യൂറോപ്പിലുടനീളം നിരവധി വിമാനങ്ങൾക്ക് നേരെ വീണ്ടും ബോംബ് ഭീഷണി. വെള്ളിയാഴ്ച വിവിധ രാജ്യങ്ങളിലെ വിമാനങ്ങൾക്ക് ലഭിച്ച ഭീഷണിയെത്തുടർന്ന് സുരക്ഷാ പരിശോധനകൾ നടത്തുകയും ചില സർവീസുകൾ വഴിതിരിച്ചുവിടുകയും ചെയ്തു. ഈ ആഴ്ച തുടർച്ചയായി വ്യാജ ബോംബ് ഭീഷണികൾ ലഭിച്ചതിനെത്തുടർന്നാണ് പുതിയ സംഭവങ്ങൾ. രണ്ട് മാധ്യമസ്ഥാപനങ്ങൾക്കും സുരക്ഷാ ഭീഷണി ലഭിച്ചു. പരിശോധനകളിൽ സംശയാസ്പദമായ വസ്തുക്കളൊന്നും കണ്ടെത്തിയില്ല. ആർക്കും പരിക്കേറ്റതായും റിപ്പോർട്ടില്ല. ഹംഗറിയുടെ വ്യോമാതിർത്തിയിലൂടെ കടന്നുപോയ മൂന്ന് യാത്രാവിമാനങ്ങൾക്ക് ഒരു മണിക്കൂറിനിടെ യുദ്ധവിമാനങ്ങൾ അകമ്പടി നൽകിയതായി പ്രതിരോധ മന്ത്രി റോമുലുസ് റുസിൻ-സെൻഡി അറിയിച്ചു. ബ്രസൽസിൽനിന്ന് സോഫിയയിലേക്കും പ്രാഗിൽനിന്ന് സൈപ്രസിലേക്കും റൊമാനിയയിലേക്കും പോയ വിമാനങ്ങൾക്കാണ് ഭീഷണി ലഭിച്ചത്.
ഫ്രാൻസിന്റെ വ്യോമാതിർത്തിയിലൂടെ സഞ്ചരിച്ച നാല് വിമാനങ്ങൾക്ക് വെള്ളിയാഴ്ച പുതിയ ബോംബ് ഭീഷണി ലഭിച്ചതായി പ്രധാനമന്ത്രി സെബാസ്റ്റ്യൻ ലെകോർണുവിന്റെ ഓഫീസ് അറിയിച്ചു. വിമാനങ്ങൾ സുരക്ഷിതമായി പാരീസിലെ ഓർലി വിമാനത്താവളത്തിൽ ഇറക്കി. തുടർന്ന് ബോംബ് നിർവീര്യമാക്കൽ വിദഗ്ധർ പരിശോധന നടത്തി.
പ്രാഗിൽനിന്ന് ബുക്കാറെസ്റ്റിലേക്ക് പോയ റൊമാനിയൻ വിമാനക്കമ്പനിയായ ടാറോമിന്റെ വിമാനത്തിനും ലിസ്ബണിൽനിന്ന് റോമിലേക്ക് പോയ റയാനെയർ വിമാനത്തിനും ഭീഷണി ലഭിച്ചു. പരിശോധനയിൽ സ്ഫോടകവസ്തുക്കൾ കണ്ടെത്തിയില്ല. പ്രാഗിൽനിന്ന് റോമിലേക്ക് പോയ വിസ് എയർ വിമാനം ബോംബ് ഭീഷണിയെ തുടർന്ന് വെനീസിലേക്ക് തിരിച്ചുവിട്ടു. വിമാനം ഇറങ്ങിയതിന് പിന്നാലെ യാത്രക്കാരെ ഒഴിപ്പിച്ചു. വിമാനത്താവളത്തിലെ വ്യോമഗതാഗതം കുറച്ചുസമയത്തേക്ക് നിർത്തിവെച്ചെങ്കിലും പൊലീസ് പരിശോധനയിൽ സംശയാസ്പദമായ ഒന്നും കണ്ടെത്തിയില്ല.
പ്രാഗിലെ വാക്ലാവ് ഹാവൽ വിമാനത്താവളത്തിൽ ആകെ ഒൻപത് വിമാനങ്ങൾക്ക് ഭീഷണി ലഭിച്ചതായി അധികൃതർ അറിയിച്ചു. ഡെൻമാർക്ക്, സ്പെയിൻ, ബ്രിട്ടൻ എന്നിവിടങ്ങളിൽനിന്ന് എത്തിയ വിമാനങ്ങളും നെതർലൻഡ്‌സ്, സൈപ്രസ്, റൊമാനിയ, ഇറ്റലി, ബ്രിട്ടൻ എന്നിവിടങ്ങളിലേക്ക് പുറപ്പെടാനിരുന്ന വിമാനങ്ങളും ഇതിൽ ഉൾപ്പെടുന്നു. സുരക്ഷാ നടപടികൾ വിമാനത്താവളത്തിന്റെ സാധാരണ പ്രവർത്തനങ്ങളെ കാര്യമായി ബാധിച്ചില്ലെന്ന് ചെക്ക് പൊലീസ് വ്യക്തമാക്കി. തുടർച്ചയായ രണ്ടാം ദിവസവും കോപ്പൻഹേഗൻ വിമാനത്താവളത്തിൽ വ്യോമഗതാഗതത്തിന് നേരെയുള്ള ഭീഷണികളുമായി ബന്ധപ്പെട്ട് പൊലീസ് പരിശോധന നടത്തി. യാത്രക്കാർക്കോ വിമാനത്താവളത്തിലുള്ള മറ്റുള്ളവർക്കോ അപകടസാധ്യതയില്ലെന്നാണ് വിലയിരുത്തലെന്ന് അധികൃതർ അറിയിച്ചു.
ഭീഷണികൾക്ക് പിന്നിൽ ആരെന്ന് വ്യക്തമല്ല
ഈ ആഴ്ചയുടെ തുടക്കത്തിൽ മാത്രം രണ്ട് ഡസനിലധികം വിമാനങ്ങളെ ബോംബ് ഭീഷണികൾ ബാധിച്ചിരുന്നു. ചില വിമാനങ്ങൾ വഴിതിരിച്ചുവിടുകയും ചെയ്തിരുന്നു. വ്യാജ ബോംബ് ഭീഷണികൾ സാധാരണമാണെങ്കിലും ഇത്രയും കുറഞ്ഞ സമയത്തിനുള്ളിൽ നിരവധി ഭീഷണികൾ ഉണ്ടാകുന്നത് അസാധാരണമാണെന്ന് അധികൃതർ ചൂണ്ടിക്കാട്ടുന്നു.
ഭീഷണികൾക്ക് പിന്നിൽ ആരാണെന്ന കാര്യത്തിൽ വ്യക്തമായ വിവരമില്ല. യൂറോപ്പിലെ ഭൗമരാഷ്ട്രീയ സംഘർഷങ്ങൾ വർധിക്കുന്നതിനിടെയാണ് സംഭവങ്ങൾ. റഷ്യ യൂറോപ്പിൽ ഹൈബ്രിഡ് ഭീഷണികൾ ശക്തമാക്കാൻ സാധ്യതയുണ്ടെന്ന മുന്നറിയിപ്പുകളും അധികൃതർ നൽകിയിട്ടുണ്ട്. എന്നാൽ വിമാനങ്ങൾക്ക് ലഭിച്ച ഭീഷണികൾക്ക് പിന്നിൽ ഏതെങ്കിലും രാജ്യത്തിനോ സംഘടനയ്ക്കോ പങ്കുണ്ടെന്നതിന് ഇതുവരെ തെളിവുകളൊന്നും ലഭിച്ചിട്ടില്ല.
റോമിലെ വിമാനത്താവള അധികൃതർക്ക് വ്യാഴാഴ്ച ലഭിച്ച ഭീഷണി സന്ദേശം സ്വയം ഫെമിനിസ്റ്റ് വിരുദ്ധരെന്ന് വിശേഷിപ്പിക്കുന്ന ഒരു സംഘം അയച്ചതാണെന്ന് അവകാശപ്പെട്ടിരുന്നു. 'ഫെമിനിസ്റ്റ് ഭരണകൂടത്തെ' ലക്ഷ്യമിടുന്നതായും സന്ദേശത്തിൽ പറഞ്ഞിരുന്നു. സമാനമായ വാക്കുകളുള്ള ഭീഷണി മറ്റൊരു യൂറോപ്യൻ വിമാനത്താവളത്തിനും ലഭിച്ചെങ്കിലും രണ്ടും ഒരേ ഉറവിടത്തിൽനിന്നാണോ എന്നത് വ്യക്തമല്ല. വ്യാജ ബോംബ് ഭീഷണികൾ പൈലറ്റുമാർക്കും ജീവനക്കാർക്കും അനാവശ്യ സമ്മർദം സൃഷ്ടിക്കുന്നുണ്ടെങ്കിലും ഇത്തരം സാഹചര്യങ്ങൾ നേരിടാൻ വിമാന ജീവനക്കാർക്ക് പരിശീലനം ലഭിച്ചിട്ടുണ്ടെന്ന് യൂറോപ്യൻ കോക്ക്പിറ്റ് അസോസിയേഷൻ വൈസ് പ്രസിഡന്റ് പോൾ റ്യൂട്ടർ പറഞ്ഞു. അടിയന്തര നടപടിക്രമങ്ങൾ പരിശോധിക്കുകയും വിമാനം വഴിതിരിച്ചുവിടേണ്ടിവന്നാൽ ഇറക്കാവുന്ന വിമാനത്താവളങ്ങൾ മുൻകൂട്ടി കണ്ടെത്തുകയും അധിക ഇന്ധനം കരുതുകയും ചെയ്യാറുണ്ടെന്നും അദ്ദേഹം വ്യക്തമാക്കി.
മാധ്യമസ്ഥാപനങ്ങൾക്കും സുരക്ഷാ ഭീഷണി
അയർലൻഡിലെ ദേശീയ പ്രക്ഷേപണ സ്ഥാപനമായ ആർടിഇയുടെ ഡബ്ലിൻ ആസ്ഥാനത്ത് വെള്ളിയാഴ്ച ബോംബ് ഭീഷണിയെത്തുടർന്ന് ജീവനക്കാരെ ഒഴിപ്പിച്ചു. തത്സമയ സംപ്രേഷണങ്ങൾക്കുപകരം മുൻകൂട്ടി റെക്കോർഡ് ചെയ്ത പരിപാടികളാണ് പിന്നീട് സംപ്രേഷണം ചെയ്തത്. അയർലൻഡിലും യൂറോപ്പിലുമുള്ള മാധ്യമസ്ഥാപനങ്ങൾക്കെതിരെ ഭീഷണി ലഭിച്ചതായി അറിയാമെന്നും സംഭവത്തിൽ അന്വേഷണം നടത്തുമെന്നും അയർലൻഡ് പൊലീസ് അറിയിച്ചു. ബ്രിട്ടൻ ആസ്ഥാനമായ സ്കൈ മാധ്യമസ്ഥാപനത്തിനും സുരക്ഷാ ഭീഷണി ലഭിച്ചു. ജീവനക്കാരുടെയും പ്രവർത്തനങ്ങളുടെയും സുരക്ഷ ഉറപ്പാക്കാൻ അധികൃതരുമായി സഹകരിച്ച് പ്രവർത്തിക്കുകയാണെന്ന് സ്കൈ അറിയിച്ചു. സ്കൈ ന്യൂസിന്റെ സംപ്രേഷണം തടസ്സപ്പെട്ടില്ല.
ഈ സംഭവങ്ങൾ തമ്മിൽ ബന്ധമുണ്ടോയെന്ന് വ്യക്തമല്ല. ഇത്തരം പ്രവർത്തനങ്ങളിലൂടെ ഭീതിയും ആശങ്കയും സൃഷ്ടിച്ച് സമൂഹത്തിന്റെ സാധാരണ പ്രവർത്തനങ്ങളെ തടസ്സപ്പെടുത്തുന്നത് എത്ര എളുപ്പമാണെന്ന് ഭീഷണികൾ തെളിയിക്കുന്നതായി അയർലൻഡ് പ്രധാനമന്ത്രി മിഹോൾ മാർട്ടിൻ പ്രതികരിച്ചു. അടുത്തയാഴ്ച ഡബ്ലിനിൽ യൂറോപ്യൻ പൊളിറ്റിക്കൽ കമ്മ്യൂണിറ്റിയുടെയും യൂറോപ്യൻ യൂണിയൻ നേതാക്കളുടെയും യോഗങ്ങൾ നടക്കാനിരിക്കെ ശക്തമായ സുരക്ഷാ ക്രമീകരണങ്ങൾ ഏർപ്പെടുത്തുമെന്നും അദ്ദേഹം അറിയിച്ചു.