വാഷിംഗ്ടൺ: യുഎസ് ഇടക്കാല തെരഞ്ഞെടുപ്പ് (Midterms) അടുത്തുവരവെ പ്രസിഡന്റ് ഡൊണാൾഡ് ട്രംപിനും റിപ്പബ്ലിക്കൻ പാർട്ടിക്കും തിരിച്ചടിയായി യുവ പുരുഷ വോട്ടർമാരുടെ പിന്തുണയിൽ വൻ ഇടിവ്. 2024-ലെ പ്രസിഡന്റ് തെരഞ്ഞെടുപ്പിൽ ട്രംപിന്റെ വിജയത്തിൽ നിർണ്ണായക പങ്കുവഹിച്ച 18-നും 29-നും ഇടയിൽ പ്രായമുള്ള പുരുഷ വോട്ടർമാരാണ് നിലവിൽ അദ്ദേഹത്തിന്റെ ഭരണത്തിൽ കടുത്ത അതൃപ്തി രേഖപ്പെടുത്തുന്നത്.
രണ്ടാം ഊഴത്തിൽ ജീവിതച്ചെലവ് ക്രമാതീതമായി ഉയർന്നതും, വിലക്കയറ്റവും, ഇറാനുമായുള്ള യുദ്ധത്തിൽ അമേരിക്ക പങ്കാളിയായതുമാണ് യുവാക്കളെ ട്രംപിൽ നിന്നകറ്റുന്ന പ്രധാന ഘടകങ്ങൾ. 2024-ൽ ഈ പ്രായപരിധിയിലെ 55 ശതമാനത്തിലധികം പുരുഷന്മാരും ട്രംപിനൊപ്പമായിരുന്നു. എന്നാൽ സമീപകാല പോളിംഗ് പ്രകാരം ഇവർക്കിടയിൽ ട്രംപിന്റെ സ്വാധീനം വലിയ തോതിൽ ഇടിഞ്ഞതായി പ്രമുഖ തിങ്ക് ടാങ്കായ 'തേർഡ് വേ' (Third Way) വ്യക്തമാക്കുന്നു. ഹാർവാർഡ് യൂത്ത് പോൾ അനുസരിച്ച്, വോട്ട് ചെയ്യാൻ പോകുന്ന മൂന്നിൽ രണ്ട് യുവാക്കളും ട്രംപിനെയും അദ്ദേഹത്തിന്റെ നയങ്ങളെയും എതിർക്കുകയെന്ന ലക്ഷ്യത്തോടെയാണ് പോളിംഗ് ബൂത്തിലേക്ക് നീങ്ങുന്നത്.
അതേസമയം, ട്രംപിൽ നിന്നുള്ള യുവാക്കളുടെ കൊഴിഞ്ഞുപോക്ക് ഡെമോക്രാറ്റിക് പാർട്ടിക്ക് വോട്ടായി മാറുമോ എന്ന കാര്യത്തിൽ ഇപ്പോഴും അനിശ്ചിതത്വം നിലനിൽക്കുന്നുണ്ട്. മിഡ്‌ടേം തെരഞ്ഞെടുപ്പുകളിൽ യുവാക്കളുടെ പോളിംഗ് ശതമാനം പൊതുവെ കുറവായതിനാൽ, വോട്ട് ബഹിഷ്കരിക്കാനുള്ള സാധ്യതയും രാഷ്ട്രീയ നിരീക്ഷകർ കാണുന്നു. യുവാക്കളുടെ വോട്ടുകൾ പിടിക്കാനായി സോഷ്യൽ മീഡിയയിലൂടെ ഇരു പാർട്ടികളും വ്യക്തിഹത്യകൾ നിറഞ്ഞ വലിയ പ്രചാരണ പോരാട്ടമാണ് നിലവിൽ അഴിച്ചുവിട്ടിരിക്കുന്നത്.
