മെൽബൺ: ഫിറ്റ്‌നസ് ട്രാക്കിംഗ് ആപ്പുകളിലെ ലൊക്കേഷൻ വിവരങ്ങളും റൂട്ടുകളും ദുരുപയോഗം ചെയ്ത് സ്ത്രീകൾക്ക് നേരെ നടക്കുന്ന സൈബർ സ്റ്റാക്കിംഗും (Cyberstalking) പിന്തുടരലും വർദ്ധിക്കുന്നതായി വനിതാ അത്‌ലറ്റുകളും സൈക്ലിസ്റ്റുകളും. ജിപിഎസ് അടിസ്ഥാനമാക്കി പ്രവർത്തിക്കുന്ന 'സ്ട്രാവ' (Strava) ഉൾപ്പെടെയുള്ള ജനപ്രിയ വ്യായാമ സോഷ്യൽ മീഡിയ പ്ലാറ്റ്‌ഫോമുകളിലെ തത്സമയ ലൊക്കേഷൻ പങ്കിടൽ സംവിധാനങ്ങൾ ദുരുപയോഗം ചെയ്താണ് പലരും സ്ത്രീകളെ നേരിട്ടും ഓൺലൈനായും ശല്യം ചെയ്യുന്നത്. മെൽബണിൽ വനിതാ ദിന റൈഡിനിടെ പങ്കെടുത്ത പെൺകുട്ടിയെ ആപ്പ് വഴി ട്രാക്ക് ചെയ്ത് ഒരാൾ പിന്തുടർന്ന സംഭവം വലിയ ചർച്ചയായിട്ടുണ്ട്.
പ്രൈവസി സെറ്റിംഗുകൾ കൃത്യമായി ക്രമീകരിച്ചില്ലെങ്കിൽ ആപ്പുകൾ വഴി ഒരു വ്യക്തി എവിടെയാണ് താമസിക്കുന്നത്, ഏത് വഴികളിലൂടെയാണ് ഓടുന്നത് അല്ലെങ്കിൽ സൈക്കിൾ ചവിട്ടുന്നത് എന്ന് മറ്റുള്ളവർക്ക് കൃത്യമായി കണ്ടെത്താൻ സാധിക്കും. സ്ത്രീകൾ സുരക്ഷിതരായിരിക്കാൻ മുൻകൈയെടുക്കുന്നതിനേക്കാൾ ഉപരി, ആപ്പ് ഡെവലപ്പർമാരാണ് സുരക്ഷയ്ക്ക് മുൻഗണന നൽകുന്ന ഡിസൈനുകൾ കൊണ്ടുവരേണ്ടതെന്ന് ഗാർഹിക-ലൈംഗിക അതിക്രമങ്ങൾക്ക് ഇരയായവരെ സഹായിക്കുന്ന സംഘടനയായ 'ഫുൾ സ്റ്റോപ്പ് ഓസ്‌ട്രേലിയ' സിഇഒ കാരെൻ ബെവൻ വ്യക്തമാക്കി. അക്കൗണ്ട് തുറക്കുമ്പോൾ തന്നെ ലൊക്കേഷൻ റൂട്ടിന്റെ ആദ്യ-അവസാന ഭാഗങ്ങൾ മറയ്ക്കുകയും അപരിചിതരിൽ നിന്നുള്ള സന്ദേശങ്ങൾ തടയുകയും വേണമെന്ന് അവർ ആവശ്യപ്പെട്ടു.
ഉപയോക്താക്കളുടെ സുരക്ഷയ്ക്ക് മുൻഗണന നൽകുന്നുണ്ടെന്നും അപരിചിതരിൽ നിന്നുള്ള മെസ്സേജുകൾ നിയന്ത്രിക്കാനും റൂട്ടിലെ ആദ്യ-അവസാന 200 മീറ്ററുകൾ സ്വയം മറച്ചുവെക്കാനുമുള്ള ക്രമീകരണങ്ങൾ ആപ്പിൽ ലഭ്യമാണെന്നും സ്ട്രാവ പ്രതികരിച്ചു. അതേസമയം, ആപ്പുകൾ വഴി ട്രാക്ക് ചെയ്യപ്പെടുമെന്ന ഭയം കാരണം സ്വന്തം ലൊക്കേഷൻ പങ്കിടാതെ വർക്കൗട്ടുകൾ ട്രാക്ക് ചെയ്യാൻ സഹായിക്കുന്ന 'SoloRunClubxx' പോലെയുള്ള പുതിയ ആപ്പുകൾ നിർമ്മിച്ച് വനിതകൾ സ്വന്തം സുരക്ഷ സ്വയം ഉറപ്പാക്കുന്ന പ്രവണതയും വർദ്ധിച്ചുവരികയാണ്. നിയമവിരുദ്ധമായ പിന്തുടരലുകൾ തടയാൻ ടെക് കമ്പനികൾ കൂടുതൽ നിയമപരമായ ജാഗ്രത പുലർത്തണമെന്നാണ് വനിതാ കൂട്ടായ്മകളുടെ ആവശ്യം.
