തിങ്കളാഴ്ച സൗത്ത് ഓസ്ട്രേലിയയിൽ അതിതീവ്ര തീപിടിത്ത സാഹചര്യം ഉണ്ടാകുമെന്ന മുന്നറിയിപ്പിനെ തുടർന്ന് ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
വെസ്റ്റ് കോസ്റ്റ്, ഈസ്റ്റേൺ ഐയർ പെനിൻസുല, ലോവർ ഐയർ പെനിൻസുല, മൗണ്ട് ലോഫ്റ്റി റേഞ്ചസ് തുടങ്ങിയ പ്രദേശങ്ങൾ അതിതീവ്ര തീപിടിത്ത ഭീഷണിയുള്ള മേഖലകളായി പ്രഖ്യാപിക്കപ്പെടാനാണ് സാധ്യത. മറ്റ് ചില മേഖലകളും പട്ടികയിൽ ഉൾപ്പെടുത്താൻ സാധ്യതയുണ്ടെന്ന് അധികൃതർ അറിയിച്ചു.
അഡിലെയ്ഡിലും വയല്ലയിലും താപനില 37 ഡിഗ്രി സെൽഷ്യസിലെത്തും. പോർട്ട് ഓഗസ്റ്റയിലും പോർട്ട് പിരിയിലും 41 ഡിഗ്രി സെൽഷ്യസും മൗണ്ട് ഗാംബിയറിൽ 38 ഡിഗ്രി സെൽഷ്യസും വരെ ചൂടുയരും.
മുഖ്യമന്ത്രി പീറ്റർ മലിനൗസ്കാസ് ജനങ്ങൾ എല്ലാ സാഹചര്യങ്ങൾക്കും തയ്യാറായിരിക്കണമെന്ന് ആവശ്യപ്പെട്ടു.
“തീപിടിത്ത ഭീഷണിയുടെ കാര്യത്തിൽ അനാസ്ഥയാണ് ഏറ്റവും വലിയ ശത്രു. എല്ലാവരും മുൻകൂട്ടി തയ്യാറെടുക്കുന്നത് ജീവനും മരണത്തിനുമിടയിലെ വ്യത്യാസമായേക്കാം,” അദ്ദേഹം പറഞ്ഞു.
കൺട്രി ഫയർ സർവീസ് (CFS) ചീഫ് ഓഫീസർ ബ്രെറ്റ് ലോഫ്ലിൻ ചൂടും കാറ്റും വരൾച്ചയും ചേർന്ന അപകടകരമായ സാഹചര്യങ്ങളാണുണ്ടാകുകയെന്ന് വ്യക്തമാക്കി.
“തീപിടിത്ത പ്രവർത്തന പദ്ധതി എല്ലാ വീടുകളും പുതുക്കി തയ്യാറാക്കണം. അപകടം ഗൗരവമായി കാണണം,” അദ്ദേഹം പറഞ്ഞു.
