ഹോബാർട്ട്: ഓസ്ട്രേലിയൻ സൂപ്പർമാർക്കറ്റ് ഭീമനായ വൂൾവർത്ത്സ് 2027 മുതൽ ടാസ്മാനിയയിൽ നിന്നുള്ള ബീഫ് സംഭരണം പൂർണ്ണമായി നിർത്തലാക്കുന്നു. ഉയർന്ന സംസ്കരണച്ചെലവും ബാസ് സ്ട്രെയിറ്റ് (Bass Strait) വഴിയുള്ള വൻ ഷിപ്പിംഗ് നിരക്കുകളും ചൂണ്ടിക്കാട്ടിയാണ് കമ്പനിയുടെ പിന്മാറ്റം. നിലവിൽ ലോങ്ഫോർഡിലുള്ള ജെ.ബി.എസ് ഫുഡ്സിന്റെ (JBS Foods) അറവുശാല വഴിയാണ് വൂൾവർത്ത്സ് ബീഫ് സംഭരിച്ചിരുന്നത്. ഈ കരാറാണ് 2026 അവസാനത്തോടെ കമ്പനി അവസാനിപ്പിക്കുന്നത്.
ടാസ്മാനിയയിൽ നിന്ന് കന്നുകാലികളെ അറവിനായി എത്തിക്കുന്നതിനും തുടർന്ന് സംസ്കരണത്തിനായി വിക്ടോറിയയിലേക്ക് കൊണ്ടുപോയി വീണ്ടും സംസ്ഥാനത്തേക്ക് തിരികെ എത്തിക്കുന്നതിനും വരുന്ന ഭീമമായ ചെലവ് സാമ്പത്തികമായി ലാഭകരമല്ലെന്നാണ് കമ്പനിയുടെ വിലയിരുത്തൽ. മറ്റൊരു പ്രധാന സൂപ്പർമാർക്കറ്റ് ശൃംഖലയായ കോൾസ് നിലവിൽ ടാസ്മാനിയയിൽ നിന്ന് ബീഫ് വാങ്ങുന്നില്ലാത്തതിനാൽ, വൂൾവർത്ത്സിന്റെ തീരുമാനം പ്രാദേശിക കർഷകരുടെയും മാംസ ഉത്പാദകരുടെയും വിപണി സാധ്യതകളെയും തൊഴിലവസരങ്ങളെയും പ്രതികൂലമായി ബാധിക്കും. 2027-ലേക്കുള്ള മാറ്റത്തിന്റെ ഘട്ടത്തിൽ ബാധിക്കപ്പെടുന്ന കർഷകർക്ക് ആവശ്യമായ പിന്തുണ നൽകുമെന്നും മറ്റ് കാർഷിക ഉത്പന്നങ്ങൾ തുടർന്നും സംഭരിക്കുമെന്നും വൂൾവർത്ത്സ് വ്യക്തമാക്കി.
