വിക്ടോറിയ: ജനപ്രിയ ഓസ്‌ട്രേലിയൻ കുട്ടികളുടെ ടെലിവിഷൻ പരിപാടിയായ 'പ്ലേ സ്‌കൂളി'ന്റെ (Play School) ആദ്യകാല അവതാരകനും പ്രശസ്ത നടനുമായ അലിസ്റ്റർ സ്മാർട്ട് (90) അന്തരിച്ചു. വിക്ടോറിയയിലെ ഈസ്റ്റ് ഗിപ്പ്സ്‌ലാൻഡിലുള്ള വസതിയിലായിരുന്നു അന്ത്യം.
1960-കളിൽ എബിസി (ABC) സംപ്രേഷണം ആരംഭിച്ച പ്ലേ സ്‌കൂളിന്റെ ആദ്യ എപ്പിസോഡ് മുതൽ പതിറ്റാണ്ടുകളോളം അവതാരകനായി തിളങ്ങിയ വ്യക്തിയാണ് അലിസ്റ്റർ സ്മാർട്ട്. തനിമയാർന്ന അവതരണ ശൈലിയിലൂടെ തലമുറകളുടെ പ്രിയങ്കരനായി മാറിയ അദ്ദേഹം, നടനായും സംവിധായകനായും ശ്രദ്ധേയമായ സംഭാവനകൾ നൽകിയിട്ടുണ്ട്. 'നെയ്ബേഴ്സ്' (Neighbours), 'ബ്ലൂ ഹീലേഴ്സ്' (Blue Heelers), 'എ കൺട്രി പ്രാക്ടീസ്' (A Country Practice) തുടങ്ങിയ പ്രശസ്തമായ ഓസ്‌ട്രേലിയൻ സീരിയലുകളിലും അദ്ദേഹം വേഷമിട്ടിട്ടുണ്ട്. അദ്ദേഹത്തിന്റെ വേർപാടിൽ എബിസി അധികൃതരും സിനിമാ-ടെലിവിഷൻ രംഗത്തെ പ്രമുഖരും അനുശോചനം രേഖപ്പെടുത്തി.