ദുബായ്: യുണൈറ്റഡ് അറബ് എമിറേറ്റ്സ് (യു.എ.ഇ.) വ്യോമപാതയിൽ ഏർപ്പെടുത്തിയിരുന്ന നിയന്ത്രണങ്ങൾ സിവിൽ ഏവിയേഷൻ മന്ത്രാലയം പൂർണ്ണമായും നീക്കി. ഇതോടെ യു.എ.ഇ.യിലേക്കും തിരിച്ചുമുള്ള വിമാന സർവീസുകൾ ഉടൻ സാധാരണ നിലയിലാകും. പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ ഏർപ്പെടുത്തിയ നിയന്ത്രണങ്ങളാണ് നീക്കിയത്. ഇത് ഇന്ത്യയിൽ നിന്നുള്ള വിമാനക്കമ്പനികൾക്കും പതിനായിരക്കണക്കിന് പ്രവാസികൾക്കും വലിയ ഗുണകരമാകും.
വ്യോമപാത സാധാരണ നിലയിലായതോടെ കേരളത്തിലെ നാല് വിമാനത്താവളങ്ങളിലേക്കും കൂടുതൽ സർവീസുകൾ ഉടൻ പുനരാരംഭിക്കും. നിലവിൽ പരിമിതമായ സർവീസുകൾ മാത്രം ലഭ്യമായിരുന്ന കോഴിക്കോട് ഉൾപ്പെടെയുള്ള വിമാനത്താവളങ്ങളിലേക്ക് ഇൻഡിഗോ, സ്പൈസ് ജെറ്റ്, എയർ ഇന്ത്യ എക്സ്പ്രസ് തുടങ്ങിയ കമ്പനികൾ കൂടുതൽ സർവീസുകൾ പ്രഖ്യാപിച്ചേക്കും. വിമാനങ്ങളുടെ എണ്ണം വർദ്ധിക്കുന്നതോടെ സീറ്റുകളുടെ ലഭ്യത പത്തിരട്ടിയോളം വർദ്ധിക്കുമെന്നും ഇത് നിലവിലെ ഉയർന്ന ടിക്കറ്റ് നിരക്ക് ഗണ്യമായി കുറയാൻ കാരണമാകുമെന്നും ട്രാവൽ രംഗത്തെ വിദഗ്ധർ ചൂണ്ടിക്കാട്ടുന്നു.
നിയന്ത്രണങ്ങൾ കാരണം പല വിമാനക്കമ്പനികളും നേരിട്ടുള്ള സർവീസുകൾ വെട്ടിക്കുറയ്ക്കുകയും കണക്ഷൻ ഫ്ലൈറ്റുകളെ ആശ്രയിക്കുകയും ചെയ്തിരുന്നു. ഈ സാഹചര്യം മാറുന്നതോടെ യാത്രക്കാർക്ക് കൂടുതൽ യാത്രാ ഓപ്ഷനുകൾ ലഭിക്കും. സീറ്റുകൾ വർദ്ധിക്കുന്നതോടെ ടിക്കറ്റ് ഡിമാൻഡ് കുറയുന്നത് വരും ദിവസങ്ങളിൽ വിമാന യാത്ര കുറഞ്ഞ ചിലവിൽ സാധ്യമാക്കുമെന്നാണ് പ്രവാസികളുടെ പ്രതീക്ഷ.
