ടാസ്മാനിയ: ഗുരുതര പരിചരണ വീഴ്ചകൾ റിപ്പോർട്ട് ചെയ്യുന്നതിൽ പരാജയപ്പെട്ടതിനെ തുടർന്ന് ടാസ്മാനിയയിലെ ഒരു ഭിന്നശേഷി പരിചരണ സേവനദാതാവിന് സംസ്ഥാന ചരിത്രത്തിലെ ഏറ്റവും വലിയ എൻഡിഐഎസ് (NDIS) പിഴ ചുമത്തപ്പെട്ടു.
ലാഭരഹിത സ്ഥാപനമായ ഓക് ടാസ്മാനിയ 2019 മുതൽ 2023 വരെ 480 തവണ ഭിന്നശേഷി പരിചരണ നിയമങ്ങൾ ലംഘിച്ചതായി സമ്മതിച്ചതിനെ തുടർന്ന് ഫെഡറൽ കോടതി 11 ലക്ഷം ഡോളർ പിഴ വിധിച്ചു.
കോടതി പരിഗണിച്ച കേസിൽ, 474 ഗുരുതര സംഭവങ്ങൾ ആവശ്യമായ സമയപരിധിക്കുള്ളിൽ എൻഡിഐഎസ് ക്വാളിറ്റി ആൻഡ് സേഫ്ഗാർഡ്സ് കമ്മീഷനിൽ റിപ്പോർട്ട് ചെയ്യുന്നതിൽ സ്ഥാപനം പരാജയപ്പെട്ടതായി കണ്ടെത്തി.
ഇവയിൽ 100-ലധികം സംഭവങ്ങൾ — പീഡനം, അവഗണന, ഗുരുതര പരിക്ക്, ലൈംഗിക അതിക്രമം എന്നിവ ഉൾപ്പെടെ — 24 മണിക്കൂറിനുള്ളിൽ റിപ്പോർട്ട് ചെയ്യേണ്ടവയായിരുന്നു. കൂടാതെ, അനധികൃത നിയന്ത്രണ നടപടികളുമായി ബന്ധപ്പെട്ട 370 സംഭവങ്ങൾ അഞ്ച് പ്രവർത്തിദിവസത്തിനുള്ളിൽ റിപ്പോർട്ട് ചെയ്തില്ല.
ഇത്തരം റിപ്പോർട്ടിംഗ് പരാജയങ്ങൾ “ഭിന്നശേഷിയുള്ള വ്യക്തികളുടെ സുരക്ഷ ഉറപ്പാക്കുന്നതിൽ കമ്മീഷന്റെ കഴിവിനെ ദുർബലപ്പെടുത്തുന്നു” എന്ന് ജസ്റ്റിസ് ടിമൊത്തി മക്എവോയ് വിലയിരുത്തി.
കൂടാതെ, അഞ്ച് എൻഡിഐഎസ് ഗുണഭോക്താക്കൾക്ക് ആറു വ്യത്യസ്ത അവസരങ്ങളിൽ സുരക്ഷിതവും യോഗ്യവുമായ പരിചരണം നൽകുന്നതിൽ ഓക് പരാജയപ്പെട്ടതായും കോടതി കണ്ടെത്തി.
ഒരു സംഭവത്തിൽ, 24 മണിക്കൂർ പരിചരണം ആവശ്യമായ മൾട്ടിപ്പിൾ സ്ക്ലീറോസിസ് ബാധിച്ച ഒരു സ്ത്രീയെ തെറാപ്പിസ്റ്റ് ശുപാർശ ചെയ്യാത്ത ഉപകരണങ്ങൾ ഉപയോഗിച്ച് കുളിപ്പിക്കുന്നതിനിടെ മാറ്റിപ്പാർപ്പിച്ചതായി കോടതി രേഖപ്പെടുത്തി. തുടർന്ന് അവർക്കു തണ്ടെല്ല് പൊട്ടലുണ്ടായി ആശുപത്രിയിൽ പ്രവേശിപ്പിക്കേണ്ടിവന്നു.
നിയമലംഘനങ്ങൾ ഉദ്ദേശപൂർവ്വമല്ലെന്ന് തെളിവുകളില്ലെങ്കിലും, ശരിയായ റിപ്പോർട്ടിംഗ് സംവിധാനങ്ങൾ ഉണ്ടായിരുന്നെങ്കിൽ ഇവ ഒഴിവാക്കാനാകുമായിരുന്നു എന്ന് കോടതി നിരീക്ഷിച്ചു.
ഓക് ടാസ്മാനിയ സംഭവങ്ങളിൽ ഖേദം പ്രകടിപ്പിച്ചു.
“ഞങ്ങൾ പിന്തുണയ്ക്കുന്നവർ അർഹിക്കുന്ന പരിചരണം നൽകുന്നതിൽ പരാജയപ്പെട്ടതിൽ ഞങ്ങൾ അത്യന്തം ഖേദിക്കുന്നു,” സ്ഥാപനത്തിന്റെ പ്രസ്താവനയിൽ പറഞ്ഞു. അപകട നിയന്ത്രണം, റിപ്പോർട്ടിംഗ് നടപടികൾ, മേൽനോട്ട സംവിധാനം എന്നിവ ശക്തിപ്പെടുത്തിയതായി സ്ഥാപനം അറിയിച്ചു.
കോടതിയിൽ സമർപ്പിച്ച വിവരങ്ങൾ പ്രകാരം, ഓകിന്റെ മാതൃസ്ഥാപനമായ പോസിബിലിറ്റി ഗ്രൂപ്പ് 2025 സെപ്റ്റംബറിൽ ഇൻഡിപെൻഡൻസ് ഓസ്ട്രേലിയ ഗ്രൂപ്പുമായി ലയിക്കുകയും പഴയ ഡയറക്ടർമാരെ മാറ്റുകയും ചെയ്തു.കേസുമായി ബന്ധപ്പെട്ട് 2 ലക്ഷം ഡോളർ നിയമച്ചെലവും ഓക് ടാസ്മാനിയ അടയ്ക്കണമെന്ന് കോടതി ഉത്തരവിട്ടു.
