മെൽബൺ: ഓസ്ട്രേലിയയിലെ തങ്ങളുടെ മുൻ എക്സ്ക്ലൂസീവ് വിതരണക്കാരായ 'ട്രൂ ഇവി'യുമായുള്ള ഫെഡറൽ കോടതി കേസ് തള്ളിയതിന് പിന്നാലെ, ദുരിതത്തിലായ ഉപഭോക്താക്കൾക്ക് നഷ്ടപരിഹാരവും പിന്തുണയും വാഗ്ദാനം ചെയ്ത് പ്രമുഖ ചൈനീസ് ഇലക്ട്രിക് വാഹന നിർമ്മാതാക്കളായ എക്സ്പെങ് (XPeng). ഇരു കമ്പനികളും തമ്മിലുള്ള തർക്കത്തെത്തുടർന്ന് വാഗ്ദാനം ചെയ്യപ്പെട്ടിരുന്ന അഞ്ച് വർഷത്തെ സൗജന്യ സർവീസിംഗ്, $5,000 ക്യാഷ്ബാക്ക്, സ്പെയർ പാർട്സ് എന്നിവ ലഭിക്കാതെ നൂറുകണക്കിന് ഉപഭോക്താക്കളാണ് പ്രതിസന്ധിയിലായത്. ആവശ്യമായ കോർട്ട് സെക്യൂരിറ്റി തുക കെട്ടിവെക്കാൻ ട്രൂ ഇവിക്ക് കഴിയാതെ വന്നതോടെയാണ് കേസ് കോടതി തള്ളിയത്.
ഓസ്ട്രേലിയൻ ഫ്രീവേകളിൽ വാഹനങ്ങൾ പെട്ടെന്ന് പ്രവർത്തനരഹിതമാകുന്നതുൾപ്പെടെയുള്ള സാങ്കേതിക തകരാറുകൾ നേരിട്ട ഉപഭോക്താക്കൾ വലിയ ആശങ്കയിലാണ്. സർവീസിംഗ് പങ്കാളികളായ അൾട്രാ ട്യൂൺ (Ultra Tune) പോലെയുള്ള സ്ഥാപനങ്ങൾക്കും മാർക്കറ്റിംഗ് ഏജൻസികൾക്കും ലക്ഷക്കണക്കിന് ഡോളറിന്റെ കുടിശ്ശികയാണ് ഇടപാടിൽ വന്നത്. കേസ് ഒഴിഞ്ഞതോടെ, ട്രൂ ഇവി വഴി വാഹനം വാങ്ങിയ ഉപഭോക്താക്കളുടെ വാറന്റിയും അർഹമായ ക്യാഷ്ബാക്ക് ക്ലെയിമുകളും നേരിട്ട് പരിശോധിച്ച് പരിഹരിക്കാൻ എക്സ്പെങ് ഓസ്ട്രേലിയ (XPeng ANZ) പ്രത്യേക സംവിധാനം ഒരുക്കിയിട്ടുണ്ട്. പുതിയ ഔദ്യോഗിക ഡീലർ ശൃംഖല വഴി മുഴുവൻ എക്സ്പെങ് ഉടമകൾക്കും സർവീസ് പിന്തുണ ഉറപ്പാക്കുമെന്നും കമ്പനി അറിയിച്ചു.
