പെർത്ത്: പെർത്ത് വിമാനത്താവളത്തിൽ സ്യൂട്ട്കേസിൽ ഒളിപ്പിച്ച നിലയിൽ 6,18,360 ഓസ്ട്രേലിയൻ ഡോളർ കണ്ടെത്തിയ കേസിൽ സിഡ്നി സ്വദേശിയായ 32കാരന് കോടതി തടവുശിക്ഷ വിധിച്ചു. 2023 മാർച്ച് 14ന് പെർത്ത് ആഭ്യന്തര ടെർമിനലിൽ സുരക്ഷാ പരിശോധനയ്ക്കിടെ ഓസ്ട്രേലിയൻ ഫെഡറൽ പൊലീസ് (AFP) നടത്തിയ പരിശോധനയിലാണ് പണം കണ്ടെത്തിയത്. കിങ്സ്ഫോർഡ് സ്വദേശിയുടെ സ്യൂട്ട്കേസിൽ നിന്നാണ് പണം പിടിച്ചെടുത്തത്.
ചോദ്യം ചെയ്തപ്പോൾ പുകയില ബിസിനസുകളുമായി ബന്ധപ്പെട്ട് ലഭിച്ച പണമാണ് ഇതെന്നും പെർത്തിൽ ഒരു ടൊബാക്കോണിസ്റ്റ് ബിസിനസ് വാങ്ങുന്നതിനായി കൊണ്ടുപോകുന്നതാണെന്നും ഇയാൾ പൊലീസിനോട് പറഞ്ഞിരുന്നു. എന്നാൽ പണത്തിന്റെ നിയമപരമായ ഉറവിടം തെളിയിക്കുന്ന രേഖകളൊന്നും ഹാജരാക്കാൻ ഇയാൾക്ക് കഴിഞ്ഞില്ല. തുടർന്ന് നടത്തിയ അന്വേഷണത്തിൽ പറഞ്ഞിരുന്ന ബിസിനസ് വിൽപ്പന നടന്നിട്ടില്ലെന്നും ഇയാൾ സമ്മതിച്ചു. കുറ്റകൃത്യത്തിലൂടെ ലഭിച്ച പണം കൈകാര്യം ചെയ്തെന്ന കുറ്റമാണ് ആദ്യം AFP ചുമത്തിയത്. തുടർന്ന് ബന്ധപ്പെട്ട കസ്റ്റംസ് നിയമലംഘനങ്ങളിൽ നടപടിയെടുക്കുന്നതിനായി കേസ് ഓസ്ട്രേലിയൻ ബോർഡർ ഫോഴ്സിന് കൈമാറി.
മാർച്ചിൽ കുറ്റം സമ്മതിച്ച പ്രതിക്ക് വെള്ളിയാഴ്ച കുറ്റകൃത്യത്തിലൂടെ ലഭിച്ച പണം കൈകാര്യം ചെയ്തതിന് 16 മാസത്തെ തടവും കസ്റ്റംസ് കുറ്റങ്ങൾക്ക് രണ്ടര വർഷത്തെ തടവും വിധിച്ചു. എന്നാൽ ശിക്ഷകൾ ഒരേസമയം അനുഭവിക്കാവുന്നതിനാൽ, Intensive Correction Order പ്രകാരമാണ് ശിക്ഷ നടപ്പാക്കുക. വലിയ തോതിൽ അനധികൃത പണം ഓസ്ട്രേലിയൻ വിമാനത്താവളങ്ങളിലൂടെ കടത്താൻ ശ്രമിക്കുന്നവരെ കണ്ടെത്തുമെന്നും പിടികൂടുമെന്നും AFP ഡിറ്റക്ടീവ് ആക്ടിംഗ് സൂപ്രണ്ടന്റ് പീറ്റർ ബ്രിൻഡൽ മുന്നറിയിപ്പ് നൽകി. വിമാനയാത്രാ-സുരക്ഷാ വിഭാഗങ്ങളുമായി സഹകരിച്ച് സംശയാസ്പദമായ പ്രവർത്തനങ്ങൾ കണ്ടെത്താനും കുറ്റകൃത്യങ്ങൾ തടയാനും AFP തുടർച്ചയായി പ്രവർത്തിക്കുകയാണെന്ന് അദ്ദേഹം പറഞ്ഞു. കുറ്റകൃത്യങ്ങളുമായി ബന്ധമുള്ളതായി സംശയിക്കുന്ന അനധികൃത പണത്തിന്റെ നീക്കം തടയുന്നതിനും ഉത്തരവാദികളായവർക്കെതിരെ നടപടി സ്വീകരിക്കുന്നതിനും AFP തുടരുമെന്നും അദ്ദേഹം വ്യക്തമാക്കി.