ഓസ്‌ട്രേലിയൻ ഗ്രീൻസ് പാർട്ടിയിലെ വെസ്റ്റേൺ ഓസ്‌ട്രേലിയൻ സെനറ്റർ ജോർഡൻ സ്റ്റീൽ-ജോൺ അടുത്ത ആഴ്ച പാർലമെന്റിൽ പങ്കെടുക്കില്ലെന്ന് അറിയിച്ചു. തനിക്കെതിരായ ആരോപണങ്ങൾ സംബന്ധിച്ച കത്ത് പുറത്തുവന്നതിനു പിന്നാലെയാണ് അദ്ദേഹത്തിന്റെ പ്രഖ്യാപനം. ആരോപണങ്ങളിൽ സ്വതന്ത്ര അന്വേഷണം പൂർത്തിയാക്കുന്നതിൽ ശ്രദ്ധ കേന്ദ്രീകരിക്കുമെന്നും അദ്ദേഹം വ്യക്തമാക്കി. വെള്ളിയാഴ്ച രാത്രി സമൂഹമാധ്യമങ്ങളിലൂടെ പങ്കുവച്ച പ്രസ്താവനയിലാണ് 32കാരനായ സെനറ്റർ ഇക്കാര്യം അറിയിച്ചത്. പാർലമെന്റിൽ നേരിട്ടെത്തുന്നതിനുപകരം സെനറ്റ് എസ്റ്റിമേറ്റ്സ് നടപടികളിൽ ഓൺലൈനായി പങ്കെടുക്കുന്നതും പരിഗണിച്ചിരുന്നെങ്കിലും അതും അംഗീകരിക്കാനാവില്ലെന്ന് അറിയിച്ചതായി അദ്ദേഹം പറഞ്ഞു. ആരോപണങ്ങൾ പരസ്യമായതിനു പിന്നാലെ അടുത്ത ആഴ്ച പാർലമെന്റിൽ പങ്കെടുക്കരുതെന്ന ആവശ്യം ശക്തമായിരുന്നുവെന്ന് സ്റ്റീൽ-ജോൺ പറഞ്ഞു. ആരോപണങ്ങൾ ഉയർന്നതിന്റെ പേരിൽ മാത്രം ജനപ്രതിനിധികളെ പാർലമെന്റിൽനിന്ന് മാറ്റിനിർത്തുന്ന കീഴ്‌വഴക്കം രൂപപ്പെട്ടതായും അദ്ദേഹം വിമർശിച്ചു.
2017 മുതൽ 2025 വരെ സ്ത്രീകളോട് അനുചിതമായി പെരുമാറിയെന്ന ആരോപണങ്ങളിലാണ് അന്വേഷണം നടക്കുന്നത്. വെസ്റ്റേൺ ഓസ്‌ട്രേലിയൻ ഗ്രീൻസ് വിഭാഗം നിയോഗിച്ച സ്വതന്ത്ര അന്വേഷണത്തിന് പുറമേ, വിഷയം ഇൻഡിപെൻഡന്റ് പാർലമെന്ററി സ്റ്റാൻഡേർഡ്സ് കമ്മിഷനും കൈമാറിയിട്ടുണ്ട്. പാർട്ടിയുടെ നേതാവ് ഡേവിഡ് ഷൂബ്രിഡ്ജും സ്റ്റീൽ-ജോണും തമ്മിൽ അവധിയുമായി ബന്ധപ്പെട്ട് അഭിപ്രായവ്യത്യാസം പരസ്യമായതോടെ സെനറ്ററുടെ പാർലമെന്റ് പങ്കാളിത്തം സംബന്ധിച്ച് അനിശ്ചിതത്വം നിലനിന്നിരുന്നു. ഏഴ് പാർട്ടി അംഗങ്ങൾ ആരോപണങ്ങളിൽ അന്വേഷണം ആവശ്യപ്പെട്ട് നേതാവിന് കത്തയച്ചതിനെത്തുടർന്ന് സ്റ്റീൽ-ജോൺ അവധി ആവശ്യപ്പെട്ടെന്നും അത് അംഗീകരിച്ചെന്നുമാണ് ഷൂബ്രിഡ്ജിന്റെ നിലപാട്. എന്നാൽ താൻ അവധിക്ക് സമ്മതിച്ചിട്ടില്ലെന്ന് സെനറ്റർ നേരത്തേ വ്യക്തമാക്കിയിരുന്നു.
കത്തിൽ ഗുരുതര ആരോപണങ്ങൾ
ഒക്ടോബർ 13ന് അയച്ച മൂന്ന് പേജുള്ള കത്ത് നൈനിന്റെ മാധ്യമങ്ങൾ ആദ്യം പുറത്തുവിട്ടിരുന്നു. സ്ത്രീകളുടെ സാന്നിധ്യത്തിൽ സ്റ്റീൽ-ജോൺ പെരുമാറിയ രീതിയെക്കുറിച്ച് ഗുരുതരമായ പരാതികൾ ലഭിച്ചതായി കത്തിൽ ഒപ്പിട്ടവർ പറയുന്നു. 2024ൽ ഗ്രീൻസ് പാർട്ടിയുടെ പ്രചാരണ പരിപാടിക്കിടെ ലൈംഗികാതിക്രമം നടന്നെന്ന ആരോപണം കത്തിൽ പരാമർശിക്കുന്നുണ്ട്. പ്രതികാര നടപടികളെയും തിരിച്ചടികളെയും ഭയന്ന് ആരോപണം ഉന്നയിച്ച വ്യക്തി പരാതി നൽകിയില്ലെന്നാണ് കത്തിലെ വിശദീകരണം. 2025ൽ നടന്നതായി ആരോപിക്കപ്പെടുന്ന മറ്റൊരു ഗുരുതരമായ ലൈംഗിക ദുരുപയോഗവും കത്തിൽ പരാമർശിച്ചിട്ടുണ്ട്. എന്നാൽ സംഭവങ്ങളെക്കുറിച്ച് കൂടുതൽ വിശദാംശങ്ങൾ നൽകിയിട്ടില്ല.
സ്റ്റീൽ-ജോണിനെ പരിഹസിക്കുന്ന തരത്തിലുള്ള ഒരു വിളിപ്പേരും കത്തിൽ പരാമർശിക്കുന്നു. അനുചിതമായ പെരുമാറ്റവുമായി ബന്ധപ്പെട്ട് അദ്ദേഹത്തിന് പേരുണ്ടെന്ന സൂചനയാണ് ഈ വിളിപ്പേരിലൂടെ നൽകുന്നതെന്നും കത്തിൽ പറയുന്നു. അതേസമയം, ആരോപണം ഉയർന്നതുകൊണ്ടുമാത്രം അത് വസ്തുതയോ കുറ്റക്കാരനാണെന്നതിന്റെ തെളിവോ ആകില്ലെന്ന് കത്തിൽ ഒപ്പിട്ടവർ വ്യക്തമാക്കി. പാർട്ടിയുടെയും അംഗങ്ങളുടെയും പ്രതീക്ഷകൾക്ക് അനുസൃതമായി എല്ലാ ആരോപണങ്ങളും സമഗ്രമായി അന്വേഷിക്കണമെന്നാണ് തങ്ങളുടെ ആവശ്യമെന്നും അവർ അറിയിച്ചു.
ആരോപണങ്ങൾ നിഷേധിച്ച് സെനറ്റർ
കഴിഞ്ഞ ഞായറാഴ്ച പുറത്തുവിട്ട ദീർഘമായ പ്രസ്താവനയിൽ സ്റ്റീൽ-ജോൺ ആരോപണങ്ങൾ നിഷേധിച്ചിരുന്നു. പാർട്ടിക്കുള്ളിലെ അനൗദ്യോഗിക വിഭാഗം തന്നെ സെനറ്റിൽനിന്ന് പുറത്താക്കാൻ ലക്ഷ്യമിട്ട് കത്ത് മാധ്യമങ്ങൾക്ക് ചോർത്തിയതാണെന്നും അദ്ദേഹം ആരോപിച്ചു. ആരോപണങ്ങളിൽ നിഷ്പക്ഷവും സമഗ്രവുമായ അന്വേഷണം വേണമെന്ന നിലപാടും അദ്ദേഹം ആവർത്തിച്ചു. അതേസമയം, വെസ്റ്റേൺ ഓസ്‌ട്രേലിയൻ പൊലീസ് അന്വേഷണം മേയിൽ അവസാനിപ്പിച്ചതായും കുറ്റം ചുമത്തിയിട്ടില്ലെന്നും പൊലീസിൽനിന്ന് അറിയിപ്പ് ലഭിച്ചതായി ദ ഗാർഡിയൻ ഓസ്‌ട്രേലിയ റിപ്പോർട്ട് ചെയ്തു. പാർട്ടിയുടെ ആഭ്യന്തര അന്വേഷണവും പാർലമെന്ററി സ്റ്റാൻഡേർഡ്സ് കമ്മിഷന്റെ നടപടികളും ഇനി നിർണായകമാകും.