മെൽബൺ: പസഫിക് സമുദ്രത്തിൽ അതിവേഗം രൂപപ്പെടുന്ന 'എൽ നിനോ' (El Niño) പ്രതിഭാസം മുൻകാല റെക്കോർഡുകളെല്ലാം തകർത്ത് കനക്കുന്നതായി കാലാവസ്ഥാ നിരീക്ഷണ കേന്ദ്രങ്ങളുടെ മുന്നറിയിപ്പ്. ഉത്തരാർദ്ധ ഗോളത്തിലെ രാജ്യങ്ങളായ യൂറോപ്പിലും വടക്കേ അമേരിക്കയിലും കടുത്ത ഉഷ്ണതരംഗത്തിനും ലാൻഡ്സ്ലൈഡുകൾക്കും കാട്ടുതീയ്ക്കും വഴിവെച്ച സമുദ്ര ഉപരിതലത്തിലെ ഈ അസാധാരണ ചൂട്, വരും മാസങ്ങളിൽ ദക്ഷിണാർദ്ധ ഗോള രാജ്യങ്ങളെയും പ്രത്യേകിച്ച് ഓസ്ട്രേലിയയെയും സാരമായി ബാധിക്കും.
ഓസ്ട്രേലിയൻ ബ്യൂറോ ഓഫ് മീറ്റിയോറോളജിയുടെ (BOM) കണക്കുകൂട്ടലുകൾ പ്രകാരം 1900-ന് ശേഷമുള്ള ഏറ്റവും ശക്തമായ എൽ നിനോ വർഷങ്ങളിലൊന്നായി 2026 മാറും. സമുദ്ര താപനില അളക്കുന്ന 'നിനോ 3.4' (Niño 3.4) സൂചിക പീക്ക് മാസങ്ങളായ ഒക്ടോബർ-നവംബർ എത്തുന്നതിന് മുൻപ് തന്നെ പോസിറ്റീവ് 2 ഡിഗ്രി സെൽഷ്യസ് കടന്നു. വസന്തകാലത്തോടെ താപനില ശരാശരിയേക്കാൾ 3.5 ഡിഗ്രി വരെ ഉയർന്നേക്കാം. ഇതോടെ സാധാരണ പസഫിക് സമുദ്രത്തിൽ നിന്നും ഓസ്ട്രേലിയയിലേക്ക് മഴ മേഘങ്ങളെ എത്തിക്കുന്ന വ്യാപാര വാതകങ്ങളുടെ ഗതി മാറുകയും രാജ്യത്തുടനീളം മഴ വൻതോതിൽ കുറയുകയും ചെയ്യും. വരും മാസങ്ങളിൽ ഓസ്ട്രേലിയ ചരിത്രത്തിലെ ഏറ്റവും ഉയർന്ന ചൂടും കടുത്ത വരൾച്ചയും കാട്ടുതീ ഭീഷണിയും നേരിടേണ്ടി വരുമെന്നാണ് കാലാവസ്ഥാ ശാസ്ത്രജ്ഞർ നൽകുന്ന സൂചന.
