ഡെറാഡൂൺ/ന്യൂഡൽഹി: ഉത്തരാഖണ്ഡിൽ ചൊവ്വാഴ്ച രാത്രി റിക്ടർ സ്കെയിലിൽ 4.9 തീവ്രത രേഖപ്പെടുത്തിയ ഭൂചലനം ഉണ്ടായി. രാത്രി 10:15 ഓടെയാണ് ഭൂകമ്പം അനുഭവപ്പെട്ടതെന്നും ഉത്തരാഖണ്ഡിലെ ചമോലിയാണ് പ്രഭവകേന്ദ്രമെന്നും നാഷണൽ സെന്റർ ഫോർ സീസ്മോളജി സ്ഥിരീകരിച്ചു. ഭൂമിക്കടിയിൽ 13 കിലോമീറ്റർ ആഴത്തിലാണ് പ്രകമ്പനത്തിന്റെ പ്രഭവകേന്ദ്രം രേഖപ്പെടുത്തിയിരിക്കുന്നത്.
ഭൂചലനത്തെത്തുടർന്ന് ഡൽഹി, നോയിഡ, ഗുരുഗ്രാം ഉൾപ്പെടെയുള്ള ദേശീയ തലസ്ഥാന മേഖലയിലും (Delhi-NCR) ഹിമാചൽ പ്രദേശ്, പഞ്ചാബ്, ഹരിയാന എന്നീ സംസ്ഥാനങ്ങളുടെ വിവിധ ഭാഗങ്ങളിലും പ്രകമ്പനം അനുഭവപ്പെട്ടു. പ്രകമ്പനത്തെ തുടർന്ന് ബഹുനില ഫ്ലാറ്റുകളിൽ നിന്നും വീടുകളിൽ നിന്നും ആളുകൾ പരിഭ്രാന്തരായി തുറസ്സായ സ്ഥലങ്ങളിലേക്ക് ഓടിയിറങ്ങി. നിമിഷങ്ങൾ നീണ്ടുനിന്ന ശക്തമായ കുലുക്കമാണ് അനുഭവപ്പെട്ടതെന്ന് ആളുകൾ സമൂഹമാധ്യമങ്ങളിൽ കുറിച്ചു. 4.9 തീവ്രത രേഖപ്പെടുത്തിയതിനാൽ ഇത് ലഘുവായ ഭൂകമ്പത്തിന്റെ പരിധിയിലാണ് ഉൾപ്പെടുന്നത്. സംഭവത്തിൽ നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ല. നേരത്തെ ചൊവ്വാഴ്ച പുലർച്ചെ 4:30 ഓടെ അസമിലെ നാഗോണിലും 4.5 തീവ്രത രേഖപ്പെടുത്തിയ ഭൂചലനം ഉണ്ടായിരുന്നു.
