ന്യൂഡൽഹി: പശ്ചിമേഷ്യയിലെ യുദ്ധസാഹചര്യങ്ങളെത്തുടർന്ന് രാജ്യത്ത് പെട്രോൾ, ഡീസൽ വിതരണത്തിന് ഏർപ്പെടുത്തിയിരുന്ന താൽക്കാലിക നിയന്ത്രണങ്ങൾ കേന്ദ്ര സർക്കാർ പൂർണ്ണമായും പിൻവലിച്ചു. പെട്രോളിയം മന്ത്രാലയം തിങ്കളാഴ്ച പുറത്തിറക്കിയ പുതിയ ഉത്തരവ് പ്രകാരം ജൂലൈ 1 മുതൽ രാജ്യത്തെ ഇന്ധന വിതരണം പൂർണ്ണമായും സാധാരണ നിലയിലാകും. കരിഞ്ചന്തയും പൂഴ്ത്തിവെപ്പും തടയുന്നതിനായി ജൂൺ 12-ന് കൊണ്ടുവന്ന അടിയന്തര നിയന്ത്രണങ്ങളാണ് ആഭ്യന്തര വിപണിയിലെ ഇന്ധനലഭ്യത മെച്ചപ്പെട്ടതിനെത്തുടർന്ന് കേന്ദ്രം റദ്ദാക്കിയത്.
പശ്ചിമേഷ്യൻ പ്രതിസന്ധിക്കിടയിലും അന്താരാഷ്ട്ര വിപണിയിലെ വിലക്കയറ്റത്തിൽ നിന്നും സാധാരണക്കാരെ സംരക്ഷിക്കാൻ രാജ്യത്തെ പെട്രോൾ പമ്പുകളിലെ ചില്ലറ വിൽപന വിലയിൽ സർക്കാർ മാറ്റം വരുത്തിയിരുന്നില്ല. എന്നാൽ, ഇതുകാരണം ചില്ലറ വിൽപന വിലയും വൻകിട കമ്പനികൾക്കുള്ള ബൾക്ക് നിരക്കും തമ്മിൽ വലിയ വ്യത്യാസമുണ്ടായി. ഇതോടെ ഫാക്ടറികളും ട്രാൻസ്പോർട്ട് കമ്പനികളും ഉൾപ്പെടെയുള്ള വ്യവസായ-വാണിജ്യ സ്ഥാപനങ്ങൾ റീട്ടെയിൽ പമ്പുകളിൽ നിന്ന് കൂട്ടത്തോടെ ഇന്ധനം വാങ്ങാൻ തുടങ്ങി. ഇത് പലയിടങ്ങളിലും ഇന്ധനക്ഷാമത്തിനും വഴിമാറ്റലിനും കാരണമായ പശ്ചാത്തലത്തിലാണ് ജൂൺ 12-ന് സർക്കാർ നിയന്ത്രണങ്ങൾ കടുപ്പിച്ചത്.
ഇതനുസരിച്ച് ചില്ലറ വിൽപന പമ്പുകളിൽ നിന്ന് വാണിജ്യ സ്ഥാപനങ്ങൾ നേരിട്ട് ഇന്ധനം വാങ്ങുന്നത് വിലക്കുകയും ഒരു വാഹനത്തിന് പ്രതിദിനം നൽകാവുന്ന ഡീസലിന്റെ അളവ് 200 ലിറ്ററായി പരിമിതപ്പെടുത്തുകയും ചെയ്തിരുന്നു. നിലവിൽ ക്രൂഡ് ഓയിൽ വിതരണത്തിലെ തടസ്സങ്ങൾ മാറുകയും ആഭ്യന്തര വിപണി കൂടുതൽ സുസ്ഥിരമാകുകയും ചെയ്തതോടെയാണ് ഈ നിയന്ത്രണങ്ങൾ പിൻവലിക്കാൻ കേന്ദ്ര പെട്രോളിയം മന്ത്രാലയം തീരുമാനിച്ചത്. ഇതോടെ ജൂലൈ ഒന്നു മുതൽ ഗതാഗത കമ്പനികൾക്കും മറ്റ് വ്യവസായങ്ങൾക്കും യാതൊരുവിധ അളവ് നിയന്ത്രണങ്ങളുമില്ലാതെ റീട്ടെയ്ൽ പമ്പുകളിൽ നിന്ന് ഇന്ധനം വാങ്ങാനാകും. കഴിഞ്ഞ ആഴ്ച വാണിജ്യ എൽപിജി (LPG) വിതരണത്തിനുള്ള നിയന്ത്രണങ്ങളും സർക്കാർ സമാനരീതിയിൽ നീക്കിയിരുന്നു.
