ഹോബാർട്ട്: വാട്ടർ സർവീസ് അതോറിറ്റിയായ ടാസ്വാട്ടർ (TasWater) നടപ്പിലാക്കിയ പുതിയ നിരക്ക് ഘടന മൂലം ടാസ്മേനിയയിലെ ചെറുകിട ബിസിനസ്സ് സ്ഥാപനങ്ങളും കായിക ക്ലബ്ബുകളും കടുത്ത പ്രതിസന്ധിയിൽ. ചില സ്ഥാപനങ്ങളുടെ സ്ഥിരം മലിനജല നിരക്കിൽ (Fixed sewerage charges) 500 ശതമാനം വരെയാണ് കുതിച്ചുചാട്ടമുണ്ടായത്. പ്രതിമാസം 630 ഡോളർ വന്നിരുന്ന ബില്ലുകൾ 3,800 ഡോളറായി ഉയർന്നതോടെ ലക്ഷക്കണക്കിന് രൂപ അധികമായി കണ്ടെത്തേണ്ട അവസ്ഥയിലാണ് വ്യാപാരികൾ.
വാട്ടർ മീറ്റർ കണക്ഷന്റെ വ്യാപ്തി (Meter connection size) അടിസ്ഥാനമാക്കിയാണ് മലിനജല നിരക്കുകൾ പുതുക്കി നിശ്ചയിച്ചതെന്ന് ടാസ്വാട്ടർ വ്യക്തമാക്കി. എന്നാൽ, ഗ്രൗണ്ട് നനയ്ക്കാൻ ഉപയോഗിക്കുന്ന വെള്ളത്തിന് മലിനജല നിരക്ക് ചുമത്തുന്നത് വിരോധാഭാസമാണെന്നും വാർഷിക ബില്ലിലെ ഭീമമായ വർദ്ധനവ് സന്നദ്ധ ക്ലബ്ബുകളുടെ പ്രവർത്തനം താളംതെറ്റിക്കുമെന്നും സ്പോർട്സ് അസോസിയേഷനുകൾ പരാതിപ്പെട്ടു. നിരക്ക് വർദ്ധനവ് ചെറുകിട മേഖലയെ തളർത്തുന്ന പശ്ചാത്തലത്തിൽ, ഇത് ഉടൻ മരവിപ്പിക്കണമെന്ന് (Price pause) ടാസ്മേനിയൻ പ്രീമിയർ ജെറമി റോക്ക്ലിഫ് ആവശ്യപ്പെട്ടു.
