വിക്ടോറിയ–ന്യൂ സൗത്ത് വെയിൽസ് അതിർത്തിയിലൂടെ ഒഴുകുന്ന മുറെ നദിയിൽ കാണാതായ 39കാരനായി മൂന്നാം ദിവസവും തിരച്ചിൽ തുടരുന്നു. സഹായത്തിനായുള്ള നിലവിളി കേട്ടെത്തിയ ഒരാൾ നദിയിൽ വട്ടംചുറ്റുന്ന നിലയിൽ ആളില്ലാത്ത ചെറിയ ബോട്ട് കണ്ടെത്തിയതോടെയാണ് സംഭവം പുറത്തറിഞ്ഞത്.
പാട്രിക് ഇവാൻസിനെ വെള്ളിയാഴ്ച ഉച്ചയ്ക്ക് 12.30ഓടെ ന്യൂ സൗത്ത് വെയിൽസിലെ ടോകംവാളിന് സമീപമാണ് കാണാതായതെന്നാണ് കരുതുന്നത്. ഷെപ്പാർട്ടണിൽ നിന്ന് ഏകദേശം 80 കിലോമീറ്റർ വടക്കുള്ള പ്രദേശമാണിത്.
മുറെ റിവർ പൊലീസ് ഡിസ്ട്രിക്ടിലെ ചീഫ് ഇൻസ്‌പെക്ടർ പോൾ ഹഗറ്റ് പറയുന്നതനുസരിച്ച്, വെള്ളിയാഴ്ച സഹായത്തിനായുള്ള നിലവിളി കേട്ട സാക്ഷി വിവരം പൊലീസിനെ അറിയിക്കുകയായിരുന്നു. തുടർന്ന് നടത്തിയ പരിശോധനയിൽ നദിയിൽ നിയന്ത്രണമില്ലാതെ വട്ടംചുറ്റുന്ന ചെറിയ ബോട്ട് കണ്ടെത്തി. വിക്ടോറിയയുടെ ഭാഗത്തുള്ള പെബ്ലി ബീച്ച് ക്യാമ്പ് ഗ്രൗണ്ടിൽ വെള്ളിയാഴ്ച രാവിലെ 10.30ഓടെയാണ് ഇവാൻസിനെ അവസാനമായി കണ്ടത്. ഉച്ചയ്ക്ക് ശേഷം മീൻപിടിക്കാൻ പോയതാകാമെന്നാണ് പൊലീസിന്റെ നിഗമനം.
ന്യൂ സൗത്ത് വെയിൽസിലെയും വിക്ടോറിയയിലെയും വൊളന്റിയർ റെസ്‌ക്യൂ അസോസിയേഷൻ, സ്റ്റേറ്റ് എമർജൻസി സർവീസ്, റൂറൽ ഫയർ സർവീസ് എന്നിവയുടെ സംഘങ്ങൾ തിരച്ചിലിൽ പങ്കെടുക്കുന്നുണ്ട്. ശനിയാഴ്ച കാൻബറയിൽ നിന്നുള്ള വ്യോമസഹായവും ന്യൂ സൗത്ത് വെയിൽസ് പൊലീസിന്റെ ഡ്രോൺ സംഘങ്ങളും മുങ്ങൽ വിദഗ്ധരും തിരച്ചിലിന്റെ ഭാഗമായി. ടോകംവാളിന് സമീപമുള്ള ന്യൂവെൽ ഹൈവേ പാലവും അടുത്തുള്ള റെയിൽവേ പാലവും കേന്ദ്രീകരിച്ചാണ് തിരച്ചിൽ. ശനിയാഴ്ച ഏകദേശം 40 സന്നദ്ധപ്രവർത്തകർ തിരച്ചിലിൽ പങ്കെടുത്തു. ഞായറാഴ്ചയും 30 മുതൽ 40 വരെ പേർ പങ്കെടുക്കുന്നു.
പാട്രിക്കിനും കുടുംബത്തിനും അനുകൂലമായ ഫലം ലഭിക്കുമെന്നാണ് പ്രതീക്ഷിക്കുന്നതെന്ന് ഇൻസ്‌പെക്ടർ ഹഗറ്റ് പറഞ്ഞു. ഏകദേശം 175 സെന്റിമീറ്റർ ഉയരവും മെലിഞ്ഞ ശരീരപ്രകൃതിയും തവിട്ടുനിറത്തിലുള്ള മീശയും താടിയും ഇടത്തരം നീളമുള്ള തവിട്ട് കലർന്ന സ്വർണനിറമുള്ള മുടിയുമാണ് കാണാതായ വ്യക്തിയുടെ അടയാളങ്ങളെന്ന് പൊലീസ് അറിയിച്ചു. വർഷങ്ങളായി ഈ പ്രദേശത്ത് താമസിക്കുന്നയാളാണ് ഇവാൻസ്. അദ്ദേഹത്തെ കണ്ടവരോ വെള്ളിയാഴ്ചത്തെ യാത്രയെക്കുറിച്ച് എന്തെങ്കിലും വിവരം അറിയാവുന്നവരോ പൊലീസിനെ ബന്ധപ്പെടണമെന്ന് ഹഗറ്റ് അഭ്യർഥിച്ചു. ചെറിയ സമൂഹമാണെങ്കിലും വിനോദസഞ്ചാരികൾ ധാരാളമെത്തുന്ന പ്രദേശമായതിനാൽ സന്ദർശകർക്കും എന്തെങ്കിലും വിവരം ലഭിച്ചിട്ടുണ്ടെങ്കിൽ അറിയിക്കാമെന്ന് പൊലീസ് വ്യക്തമാക്കി.
നദികളിൽ ജാഗ്രത പാലിക്കണമെന്ന് മുന്നറിയിപ്പ്
വേനൽക്കാലം അടുത്തെത്തുന്ന സാഹചര്യത്തിൽ നദികളിലും മറ്റ് ജലാശയങ്ങളിലും സുരക്ഷ ഉറപ്പാക്കണമെന്ന് പൊലീസ് മുന്നറിയിപ്പ് നൽകി. മുറെ നദിയും മറ്റ് നദീസംവിധാനങ്ങളും അപകടകരമാകാമെന്ന് ഇൻസ്‌പെക്ടർ ഹഗറ്റ് പറഞ്ഞു. ബോട്ടുകളിൽ യാത്ര ചെയ്യുന്നവർ ലൈഫ് ജാക്കറ്റ് ധരിക്കണമെന്നും വെള്ളത്തിനടുത്ത് മദ്യപാനം ഒഴിവാക്കണമെന്നും അദ്ദേഹം നിർദേശിച്ചു. നദിയിൽ നീന്താൻ പോകുന്നവർ ഒറ്റയ്ക്ക് പോകാതെ മറ്റുള്ളവരോടൊപ്പം പോകണമെന്നും അദ്ദേഹം അഭ്യർഥിച്ചു. സമൂഹം സുരക്ഷിതമായ വേനൽക്കാലം ആസ്വദിച്ച് ദിവസാവസാനം സുരക്ഷിതമായി വീടുകളിലെത്തണമെന്നാണ് ആഗ്രഹമെന്നും ചെറിയൊരു വെയിൽകൊള്ളൽ മാത്രമായിരിക്കട്ടെ ദിവസത്തെ ഏറ്റവും വലിയ ബുദ്ധിമുട്ടെന്നും അദ്ദേഹം പറഞ്ഞു.