ഹോബാർട്ട്: ശക്തമായ ശീതക്കാറ്റ് ആഞ്ഞടിച്ചതിനെത്തുടർന്ന് ടാസ്മാനിയയിലെ ഉയർന്ന കൊടുമുടികളിൽ കനത്ത മഞ്ഞുവീഴ്ച. തലസ്ഥാനമായ ഹോബാർട്ടിന് മുകളിലുള്ള കുനൻയി/മൗണ്ട് വെല്ലിംഗ്ടണിൽ താപനില മൈനസ് 4.1 ഡിഗ്രി സെൽഷ്യസിലേക്ക് കൂപ്പുകുത്തി. അതിവേഗത്തിൽ വീശിയടിച്ച ശീതക്കാറ്റ് കാരണം അനുഭവപ്പെട്ട താപനില മൈനസ് 9.7 ഡിഗ്രിയായിരുന്നു.
സംസ്ഥാനത്തിന്റെ മറ്റ് ഉയർന്ന പ്രദേശങ്ങളിലും തണുപ്പ് പൂജ്യത്തിന് താഴെയെത്തി. സെൻട്രൽ പീഠഭൂമിയിലെ ലിയാവീനിയിൽ മൈനസ് 2.1 ഡിഗ്രിയും, പടിഞ്ഞാറൻ തീരത്തെ മൗണ്ട് റീഡിൽ മൈനസ് 1.8 ഡിഗ്രിയും, ഹാർട്ട്സ് മൗണ്ടനിൽ മൈനസ് 1.2 ഡിഗ്രിയും രേഖപ്പെടുത്തി. പടിഞ്ഞാറൻ മേഖലയിലെ ഡോവ് റിവറിലാണ് ഏറ്റവും കഠിനമായ തണുപ്പ് അനുഭവപ്പെട്ടത്; ഇവിടെ അനുഭവപ്പെട്ട തണുപ്പ് മൈനസ് 14.2 ഡിഗ്രിയായിരുന്നു. തെക്കൻ തീരത്തെ മാറ്റ്സുയ്ക്കർ ദ്വീപിൽ മണിക്കൂറിൽ 133 കിലോമീറ്റർ വേഗതയിലും സ്കോട്ട്സ് പീക്കിൽ 100 കിലോമീറ്റർ വേഗതയിലും കാറ്റടിച്ചു.
വാറ (27.8 മില്ലിമീറ്റർ), ബട്ട്‌ലേഴ്‌സ് ഗോർജ് (23 മില്ലിമീറ്റർ) തുടങ്ങിയ പടിഞ്ഞാറൻ മേഖലകളിൽ കനത്ത മഴയും ലഭിച്ചു. താഴത്തെ പ്രദേശങ്ങളിൽ ഹോബാർട്ടിൽ 6.3 ഡിഗ്രിയും ലോൺസെസ്റ്റൺ എയർപോർട്ടിൽ 4.5 ഡിഗ്രിയുമായിരുന്നു താപനില. ബുധനാഴ്ചയോടെ മഞ്ഞുവീഴ്ച 800 മീറ്ററിന് മുകളിലേക്ക് ചുരുങ്ങുമെന്നും, വ്യാഴാഴ്ചയോടെ അന്തരീക്ഷം തെളിയുമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി. വാരാന്ത്യത്തോടെ താപനില ഉയർന്ന് ഞായറാഴ്ചയോടെ ഹ്യൂൺവില്ലെ, ന്യൂ നോർഫോക്ക് തുടങ്ങിയ പ്രദേശങ്ങളിൽ 26 ഡിഗ്രി സെൽഷ്യസ് വരെ ചൂട് രേഖപ്പെടുത്താൻ സാധ്യതയുണ്ട്.
