ന്യൂഡൽഹി: കുട്ടികൾക്കിടയിലെ സോഷ്യൽ മീഡിയ ഉപയോഗം നിയന്ത്രിക്കുന്നതിനായി ഓസ്ട്രേലിയ നടപ്പിലാക്കിയ പ്രായപരിധി നിയമത്തെ (സോഷ്യൽ മീഡിയ നിരോധനം) പ്രശംസിച്ച് പ്രധാനമന്ത്രി നരേന്ദ്ര മോദി. മെൽബണിൽ നടന്ന ഇന്ത്യ-ഓസ്ട്രേലിയ ഉഭയകക്ഷി ഉച്ചകോടിയിലാണ്, 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ വിലക്കിയ ഓസ്ട്രേലിയയുടെ നടപടി ലോകത്തിന് തന്നെ മാതൃകയാണെന്നും ഇതിൽ നിന്നും ഇന്ത്യ ഒരുപാട് കാര്യങ്ങൾ പഠിക്കുന്നുണ്ടെന്നും പ്രധാനമന്ത്രി വ്യക്തമാക്കിയത്. ഇൻസ്റ്റാഗ്രാം, ഫേസ്ബുക്ക്, എക്സ്, ടിക് ടോക്, യൂട്യൂബ് തുടങ്ങിയ പ്ലാറ്റ്ഫോമുകൾക്കാണ് ഓസ്ട്രേലിയ രാജ്യവ്യാപക വിലക്കേർപ്പെടുത്തിയത്. കുട്ടികളുടെ ഓൺലൈൻ സുരക്ഷ മുൻനിർത്തി സമാനമായ കടുത്ത പ്രായപരിധി നിയന്ത്രണങ്ങൾ ഇന്ത്യയിലും നടപ്പിലാക്കാൻ കേന്ദ്ര സർക്കാർ ആലോചിക്കുന്നു എന്നതിന്റെ ശക്തമായ സൂചനയായാണ് പ്രധാനമന്ത്രിയുടെ ഈ പ്രസ്താവന വിലയിരുത്തപ്പെടുന്നത്.
ഇന്ത്യയിൽ പ്രായപൂർത്തിയാകാത്തവരുടെ ഇന്റർനെറ്റ് സുരക്ഷയുമായി ബന്ധപ്പെട്ട് ഐടി മന്ത്രാലയവും സോഷ്യൽ മീഡിയ കമ്പനികളും തമ്മിൽ ഇതിനകം തന്നെ ചർച്ചകൾ ആരംഭിച്ചിട്ടുണ്ട്. കർണാടക (16 വയസ്സിന് താഴെ), ആന്ധ്രാപ്രദേശ് (13 വയസ്സിന് താഴെ) തുടങ്ങിയ സംസ്ഥാനങ്ങൾ കുട്ടികൾക്ക് സോഷ്യൽ മീഡിയ നിയന്ത്രിക്കാനുള്ള നിർദ്ദേശങ്ങൾ മുന്നോട്ട് വെച്ചിട്ടുണ്ടെങ്കിലും വാർത്താവിനിമയ നിയമങ്ങൾ നിയന്ത്രിക്കാനുള്ള പൂർണ്ണ അധികാരം കേന്ദ്ര സർക്കാരിനാണ്. ടെലിഗ്രാം, ഇൻസ്റ്റാഗ്രാം തുടങ്ങിയ പ്ലാറ്റ്ഫോമുകൾ വഴി കുട്ടികളെ ചൂഷണം ചെയ്യുന്ന ഉള്ളടക്കങ്ങൾ പ്രചരിക്കുന്നത് തടയാൻ കഴിഞ്ഞ ആഴ്ചകളിലും കേന്ദ്രം കർശന നിർദ്ദേശം നൽകിയിരുന്നു. എന്നാൽ 110 കോടിയിലധികം സ്മാർട്ട്ഫോൺ ഉപഭോക്താക്കളുള്ള, ലോകത്തിലെ ഏറ്റവും വലിയ യുവ ഇന്റർനെറ്റ് ഉപഭോക്തൃ ശൃംഖലയുള്ള ഇന്ത്യയിൽ ഇത്തരം ഒരു നിരോധനം നടപ്പിലാക്കുക എന്നത് കേന്ദ്ര സർക്കാരിന് വലിയ സാങ്കേതിക വെല്ലുവിളിയായിരിക്കും.
