അഡ്ലെയ്ഡ്: സൗത്ത് ഓസ്ട്രേലിയയിലെ നോർത്ത് അഡ്ലെയ്ഡിലുള്ള വയോജന സംരക്ഷണ കേന്ദ്രത്തിലുണ്ടായ തീപിടുത്തത്തിൽ ഒരാൾക്ക് പരിക്കേറ്റു. ബക്സ്റ്റൺ സ്ട്രീറ്റിലുള്ള ഹെൽപ്പിംഗ് ഹാൻഡ് (Helping Hand) കേന്ദ്രത്തിലാണ് ഉച്ചയ്ക്ക് 12:30 ഓടെ അഗ്നിബാധയുണ്ടായത്. ഗ്രൗണ്ട് ഫ്ലോറിലുണ്ടായ തീപിടുത്തം നിയന്ത്രിക്കാൻ 12 ഫയർ എഞ്ചിനുകളിലായി 34 അഗ്നിശമന സേനാംഗങ്ങൾ സ്ഥലത്തെത്തി. 15 മിനിറ്റിനുള്ളിൽ തന്നെ തീ പൂർണ്ണമായി അണച്ചതിനാൽ വൻ ദുരന്തം ഒഴിവായി.
കെട്ടിടത്തിലെ സ്വതന്ത്ര താമസ വിഭാഗത്തിലാണ് തീപിടിത്തമുണ്ടായത്. അപകടത്തെത്തുടർന്ന് കെട്ടിടത്തിൽ നിന്ന് നിരവധി താമസക്കാരെ സുരക്ഷിതമായി ഒഴിപ്പിച്ചു. തീപിടുത്തമുണ്ടായ മുറിയിൽ നിന്ന് സ്വയം രക്ഷപ്പെട്ട് പുറത്തിറങ്ങിയ ആൾക്കാണ് തലയ്ക്ക് മുറിവേറ്റത്. ഇയാളെ ഉടൻ തന്നെ ആശുപത്രിയിലേക്ക് മാറ്റി. സംഭവത്തിൽ ഏകദേശം രണ്ട് ലക്ഷം ഡോളറിന്റെ നാശനഷ്ടം കണക്കാക്കുന്നുണ്ടെന്നും തീപിടുത്തത്തിന്റെ കാരണം വ്യക്തമല്ലെന്നും മെട്രോപൊളിറ്റൻ ഫയർ സർവീസ് (MFS) അധികൃതർ അറിയിച്ചു.
