മെൽബൺ: മെൽബണിന്റെ കിഴക്കൻ മേഖലയിൽ വീട്ടിനുള്ളിൽ സ്ത്രീയെ മരിച്ച നിലയിൽ കണ്ടെത്തിയ സംഭവത്തിൽ 45കാരനായ ഒരാളെ പൊലീസ് അറസ്റ്റ് ചെയ്തു. വെള്ളിയാഴ്ച രാവിലെ ഏകദേശം 10 മണിയോടെ Ferntree Gully യിലെ Ferntree Gully Road ലുള്ള വീട്ടിലേക്ക് പൊലീസ് വിളിച്ചുവരുത്തുകയായിരുന്നു. മെൽബൺ CBDയിൽ നിന്ന് ഏകദേശം 30 കിലോമീറ്റർ അകലെയാണ് പ്രദേശം. പൊലീസ് സ്ഥലത്തെത്തിയപ്പോൾ പരിക്കേറ്റ നിലയിൽ സ്ത്രീയെ കണ്ടെത്തി. അടിയന്തര സേവനപ്രവർത്തകർ സ്ത്രീയെ രക്ഷിക്കാൻ ശ്രമിച്ചെങ്കിലും അൽപസമയത്തിനുശേഷം സ്ഥലത്തുവെച്ച് തന്നെ മരണം സ്ഥിരീകരിച്ചു. മരിച്ച സ്ത്രീയുടെ വ്യക്തിവിവരങ്ങൾ പൊലീസ് ഇതുവരെ പുറത്തുവിട്ടിട്ടില്ല.
സ്ത്രീയെ പരിചയമുള്ളയാളെന്ന് കരുതുന്ന 45കാരനെ സമീപത്തുനിന്ന് പൊലീസ് അറസ്റ്റ് ചെയ്തു. ഇയാൾ നിലവിൽ കസ്റ്റഡിയിലാണ്. ഇതുവരെ ഇയാൾക്കെതിരെ കുറ്റം ചുമത്തിയിട്ടില്ല. സംഭവസ്ഥലത്ത് പൊലീസ് ക്രൈം സീൻ സ്ഥാപിച്ചിട്ടുണ്ട്. Homicide Squadയിലെ ഡിറ്റക്ടീവുകൾ സ്ഥലത്ത് തുടരുകയാണ്. സംഭവത്തിന്റെ സാഹചര്യങ്ങളെക്കുറിച്ചും സ്ത്രീയുടെ മരണത്തിലേക്ക് നയിച്ച കാരണങ്ങളെക്കുറിച്ചും അന്വേഷണം തുടരുകയാണ്.