ഒട്ടാവ: അമേരിക്കയുമായി വ്യാപാര കരാറിലെത്താൻ കഴിയാതെ വന്നതിനെ തുടർന്ന് ഇരുരാജ്യങ്ങളും തമ്മിലുള്ള വ്യാപാര തർക്കം രൂക്ഷമായി. അമേരിക്ക കാനഡയിൽ നിന്നുള്ള വിവിധ ഉൽപ്പന്നങ്ങൾക്ക് 50 ശതമാനം വരെ തീരുവ ഏർപ്പെടുത്തിയതിന് പിന്നാലെ, ഇത് അമേരിക്ക ആരംഭിച്ച “വ്യാപാര യുദ്ധം” ആണെന്ന് കനേഡിയൻ പ്രധാനമന്ത്രി മാർക്ക് കാർണി പ്രഖ്യാപിച്ചു. “ആക്രമിക്കപ്പെടുമ്പോഴാണ് യുദ്ധത്തിലാകുന്നത്. ഞങ്ങൾ ആക്രമിക്കപ്പെട്ടു,” ശനിയാഴ്ച കാർണി പറഞ്ഞു.
കാനഡയിൽ നിന്നുള്ള ഏകദേശം 20 ബില്യൺ ഡോളർ മൂല്യമുള്ള ഉൽപ്പന്നങ്ങൾക്കാണ് പുതിയ 50 ശതമാനം തീരുവ ബാധിക്കുക. വൈൻ, ഹോക്കി സ്റ്റിക്കുകൾ, സിമന്റ് തുടങ്ങിയ ഉൽപ്പന്നങ്ങളും ഇതിൽ ഉൾപ്പെടും. ഇരുരാജ്യങ്ങളും തമ്മിലുള്ള ചർച്ചകൾ അവസാന നിമിഷം വരെ പുരോഗമിച്ചിരുന്നെങ്കിലും അന്തിമ കരാറിലെത്താൻ സാധിച്ചില്ല. കാനഡ പുതിയ ആവശ്യങ്ങൾ മുന്നോട്ടുവെച്ചതും നേരത്തെ അംഗീകരിച്ച ചില പ്രതിബദ്ധതകളിൽ നിന്ന് പിന്നോട്ടുപോയതുമാണ് ചർച്ചകൾ പരാജയപ്പെടാൻ കാരണമെന്ന് യുഎസ് ട്രേഡ് റെപ്രസന്റേറ്റീവ് ജാമീസൺ ഗ്രീർ ആരോപിച്ചു. “ഈ ആഴ്ച ആദ്യം കൈവരിച്ച ധാരണയുടെ സൂക്ഷ്മമായ സന്തുലിതാവസ്ഥ കാനഡയുടെ പുതിയ ആവശ്യങ്ങളും ചില പ്രതിബദ്ധതകളിൽ നിന്നുള്ള പിന്മാറ്റവും തകർത്തു,” ഗ്രീർ പറഞ്ഞു.
അമേരിക്കൻ ഉൽപ്പന്നങ്ങൾക്കും ബിസിനസുകൾക്കുമെതിരെ കാനഡ “ഗണ്യമായ തിരിച്ചടി നടപടികളും വിവേചനപരമായ നടപടികളും” സ്വീകരിച്ചതിനുള്ള മറുപടിയാണ് പുതിയ തീരുവയെന്നാണ് ട്രംപ് ഭരണകൂടത്തിന്റെ വിശദീകരണം. അതേസമയം, അമേരിക്കയുടെ തീരുവയ്ക്ക് കാനഡയും തുല്യമായ തിരിച്ചടി നൽകുമെന്ന് കാർണി വ്യക്തമാക്കി. “ഞങ്ങളുടെ തൊഴിലാളികളെയും ബിസിനസുകളെയും സംരക്ഷിക്കുന്നതിനായി അമേരിക്ക ഏർപ്പെടുത്തുന്ന തീരുവയ്ക്ക് ഡോളറിന് ഡോളർ എന്ന നിലയിൽ കാനഡയും മറുപടി നൽകും,” അദ്ദേഹം പറഞ്ഞു. കാനഡയിലെ തൊഴിലാളികൾക്കും ബിസിനസുകൾക്കും കൂടുതൽ പിന്തുണ നൽകുന്നതിനായി അടുത്ത ദിവസങ്ങളിൽ അധിക നടപടികൾ പ്രഖ്യാപിക്കുമെന്നും കാർണി അറിയിച്ചു. കഴിഞ്ഞ 18 മാസത്തിനിടെ സർക്കാർ ഏകദേശം 25 ബില്യൺ ഡോളറിന്റെ പിന്തുണ ഇതിനകം നൽകിയിട്ടുണ്ടെന്നും അദ്ദേഹം പറഞ്ഞു.
യുഎസ് പ്രസിഡന്റ് ഡൊണാൾഡ് ട്രംപ് ആദ്യം ബുധനാഴ്ചയായിരുന്നു ഇരുരാജ്യങ്ങളും ധാരണയിലെത്താനുള്ള സമയപരിധിയായി നിശ്ചയിച്ചിരുന്നത്. എന്നാൽ അവസാന നിമിഷ ചർച്ചകളിൽ പുരോഗതിയുണ്ടായതിനെ തുടർന്ന് സമയപരിധി ശനിയാഴ്ച വരെ നീട്ടുകയായിരുന്നു. കരാർ പരാജയപ്പെട്ടതോടെ അമേരിക്ക–കാനഡ വ്യാപാര ബന്ധത്തിൽ പുതിയ സംഘർഷഘട്ടമാണ് രൂപപ്പെട്ടിരിക്കുന്നത്. ഇരു രാജ്യങ്ങളും പരസ്പരം തീരുവ ഏർപ്പെടുത്തുന്നത് തുടർന്നാൽ തൊഴിലാളികൾക്കും ബിസിനസുകൾക്കും ഉപഭോക്താക്കൾക്കും കൂടുതൽ സാമ്പത്തിക സമ്മർദ്ദം നേരിടേണ്ടിവരുമെന്ന ആശങ്കയും ഉയർന്നിട്ടുണ്ട്.