വാഷിംഗ്ടൺ: ചൈനീസ് പ്രസിഡന്റ് ഷി ജിൻപിംഗിന് വൈറ്റ് ഹൗസിൽ ഊഷ്മള വരവേൽപ്പ് നൽകി അമേരിക്കൻ പ്രസിഡന്റ് ഡൊണാൾഡ് ട്രംപ്. ഒരു പതിറ്റാണ്ടിനു ശേഷമാണ് ഒരു ചൈനീസ് ഭരണാധികാരി വൈറ്റ് ഹൗസിലേക്ക് ഔദ്യോഗിക സന്ദർശനം നടത്തുന്നത്. മൂന്ന് ദിവസത്തെ യുഎസ് സന്ദർശനത്തിനെത്തിയ ഷി ജിൻപിംഗിനെ സൈനിക ഗാർഡ് ഓഫ് ഓണറും ഫ്ലൈ ഓവറും നൽകിയാണ് ട്രംപ് സൗത്ത് ലോണിൽ സ്വീകരിച്ചത്. ഷി ജിൻപിംഗുമായുള്ള വ്യക്തിബന്ധം 'വളരെ മികച്ച സുഹൃദ്ബന്ധ'മാണെന്ന് പ്രശംസിച്ച ട്രംപ്, ഇരുരാജ്യങ്ങളും ഒന്നിച്ച് നിർണ്ണായക പുരോഗതി കൈവരിച്ചിട്ടുണ്ടെന്നും വ്യക്തമാക്കി.
സൗഹൃദത്തിന്റെ പ്രതീകമായി ചൈനയിൽ നിന്ന് രണ്ട് പുതിയ ഭീമൻ പാണ്ടകളെ ഉടൻ യുഎസ് മൃഗശാലയിലേക്ക് അയക്കുമെന്ന് ഷി ജിൻപിംഗ് പ്രഖ്യാപിച്ചു. അതേസമയം, ആർട്ടിഫിഷ്യൽ ഇന്റലിജൻസ് (സൂപ്പർ ഇന്റലിജൻസ്), തായ്വാൻ വിഷയങ്ങൾ, വാണിജ്യ തർക്കങ്ങൾ എന്നിവ ഉൾപ്പെടെയുള്ള സുപ്രധാന വിഷയങ്ങൾ ഇരുനേതാക്കളും ചർച്ച ചെയ്തു. എഐ സാങ്കേതികവിദ്യ എപ്പോഴും മനുഷ്യനിയന്ത്രണത്തിലായിരിക്കണമെന്ന് ഷി ജിൻപിംഗ് ആവശ്യപ്പെട്ടു. തായ്വാനിലേക്കുള്ള യുഎസ് ആയുധ വിൽപന സംബന്ധിച്ച നിലപാടുകൾ മുൻനിർത്തി ചർച്ചകളിൽ കൂടുതൽ ആനുകൂല്യങ്ങൾ നേടാനാണ് ചൈന ശ്രമിക്കുന്നതെന്ന് അന്താരാഷ്ട്ര നിരീക്ഷകർ വിലയിരുത്തുന്നു.
