മെൽബൺ: ജനസംഖ്യ അതിവേഗം വർധിക്കുന്ന പടിഞ്ഞാറൻ മെൽബണിലെ യാത്രാദുരിതത്തിന് പരിഹാരം കാണാൻ മൗണ്ട് അറ്റ്കിൻസൺ തോൺഹിൽ പാർക്ക് എന്നിവിടങ്ങളിൽ പുതിയ റെയിൽവേ സ്റ്റേഷനുകൾ നിർമ്മിക്കാൻ പൊതു-സ്വകാര്യ പങ്കാളിത്ത (PPP) മാതൃക തേടി മെൽട്ടൻ സിറ്റി കൗൺസിൽ. പദ്ധതി നടപ്പാക്കാൻ വിക്ടോറിയൻ സംസ്ഥാന സർക്കാരുമായി ചേർന്ന് സംയുക്ത പങ്കാളിത്തം രൂപീകരിക്കാനും, സ്റ്റേഷനുകളിൽ പാർക്കിംഗ് ഫീസ് ഏർപ്പെടുത്തി കൗൺസിലിന് വരുമാനം കണ്ടെത്താനാകുമോ എന്ന് പരിശോധിക്കാനും കൗൺസിൽ പ്രമേയം പാസാക്കി.
ബല്ലാററ്റ് വി/ലൈൻ റൂട്ടിലുള്ള ഈ രണ്ട് സ്റ്റേഷനുകൾക്കായി പ്രദേശവാസികൾ വർഷങ്ങളായി ശക്തമായ ആവശ്യമുന്നയിക്കുകയാണ്. മെൽബൺ നഗര ശരാശരിയായ രണ്ട് ശതമാനത്തേക്കാൾ മൂന്നിരട്ടി വേഗത്തിൽ, പ്രതിവർഷം 6.61 ശതമാനം നിരക്കിലാണ് മെൽട്ടൻ മേഖലയിലെ ജനസംഖ്യാ വളർച്ച. നിലവിൽ കരോലിൻ സ്പ്രിംഗ്സ്, റോക്ക്ബാങ്ക്, കോബിൾബാങ്ക് സ്റ്റേഷനുകളിൽ രാവിലെ 7:30 ഓടെ തന്നെ കാർ പാർക്കിംഗ് നിറഞ്ഞു കവിയുന്ന അവസ്ഥയാണ്. പുതിയ സ്റ്റേഷനുകൾ സ്ഥാപിക്കുകയും മെൽട്ടൻ ലൈൻ വൈദ്യുതീകരിക്കുകയും ചെയ്താൽ റോഡുകളിൽ നിന്ന് പ്രതിദിനം 12,000 കാറുകൾ കുറയ്ക്കാനും 15,000 അധിക യാത്രക്കാരെ പൊതുഗതാഗതത്തിലേക്ക് ആകർഷിക്കാനും കഴിയുമെന്ന് കൗൺസിൽ ചൂണ്ടിക്കാട്ടുന്നു. 2017-ലെ മാസ്റ്റർ പ്ലാനിൽ വാഗ്ദാനം ചെയ്തിട്ടും ഇതുവരെ യാഥാർത്ഥ്യമാകാത്ത ഇൻഫ്രാസ്ട്രക്ചർ പോരായ്മകൾ വരാനിരിക്കുന്ന തെരഞ്ഞെടുപ്പിൽ ഭരണകക്ഷിയായ ലേബർ പാർട്ടിക്ക് കടുത്ത വെല്ലുവിളിയാകുമെന്നാണ് വിലയിരുത്തൽ.
