കാൻസർ ഭേദമാക്കാമെന്നും നടക്കാൻ കഴിയാത്ത വൈകല്യമുള്ള സ്ത്രീയെ നടത്തിക്കാമെന്നും അവകാശപ്പെട്ട് ദുർബലരായ ഉപഭോക്താക്കളെ ചൂഷണം ചെയ്ത ആരോഗ്യപ്രവർത്തകന് ഏർപ്പെടുത്തിയ അനിശ്ചിതകാല വിലക്ക് നീക്കണമെന്ന ആവശ്യം തള്ളി. അഡ്രിയൻ ഫാബിയോ മാൻജിനി നൽകിയ അപ്പീലിലാണ് സൗത്ത് ഓസ്‌ട്രേലിയൻ സിവിൽ ആൻഡ് അഡ്മിനിസ്ട്രേറ്റീവ് ട്രൈബ്യൂണൽ (SACAT) വിലക്ക് ശരിവെച്ചത്. സംസ്ഥാന സുപ്രീം കോടതിയിൽ വിധിക്കെതിരെ മാൻജിനി അപ്പീൽ നൽകിയിട്ടുണ്ട്.
2024-ൽ കമ്മ്യൂണിറ്റി സർവീസസ് കംപ്ലെയിന്റ്സ് കമ്മീഷണറാണ് മാൻജിനിക്ക് ആരോഗ്യപ്രവർത്തകനായി സേവനം നടത്തുന്നതിൽ അനിശ്ചിതകാല വിലക്ക് ഏർപ്പെടുത്തിയത്. സൗത്ത് ഓസ്‌ട്രേലിയയിൽ ഹിപ്നോഗിം, ഹിപ്നോതെറാപ്പി, യോഗ തുടങ്ങിയ സേവനങ്ങളാണ് ഇയാൾ നൽകിയിരുന്നത്. യൂട്യൂബ് വീഡിയോയിൽ, നടക്കാൻ കഴിയാത്ത വൈകല്യമുള്ള ഒരു സ്ത്രീയെ വെറും 11 മിനിറ്റ് നീണ്ട കൂടിയാലോചനയിലൂടെ നടത്തിച്ചെന്ന് മാൻജിനി അവകാശപ്പെട്ടിരുന്നു. ഹിപ്നോസിസും പ്രോത്സാഹനപരമായ വാക്കുകളിലൂടെയുള്ള കൗൺസിലിങ്ങുമാണ് ഇതിന് സഹായിച്ചതെന്നായിരുന്നു അവകാശവാദം. എന്നാൽ, ആ സ്ത്രീക്ക് മുമ്പ് വൈകല്യമുണ്ടായിരുന്നെന്നോ ഒട്ടും നടക്കാൻ കഴിയാത്ത അവസ്ഥയിലായിരുന്നെന്നോ തെളിയിക്കുന്ന തെളിവുകളില്ലെന്ന് ട്രൈബ്യൂണലിലെ സീനിയർ അംഗം ജാക്വലിൻ റഗ്ലസ് വ്യക്തമാക്കി. സേവനങ്ങളുടെ പരസ്യത്തിലും പ്രചാരണ സാമഗ്രികളിലും വൈകല്യമുള്ള ഒരാളെ നടത്തിച്ചെന്ന് മാൻജിനി അവകാശപ്പെട്ടതായി കണ്ടെത്തിയെങ്കിലും അതിന് ആവശ്യമായ തെളിവുകളില്ലെന്നും വിധിയിൽ ചൂണ്ടിക്കാട്ടി.
കാൻസർ ഭേദമാക്കിയെന്നും അവകാശവാദം
മറ്റൊരു ഉപഭോക്താവിന് കാൻസർ ഭേദമാക്കാൻ സഹായിച്ചെന്നും പത്ത് വർഷമായി രോഗമുക്തി നിലനിർത്താൻ കഴിഞ്ഞെന്നും മാൻജിനി സ്വകാര്യ സന്ദേശത്തിലൂടെ അവകാശപ്പെട്ടതായി ട്രൈബ്യൂണൽ കണ്ടെത്തി. ഇതിലൂടെ കാൻസർ ഭേദമാക്കാൻ തനിക്ക് കഴിയുമെന്ന ധാരണ ഇയാൾ സൃഷ്ടിച്ചെന്നും വിധിയിൽ പറയുന്നു. ഒരു ഉപഭോക്താവുമായി ലൈംഗിക സ്വഭാവമുള്ളതോ അടുത്ത വ്യക്തിബന്ധത്തെ സൂചിപ്പിക്കുന്നതോ ആയ പെരുമാറ്റത്തിൽ ഏർപ്പെട്ടെന്ന കണ്ടെത്തലും ട്രൈബ്യൂണൽ ശരിവെച്ചു.
ദുർബലരായ ഉപഭോക്താക്കളുടെ ആരോഗ്യവും സുരക്ഷയും അപകടത്തിലാക്കുന്ന തരത്തിലുള്ള പെരുമാറ്റവും സേവനങ്ങളുടെ ഗുണഫലങ്ങളെക്കുറിച്ചുള്ള പരസ്യങ്ങളിൽ വ്യക്തമായതും ബോധപൂർവവുമായ സത്യസന്ധതയില്ലായ്മയും മാൻജിനിയുടെ ഭാഗത്തുനിന്നുണ്ടായതായി റഗ്ലസ് പറഞ്ഞു. സ്വന്തം പെരുമാറ്റത്തെക്കുറിച്ച് യാതൊരു തിരിച്ചറിവും പശ്ചാത്താപവും മാൻജിനി പ്രകടിപ്പിച്ചിട്ടില്ലെന്നും ഇയാൾ പൊതുജനങ്ങൾക്ക് ഇപ്പോഴും ഭീഷണിയാണെന്നും അവർ നിരീക്ഷിച്ചു. ആരോഗ്യപ്രവർത്തകനായോ ആരോഗ്യസേവനദാതാവായോ തുടരുന്നതിന് മാൻജിനിയുടെ തെളിയിക്കപ്പെട്ട പെരുമാറ്റം പൂർണമായും വിരുദ്ധമാണെന്നും വിധിയിൽ വ്യക്തമാക്കി.
നടപടികൾ വ്യക്തിവൈരാഗ്യം മൂലമെന്ന് ആരോപണം
തനിക്കെതിരായ നടപടികൾ കമ്മ്യൂണിറ്റി സർവീസസ് കംപ്ലെയിന്റ്സ് കമ്മീഷണറുടെ വ്യക്തിവൈരാഗ്യത്തിന്റെ ഭാഗമാണെന്ന് മാൻജിനി ട്രൈബ്യൂണലിൽ വാദിച്ചിരുന്നു. എന്നാൽ, വ്യക്തിവൈരാഗ്യമോ വംശീയ പ്രേരണയോ ഉണ്ടായിരുന്നെന്നതിന് തെളിവുകളില്ലെന്ന് റഗ്ലസ് വ്യക്തമാക്കി. കമ്മീഷണറുടെ അന്വേഷണത്തിൽ കണ്ടെത്തിയ ആരോപണങ്ങൾ സ്വതന്ത്രമായി പരിശോധിച്ച് സ്ഥിരീകരിച്ചവയാണെന്നും അവർ കൂട്ടിച്ചേർത്തു. SACAT-ന്റെ തീരുമാനത്തിനെതിരെ മാൻജിനി സംസ്ഥാന സുപ്രീം കോടതിയിൽ അപ്പീൽ നൽകിയിട്ടുണ്ട്.