തിരുവനന്തപുരം: കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന പദ്ധതിയുടെ അന്തിമ രൂപരേഖ തയാറാക്കുന്നതിനുള്ള ചുമതല ഗതാഗത വകുപ്പ് മുഖ്യമന്ത്രിക്കു വിട്ടു. ഇതുസംബന്ധിച്ച് മുഖ്യമന്ത്രി വൈകാതെ തന്നെ അടിയന്തര യോഗം വിളിച്ച് തീരുമാനമെടുക്കും. മുൻപ് പ്രഖ്യാപിച്ചതുപോലെ വരും ജൂൺ 15-ഓടെ പദ്ധതിക്ക് തുടക്കം കുറിക്കാനാണ് സർക്കാർ ലക്ഷ്യമിടുന്നത്. കെഎസ്ആർടിസി സമർപ്പിച്ച കൃത്യമായ പഠന റിപ്പോർട്ടുകൾ വിവിധ തലങ്ങളിൽ ചർച്ച ചെയ്ത ശേഷമാണ് വിഷയം മുഖ്യമന്ത്രിയുടെ പരിഗണനയ്ക്ക് വിട്ടത്. സംസ്ഥാനത്തെ എല്ലാ സ്ത്രീകൾക്കും പദ്ധതിയുടെ ആനുകൂല്യം ലഭ്യമാക്കുമെന്ന് ഗതാഗത മന്ത്രി സി.പി. ജോൺ നേരത്തെ വ്യക്തമാക്കിയിരുന്നു.
ഏതൊക്കെ ബസുകളിൽ പദ്ധതി നടപ്പാക്കിയാൽ എത്ര തുക വീതം അധിക ചിലവ് വരുമെന്ന കണക്കുകൾ കെഎസ്ആർടിസി സർക്കാരിന് കൈമാറിയിട്ടുണ്ട്. ഇതനുസരിച്ച് അടുത്ത 3 മാസത്തെ നഷ്ടം കണക്കാക്കുന്നത് ഇങ്ങനെയാണ്:
മുഴുവൻ ബസുകളിലും സൗജന്യമാക്കിയാൽ: 112 കോടി രൂപ
ഓർഡിനറി ബസുകളിൽ മാത്രം നടപ്പാക്കിയാൽ: 57 കോടി രൂപ
ഓർഡിനറി, സിറ്റി ഫാസ്റ്റ് ബസുകളിൽ നടപ്പാക്കിയാൽ: 65 കോടി രൂപ
ഓർഡിനറി, ഫാസ്റ്റ് പാസഞ്ചർ, സൂപ്പർ ഫാസ്റ്റ് ബസുകളിൽ നടപ്പാക്കിയാൽ: 90 കോടി രൂപ
നിലവിൽ കെഎസ്ആർടിസിക്ക് ശമ്പളത്തിനും പെൻഷനുമായി നൽകുന്ന സാമ്പത്തിക സഹായത്തിന് പുറമെ ഈ തുക കൂടി സർക്കാർ അധികമായി നൽകേണ്ടി വരും. നിലവിൽ പ്രതിദിനം 10 മുതൽ 12 ലക്ഷം വരെ സ്ത്രീകളാണ് കെഎസ്ആർടിസിയെ ആശ്രയിക്കുന്നത്. പദ്ധതി വരുന്നതോടെ യാത്രാക്കാരുടെ എണ്ണത്തിൽ വൻ വർദ്ധനവുണ്ടാകുമെന്നാണ് പ്രതീക്ഷ. എന്നാൽ, സർക്കാർ ഏത് രീതി തിരഞ്ഞെടുത്താലും ആ തുക മുൻകൂറായി കെഎസ്ആർടിസിക്ക് കൈമാറിയാൽ മാത്രമേ പദ്ധതി വിജയകരമായി മുന്നോട്ട് കൊണ്ടുപോകാൻ സാധിക്കൂ എന്ന് മാനേജ്മെന്റ് അറിയിച്ചിട്ടുണ്ട്.
