ഓസ്‌ട്രേലിയക്കാർ പതിവായി അവധിക്കാലം ചെലവഴിക്കാൻ പോകുന്ന വിദേശ രാജ്യങ്ങളിൽ ഡെങ്കിപ്പനി കേസുകൾ വർധിക്കുന്ന സാഹചര്യത്തിൽ, രാജ്യത്ത് ആദ്യമായി ഡെങ്കിപ്പനി വാക്സിൻ ലഭ്യമായി. Qdenga എന്ന വാക്സിനാണ് പുതിയ നിർദേശങ്ങളുടെ അടിസ്ഥാനത്തിൽ ഓസ്‌ട്രേലിയയിൽ ലഭ്യമാക്കിയിരിക്കുന്നത്. രാജ്യത്തെ ജിപിമാർക്ക് ഇനി രോഗികൾക്കായി വാക്സിൻ ഓർഡർ ചെയ്യാം.
ഓസ്‌ട്രേലിയൻ ടെക്നിക്കൽ അഡ്വൈസറി ഗ്രൂപ്പ് ഓൺ ഇമ്യൂണൈസേഷൻ (ATAGI) ആണ് വാക്സിൻ സംബന്ധിച്ച പുതിയ നിർദേശങ്ങൾ പുറത്തിറക്കിയത്. പ്രത്യേകിച്ച് മുമ്പ് ഡെങ്കിപ്പനി ബാധിച്ചിട്ടുള്ളവരും രോഗവ്യാപനം കൂടുതലുള്ള രാജ്യങ്ങളിലേക്ക് യാത്ര ചെയ്യുന്നവരുമായവർക്ക് വാക്സിനേഷൻ പരിഗണിക്കണമെന്ന് നിർദേശത്തിൽ പറയുന്നു. ഓസ്‌ട്രേലിയക്കാർ കൂടുതലായി സന്ദർശിക്കുന്ന ഇന്തോനേഷ്യ, തായ്‌ലൻഡ്, ഇന്ത്യ, വിയറ്റ്നാം, ഫിജി തുടങ്ങിയ രാജ്യങ്ങളിൽ ഡെങ്കിപ്പനി വ്യാപനം പതിവായോ തുടർച്ചയായോ റിപ്പോർട്ട് ചെയ്യുന്നുണ്ട്. ഓസ്‌ട്രേലിയയിൽ റിപ്പോർട്ട് ചെയ്യുന്ന ഭൂരിഭാഗം ഡെങ്കിപ്പനി കേസുകളും വിദേശയാത്ര കഴിഞ്ഞ് മടങ്ങിയെത്തുന്നവരിലാണ് കണ്ടെത്തുന്നത്. 2024ൽ രാജ്യത്ത് 2,381 ഡെങ്കിപ്പനി കേസുകൾ റിപ്പോർട്ട് ചെയ്തപ്പോൾ 2025ൽ ഇത് 1,863 ആയി കുറഞ്ഞിരുന്നു.
നാല് വയസും അതിന് മുകളിലും പ്രായമുള്ള, മുമ്പ് ഡെങ്കിപ്പനി ബാധിച്ചിട്ടില്ലാത്തവർ ഹ്രസ്വകാല വിദേശയാത്രയ്ക്ക് പോകുമ്പോൾ വ്യക്തിഗത അപകടസാധ്യതയും വാക്സിന്റെ ഗുണഫലവും വിലയിരുത്തിയ ശേഷം വാക്സിൻ നൽകുന്നത് പരിഗണിക്കാമെന്ന് ATAGI വ്യക്തമാക്കി. Qdenga രണ്ട് ഡോസുകളായാണ് നൽകുന്നത്. രണ്ട് ഡോസുകൾക്കിടയിൽ കുറഞ്ഞത് 12 ആഴ്ച ഇടവേള വേണം. സംരക്ഷണത്തിന്റെ തോതും ദൈർഘ്യവും പരമാവധി ഉറപ്പാക്കാൻ രണ്ട് ഡോസുകളും സ്വീകരിക്കണമെന്ന് ATAGI നിർദേശിച്ചു. ബൂസ്റ്റർ ഡോസ് നൽകുന്നതിനെ പിന്തുണയ്ക്കുന്നതിനുള്ള മതിയായ വിവരങ്ങൾ നിലവിൽ ലഭ്യമല്ലെന്നും അധികൃതർ അറിയിച്ചു.