കാൻബറ: ഓസ്ട്രേലിയയിൽ തലമുറകൾ തമ്മിലുള്ള സാമ്പത്തിക അസമത്വം വർദ്ധിച്ചതോടെ സ്വന്തമായി വീട് വാങ്ങുകയെന്ന ലക്ഷ്യം ഉപേക്ഷിക്കാൻ നിർബന്ധിതരായി യുവതലമുറ. ആംഗ്ലികെയർ ഓസ്ട്രേലിയ (Anglicare Australia) പുറത്തുവിട്ട 'ഫാളിംഗ് ബിഹൈൻഡ്' (Falling Behind) റിപ്പോർട്ട് പ്രകാരം, 25 നും 34 നും ഇടയിൽ പ്രായമുള്ളവരുടെ ഭവന ഉടമസ്ഥതാ നിരക്ക് കഴിഞ്ഞ 80 വർഷത്തെ ഏറ്റവും താഴ്ന്ന നിലയിലെത്തി. അസ്ഥിരമായ തൊഴിൽ സാഹചര്യങ്ങൾ, വർദ്ധിച്ചുവരുന്ന ജീവിതച്ചെലവ്, ഉയർന്ന ഭവനവില എന്നിവയാണ് കഠിനാധ്വാനം ചെയ്തിട്ടും ചെറുപ്പക്കാർക്ക് സാമ്പത്തിക സുരക്ഷിതത്വം ഇല്ലാതാക്കുന്നത്.
റിയൽ എസ്റ്റേറ്റ് നിക്ഷേപങ്ങൾക്ക് അനുകൂലമായ പഴയ നികുതി ഘടനകൾ മുതിർന്ന തലമുറയ്ക്ക് വലിയ തോതിൽ സ്വത്ത് സമ്പാദിക്കാൻ സഹായകരമായപ്പോൾ, കുറഞ്ഞ വേതനവും ഉയർന്ന ജീവിതച്ചെലവും നേരിടുന്ന യുവതലമുറയെ അത് കടുത്ത പ്രതിസന്ധിയിലാക്കി. ഇതിനുപുറമെ, സെന്റർലിങ്ക് (Centrelink) നൽകുന്ന യൂത്ത് അലവൻസ് (Youth Allowance) ആനുകൂല്യങ്ങൾ ദാരിദ്ര്യരേഖയ്ക്ക് താഴെയാണെന്നും ഇത് വാടകക്കയറ്റവും പണപ്പെരുപ്പവും നേരിടുന്ന ചെറുപ്പക്കാരെ കൂടുതൽ ദരിദ്രരാക്കുകയാണെന്നും റിപ്പോർട്ട് ചൂണ്ടിക്കാണിക്കുന്നു. രാജ്യത്തെ സമ്പത്ത് തുല്യമായി പങ്കിടാൻ സമ്പത്തിന്മേൽ കൂടുതൽ കൃത്യമായ നികുതി വ്യവസ്ഥകൾ കൊണ്ടുവരണമെന്ന് സാമൂഹിക ക്ഷേമ സംഘടനകൾ ആവശ്യപ്പെടുന്നു.
