക്കണമെന്നും അധികൃതർ നിർദേശിച്ചു.