കെയ്ൻസ്: ഓസ്ട്രേലിയൻ ഫെഡറൽ സർക്കാർ വർക്കിംഗ് ഹോളിഡേ വിസകളിൽ (Working Holiday Visas) കൊണ്ടുവന്ന പുതിയ നിയന്ത്രണങ്ങൾ രാജ്യത്തെ വിനോദസഞ്ചാര, കാർഷിക മേഖലകളെ കടുത്ത പ്രതിസന്ധിയിലേക്ക് തള്ളിവിടുന്നതായി വ്യവസായ പ്രമുഖർ. സബ്ക്ലാസ് 462 വിസകൾക്ക് ക്വോട്ട ഏർപ്പെടുത്തിയതും രണ്ടാം വർഷ, മൂന്നാം വർഷ വിസ അപേക്ഷകർക്ക് ബാലറ്റ് സമ്പ്രദായം നിർബന്ധമാക്കിയതുമാണ് ബാക്ക്പാക്കർമാരെ മറ്റ് രാജ്യങ്ങളിലേക്ക് തിരിയാൻ പ്രേരിപ്പിക്കുന്നത്. ഇതോടെ സ്കൂൾ അവധിക്കാല തിരക്ക് ശക്തമായിരിക്കുന്ന ഫാർ നോർത്ത് ക്വീൻസ്ലൻഡിൽ (FNQ) ഉൾപ്പെടെ ജീവനക്കാരുടെ വലിയ ക്ഷാമം അനുഭവപ്പെടാൻ തുടങ്ങി.
മൂന്നാം വർഷ വിസ ലഭിക്കാൻ ആറിൽ ഒന്ന് സാധ്യത മാത്രമുള്ള ബാലറ്റ് സമ്പ്രദായം നിലവിൽ വന്നതോടെ, റീജിയണൽ മേഖലകളിൽ കഠിനാധ്വാനം ചെയ്യാൻ സഞ്ചാരികൾ മടിക്കുകയാണെന്ന് പ്രമുഖ ഹോസ്പിറ്റാലിറ്റി ശൃംഖലയായ ക്രിസ്റ്റൽബ്രൂക്ക് കളക്ഷൻ ചൂണ്ടിക്കാട്ടി. സ്കൂബ ഡൈവിംഗ്, റാഫ്റ്റിംഗ് തുടങ്ങിയ സാഹസിക വിനോദങ്ങളിൽ വിദേശ വിനോദസഞ്ചാരികളുമായി അവരുടെ മാതൃഭാഷയിൽ സംവദിക്കാൻ വർക്കിംഗ് ഹോളിഡേ തൊഴിലാളികൾ അത്യന്താപേക്ഷിതമാണെന്നും പുതിയ തീരുമാനം വിനോദസഞ്ചാരികളുടെ സുരക്ഷയെപ്പോലും ബാധിക്കുമെന്നും ടൂറിസം ട്രോപ്പിക്കൽ നോർത്ത് ക്വീൻസ്ലൻഡ് വ്യക്തമാക്കി. ഇതിനുപുറമെ, വിളവെടുപ്പ് സീസൺ ആരംഭിക്കാനിരിക്കെ കാർഷിക മേഖലയിലെ മൂന്നിലൊന്ന് തൊഴിലാളികൾ കുറയുന്നത് വിളവെടുപ്പിനെ തടസ്സപ്പെടുത്തുമെന്നും പഴവർഗ്ഗങ്ങളുടെ വിലക്കയറ്റത്തിന് കാരണമാകുമെന്നും എഫ്എൻക്യു ഗ്രോവേഴ്സ് മുന്നറിയിപ്പ് നൽകി. എന്നാൽ പസഫിക് ദ്വീപ് തൊഴിലാളികളെ ഉപയോഗിച്ച് ഈ വിടവ് നികത്താൻ സാധിക്കുമെന്ന നിലപാടിലാണ് ഫെഡറൽ സർക്കാർ.
