അഡ്‌ലെയ്ഡ്: സൗത്ത് ഓസ്‌ട്രേലിയയിലെ ഗൂൾവ ബീച്ചിന് സമീപം മൂന്ന് പൈലറ്റുമാരുടെ ദാരുണ മരണത്തിനിടയാക്കിയ ചെറുവിമാനാപകടത്തിൽ ഫ്ളൈയിംഗ് ഇൻസ്ട്രക്ടറുടെ ഭാഗത്തുനിന്ന് ഗുരുതരമായ സുരക്ഷാവീഴ്ച ഉണ്ടായതായി ഓസ്‌ട്രേലിയൻ ട്രാൻസ്‌പോർട്ട് സേഫ്റ്റി ബ്യൂറോയുടെ (ATSB) അന്തിമ അന്വേഷണ റിപ്പോർട്ട്. മനഃപൂർവ്വമുള്ള കറങ്ങൽ അഭ്യാസങ്ങൾക്ക് അനുമതിയില്ലാത്ത വിമാനത്തിൽ ഇൻസ്ട്രക്ടർ അത്തരം അഭ്യാസത്തിന് മുതിർന്നതാണ് അപകടത്തിലേക്ക് നയിച്ചതെന്നാണ് കണ്ടെത്തൽ.
ഫെബ്രുവരി 6-ന് ഗൂൾവ എയർപോർട്ടിൽ നിന്ന് പറന്നുയർന്ന സിംഗിൾ എഞ്ചിൻ സെസ്ന 210N (Cessna 210N) വിമാനം പറക്കൽ ആരംഭിച്ച് 12 മിനിറ്റുകൾക്കകം മുറെ മൗത്തിന് സമീപമുള്ള ലോംഗ് ബേയിലെ ജലാശയത്തിലേക്ക് മൂക്കുകുത്തി വീഴുകയായിരുന്നു. ഇൻസ്ട്രക്ടറായ ലിയോ ഹോവാർഡ് (53), യുവ പൈലറ്റുമാരായ ട്രിസ്റ്റൻ ഷെഫേഴ്സ് (18), 20 വയസ്സുള്ള മറ്റൊരു പൈലറ്റ് എന്നിവരാണ് അപകടത്തിൽ മരിച്ചത്. സെസ്ന വിമാനം നിയന്ത്രിക്കുന്നതിൽ പരിചയം നൽകുന്നതിനായി ട്രെയിനി പൈലറ്റിന് സ്പിൻ റിക്കവറി പരിശീലിപ്പിക്കാൻ ശ്രമിച്ചതായും, വിമാനം അപകടകരമായ സ്പിന്നിലേക്ക് നീങ്ങിയപ്പോൾ കൃത്യസമയത്ത് നിയന്ത്രണം ഏറ്റെടുക്കാൻ ഇൻസ്ട്രക്ടർക്ക് സാധിച്ചില്ലെന്നും റിപ്പോർട്ട് ചൂണ്ടിക്കാട്ടുന്നു.
ഇൻസ്ട്രക്ടറായ ലിയോ ഹോവാർഡിന് മുൻപും ഇത്തരത്തിൽ അനുമതിയില്ലാതെ ആകാശ അഭ്യാസങ്ങൾ നടത്തിയതിന്റെ ചരിത്രമുണ്ടെന്ന് അന്വേഷണത്തിൽ തെളിഞ്ഞു. 2023, 2024, 2025 വർഷങ്ങളിലായി കുറഞ്ഞത് ആറ് തവണയെങ്കിലും ഇദ്ദേഹം നിയമവിരുദ്ധമായി സ്പിൻ അഭ്യാസങ്ങൾ നടത്തിയിരുന്നതായി കണ്ടെത്തി. എന്നാൽ, ഈ വിവരങ്ങൾ വിമാന കമ്പനിയോ സിവിൽ ഏവിയേഷൻ സേഫ്റ്റി അതോറിറ്റിയോ (CASA) അറിഞ്ഞിരുന്നില്ല. അപകടകരമായ ഇത്തരം പറക്കൽ രീതികൾ ശ്രദ്ധയിൽപ്പെട്ടിട്ടും റിപ്പോർട്ട് ചെയ്യാൻ സഹപ്രവർത്തകരും വിദ്യാർത്ഥികളും മടികാണിച്ചതാണ് അപകടം തടയാൻ കഴിയാതെ പോയതിന് കാരണമെന്ന് എടിഎസ്ബി ചീഫ് കമ്മീഷണർ ആംഗസ് മിച്ചൽ വ്യക്തമാക്കി.
