പെർത്ത്: ഓസ്ട്രേലിയൻ മൈനിങ് രംഗത്ത് സ്വർണ്ണവില റെക്കോർഡ് നിരക്കിൽ ഉയർന്നതിനെത്തുടർന്ന് രൂപപ്പെട്ട പുതിയ തൊഴിൽ മുന്നേറ്റത്തിൽ എൻട്രി ലെവൽ ജോലികൾക്ക് വൻ ജനപ്രീതി. ഖനന മേഖലയിലോ ഡ്രില്ലിങ്ങിലോ യാതൊരു മുൻപരിചയവുമില്ലാത്ത ഉദ്യോഗാർത്ഥികൾക്ക് പോലും പ്രതിവർഷം 110,000 മുതൽ 125,000 വരെ ഓസ്ട്രേലിയൻ ഡോളർ (ഏകദേശം 60 മുതൽ 70 ലക്ഷം ഇന്ത്യൻ രൂപ) പ്രാരംഭ ശമ്പളം വാഗ്ദാനം ചെയ്യുന്ന 'ഡ്രില്ലിങ് ഓഫ്സൈഡർ' (സഹായി) തസ്തികകളിലേക്കാണ് നിലവിൽ ആളുകൾ കൂട്ടത്തോടെ അപേക്ഷിക്കുന്നത്. പ്രമുഖ തൊഴിൽ വെബ്സൈറ്റായ 'സീക്' (Seek) നൽകുന്ന വിവരമനുസരിച്ച് ഈ ഒരു തസ്തികയിലേക്ക് മാത്രം നാനൂറ്റമ്പതിലധികം ഒഴിവുകളാണ് ഇപ്പോൾ റിപ്പോർട്ട് ചെയ്തിട്ടുള്ളത്.
വെസ്റ്റേൺ ഓസ്ട്രേലിയയിലെ കാൽഗൂർലി (Kalgoorlie) പോലുള്ള വിദൂര മൈനിങ് നഗരങ്ങളിലേക്ക് വിമാനമാർഗ്ഗം എത്തിയും (Fly-in Fly-out - FIFO), കടുത്ത ചൂടും പൊടിയും നിറഞ്ഞ അന്തരീക്ഷത്തിൽ പ്രതിദിനം 12 മണിക്കൂറോളം കഠിനാധ്വാനം ചെയ്തും വേണം ഈ ജോലി നോക്കാൻ. വെല്ലുവിളികൾ നിറഞ്ഞതാണെങ്കിലും ചുരുങ്ങിയ പ്രായത്തിൽ മികച്ച കരിയറും സാമ്പത്തിക ഭദ്രതയും സ്വന്തമാക്കാൻ ഈ മേഖല സഹായിക്കുമെന്ന് ആറുമാസം മുൻപ് ഈ രംഗത്തേക്ക് കടന്നുവന്ന എയ്ഡൻ ഫ്രാൻസിസ് (Aidan Francis) എന്ന 27-കാരൻ സാക്ഷ്യപ്പെടുത്തുന്നു. കടുത്ത തൊഴിൽ സമ്മർദ്ദവും ഭാരമേറിയ യന്ത്രങ്ങൾ കൈകാര്യം ചെയ്യേണ്ടി വരുന്നതും കാരണം ശാരീരികക്ഷമതയുള്ള 20-കളിൽ പ്രായമുള്ള യുവാക്കളാണ് അപേക്ഷകരിൽ ഭൂരിഭാഗവും. കഠിനമായ ജോലി സാഹചര്യങ്ങൾ കാരണം സ്ത്രീകളുടെ പങ്കാളിത്തം ഈ മേഖലയിൽ വളരെ കുറവാണ്.
ഓസ്ട്രേലിയൻ സമ്പദ്വ്യവസ്ഥയിലേക്ക് പ്രതിവർഷം 500 ബില്യൺ ഡോളറോളം സംഭാവന ചെയ്യുന്ന ഈ ഡ്രില്ലിങ് മേഖലയിൽ നിലവിൽ കടുത്ത ജീവനക്കാരുടെ ക്ഷാമം നേരിടുന്നതായി പ്രമുഖ റിക്രൂട്ട്മെന്റ് ഏജൻസിയായ ഇച്ച് റിക്രൂട്ട്മെന്റ് (Itch Recruitment) വ്യക്തമാക്കുന്നു. മികച്ച ഉദ്യോഗാർത്ഥികളെ ലഭിക്കുകയാണെങ്കിൽ എത്രപേർക്ക് വേണമെങ്കിലും അടിയന്തിരമായി ജോലി നൽകാൻ കമ്പനികൾ തയ്യാറാണ്. ഈ തസ്തികകളിലേക്ക് അപേക്ഷിക്കുന്നവർക്ക് മുൻപരിചയം ആവശ്യമില്ലെങ്കിലും, കുറഞ്ഞത് ആറുമാസമെങ്കിലും കഠിന ശാരീരിക അധ്വാനം ചെയ്തുള്ള പരിചയം, ക്രിമിനൽ പശ്ചാത്തലമില്ലെന്ന് തെളിയിക്കുന്ന പോലീസ് ക്ലിയറൻസ്, കടുത്ത മെഡിക്കൽ-ലഹരി പരിശോധനകൾ പാസ്സാകുക, മാനുവൽ ഡ്രൈവിംഗ് ലൈസൻസ് ഉണ്ടായിരിക്കുക എന്നീ മാനദണ്ഡങ്ങൾ നിർബന്ധമാണ്. ഡ്രില്ലിങ് സഹായിയായി കരിയർ ആരംഭിക്കുന്നവർക്ക് ചുരുങ്ങിയ വർഷങ്ങൾക്കുള്ളിൽ തന്നെ ഓപ്പറേഷൻസ് തസ്തികകളിലേക്ക് ഉയരാനും പ്രതിവർഷം 200,000 ഡോളറിലധികം ശമ്പളം നേടാനും വലിയ അവസരങ്ങളാണ് ഈ മേഖല തുറന്നുനൽകുന്നത്.
