മലയാള സിനിമയിലെ എക്കാലത്തെയും വലിയ ഫ്രാഞ്ചൈസികളിലൊന്നായ 'ആട്' മൂന്നാം ഭാഗത്തിലൂടെ ബോക്സ് ഓഫീസിൽ ചരിത്രം കുറിക്കുന്നു. മിഥുൻ മാനുവൽ തോമസ് - ജയസൂര്യ കൂട്ടുകെട്ടിൽ പുറത്തിറങ്ങിയ 'ആട് 3 പാർട്ട് 1: വൺ ലാസ്റ്റ് റൈഡ്' റിലീസ് ചെയ്ത് വെറും മൂന്ന് ദിനങ്ങൾ പിന്നിടുമ്പോൾ 68 കോടി രൂപയാണ് ആഗോളതലത്തിൽ സ്വന്തമാക്കിയത്. ജയസൂര്യയുടെ കരിയറിലെ ഏറ്റവും വലിയ ഓപ്പണിംഗ് കളക്ഷനും ഹിറ്റുമായി ഈ ചിത്രം ഇതിനോടകം മാറിക്കഴിഞ്ഞു.
കേരളത്തിൽ നിന്ന് മാത്രം 20 കോടിയിലധികം ഗ്രോസ് കളക്ഷൻ നേടിയ ചിത്രം ഗൾഫ് നാടുകളിലും മികച്ച മുന്നേറ്റമാണ് നടത്തുന്നത്. യുഎഇ ഉൾപ്പെടെയുള്ള ജിസിസി മാർക്കറ്റുകളിൽ നിന്ന് ആദ്യ രണ്ട് ദിനം കൊണ്ട് തന്നെ 20 കോടി ഗ്രോസ് മറികടക്കാൻ ചിത്രത്തിന് സാധിച്ചു. നിലവിലെ കണക്കുകൾ പ്രകാരം, ആദ്യ നാല് ദിവസത്തെ വീക്കെൻഡ് കഴിയുമ്പോൾ ആഗോള ഗ്രോസ് 90 കോടിയിലേക്ക് എത്തുമെന്നാണ് അനലിസ്റ്റുകൾ വിലയിരുത്തുന്നത്. ഇതോടെ മോഹൻലാൽ ചിത്രം 'എമ്പുരാന്' പിന്നാലെ ഏറ്റവും വലിയ ആദ്യ വീക്കെൻഡ് കളക്ഷൻ നേടുന്ന രണ്ടാമത്തെ മലയാള ചിത്രമായി ആട് 3 മാറി.
മാർച്ച് 19-ന് തിയേറ്ററുകളിലെത്തിയ ഈ ബിഗ് ബഡ്ജറ്റ് ഫാന്റസി ചിത്രം അഞ്ചാം ദിവസം കൊണ്ട് തന്നെ 100 കോടി ക്ലബ്ബിൽ ഇടംപിടിക്കുമെന്നാണ് സൂചന. ഫ്രൈഡേ ഫിലിം ഹൗസും കാവ്യ ഫിലിം കമ്പനിയും ചേർന്ന് നിർമ്മിച്ച ഈ ചിത്രം മുൻ ഭാഗങ്ങളെക്കാൾ വലിയ ആവേശമാണ് പ്രേക്ഷകർക്കിടയിൽ ഉണ്ടാക്കിയിരിക്കുന്നത്. ജയസൂര്യയുടെ കരിയറിലെ ഏറ്റവും വലിയ ബോക്സ് ഓഫീസ് വിജയമായി ആട് 3 മാറിക്കഴിഞ്ഞു.