കേരളത്തിന്റെ 'ഇലക്ട്രോണിക് സിറ്റി'യായി പെരുമ്പാവൂർ മാറുമെന്ന് വ്യവസായ വകുപ്പ് മന്ത്രി പി.രാജീവ്. പെരുമ്പാവൂർ വല്ലത്തെ കിൻഫ്ര ഇൻഡസ്ട്രിയൽ പാർക്കിൽ പ്രവർത്തനമാരംഭിച്ച കെയ്ൻസ് ടെക്നോളജിസിന്റെ ആദ്യ ഉൽപാദന യൂണിറ്റിന്റെ ഉദ്ഘാടനവും അടുത്ത ഘട്ടത്തിന്റെ ശിലാസ്ഥാപനവും നടത്തി സംസാരിക്കുകയായിരുന്നു അദ്ദേഹം.
ഒരു ഇലക്ട്രോണിക് നഗരമായി മാറാനുള്ള പെരുമ്പാവൂരിന്റെ യാത്രയുടെ തുടക്കമാണ് ഇവിടെ നടന്നത്. അഭിമാനകരമായ നിമിഷം ആണിത്. 25 വർഷങ്ങളായി അടഞ്ഞുകിടന്ന ട്രാവൻകൂർ റയോൺസിൽ ഇത്തരം ഒരു മാറ്റം വരുമെന്ന് വരുമെന്ന് നാട്ടുകാർ വരെ വിശ്വസിച്ചിരുന്നില്ല. പറയുന്ന കാര്യങ്ങൾ നടപ്പിലാക്കാനുള്ള ഒരു ഭരണകൂടത്തിന്റെ ഇച്ഛാശക്തിയാണ് ഇവിടെ തെളിയുന്നത്.
മുഖ്യമന്ത്രി പിണറായി വിജയന്റെ നേതൃത്വപരമായ ഇടപെടൽ വഴിയാണ് റയോൺസിന്റെ 30 ഏക്കർ ഭൂമി കിൻഫ്രയ്ക്ക് ലഭ്യമായത്. അവിടെയാണ് ഇപ്പോൾ ഇന്ത്യയിലെ പ്രമുഖ ഇലക്ട്രോണിക്സ് സിസ്റ്റം ആൻഡ് ഡിസൈൻ മാനുഫാക്ചറിംഗ് കമ്പനിയായ കെയ്ൻസ് ടെക്നോളജി പ്രവർത്തനം ആരംഭിച്ചിരിക്കുന്നത്.
350 കോടിയുടെ നിക്ഷേപമാണ് കമ്പനി നടത്തുന്നത്. ഒരു സംരംഭത്തിന്റെ ശിലാസ്ഥാപനത്തോട് അനുബന്ധിച്ച് തന്നെ ഉൽപ്പന്നങ്ങൾ പുറത്തിറക്കാൻ കഴിയുന്നു എന്നത് എടുത്തു പറയേണ്ട കാര്യമാണ്. റയോൺസിൽ നിലവിലുണ്ടായിരുന്ന ഒരു കെട്ടിടസമുച്ചയം നവീകരിച്ചാണ് ആദ്യ പ്രൊഡക്ഷൻ യൂണിറ്റ് ഒരുക്കിയത്. ഇവിടെ നിന്ന് 100 കമ്പ്യൂട്ടറുകളാണ് ആണ് പുറത്തിറക്കിയത്.
വിപുലമായ ക്രമീകരണങ്ങളോടെയുള്ള അടുത്ത യൂണിറ്റിന്റെ നിർമ്മാണം എട്ടുമാസത്തിനുള്ളിൽ പൂർത്തീകരിക്കും. അതിന്റെ തുടർച്ചയിൽ മറ്റൊരു യൂണിറ്റ് കൂടി വരും. 2025 ഫെബ്രുവരിയില് കൊച്ചിയില് സംഘടിപ്പിച്ച ഇന്വെസ്റ്റ് കേരള ഗ്ലോബല് സമ്മിറ്റിന്റെ ഭാഗമായാണ് ഇത്തരത്തിൽ ഒരു വലിയ നിക്ഷേപം സാധ്യമായത്. റയോൺസിന്റെ ഭാഗമായ 15 ഏക്കർ ഭൂമി കൂടി കിൻഫ്രക്ക് ലഭ്യമാക്കാനുള്ള നടപടികൾ പുരോഗമിക്കുന്നതായും മന്ത്രി പറഞ്ഞു.
വ്യവസായങ്ങൾ വരുമ്പോൾ ഒരു നാടിന്റെ വളർച്ച കൂടി സാധ്യമാകും. കൂടുതൽ തൊഴിലവസരങ്ങൾ സൃഷ്ടിക്കുന്നത് വഴി നാട്ടിലെ കുട്ടികൾക്ക് പുറത്തുപോകാതെ ഇവിടെ ജോലി ചെയ്യാനുള്ള സാഹചര്യം ഒരുങ്ങും. റിവേഴ്സ് മൈഗ്രേഷന്റെ കാലമാണ് ഇതെന്നും കൂടുതൽ വ്യവസായങ്ങൾക്കും സംരംഭങ്ങൾക്കും അവസരം ഒരുക്കുക എന്നതാണ് സർക്കാരിന്റെ പ്രധാന ലക്ഷ്യമെന്നും മന്ത്രി പറഞ്ഞു.
ചടങ്ങിൽ എ.ഐ ക്യാമറ നിര്മ്മാണവുമായി ബന്ധപ്പെട്ട് കെല്ട്രോണും കെയ്ൻസ് ടെക്നോളജീസും തമ്മിൽ ധാരണാപത്രം ഒപ്പുവെച്ചു.
പെരുമ്പാവൂർ കിൻഫ്ര ഇൻഡസ്ട്രിയൽ പാർക്കിൽ നടന്ന ചടങ്ങിൽ എൽദോസ് പി. കുന്നപ്പിള്ളിൽ എം.എൽ.എ അധ്യക്ഷത വഹിച്ചു. പെരുമ്പാവൂർ നഗരസഭ ചെയർപേഴ്സൺ കെ.എൻ സംഗീത, വൈസ് ചെയർമാൻ ബിജു ജോൺ ജേക്കബ്, മുൻ എം.എൽ.എ സാജു പോൾ, കെൽട്രോൺ എം.ഡി വൈസ് അഡ്മിറൽ ശ്രീകുമാർ നായർ, കിൻഫ്ര മാനേജിംഗ് ഡയറക്ടർ സന്തോഷ് കോശി തോമസ്, നഗരസഭ കൗൺസിലർമാരായ വി.പി ബാബു, ഷാജി കുന്നത്താൻ, നജീബ്, കെയ്ൻസ് ഫൗണ്ടർ രമേശ് കുഞ്ഞിക്കണ്ണൻ, ചെയർപേഴ്സൺ സവിത രമേശ്, എം.ഡി ഡോ. മുത്തുകുമാർ നാരായണ സ്വാമി, പ്രസിഡന്റ് കെ വിശ്വനാഥൻ, സീനിയർ വൈസ് പ്രസിഡന്റ് ദീപക് സ്ലീബ ജോർജ് തുടങ്ങിയവർ പങ്കെടുത്തു.
