ലോകത്തിലെ ഏറ്റവും വലിയ പവിഴപ്പുറ്റ് സംവിധാനമായ ഗ്രേറ്റ് ബാരിയർ റീഫിനെ സംരക്ഷിക്കുന്നതിനായി ക്വീൻസ്ലാൻഡ് സർക്കാർ ബഹുമില്യൺ ഡോളറിന്റെ അധിക ധനസഹായം പ്രഖ്യാപിച്ചു. സംസ്ഥാന ബജറ്റിന്റെ ഭാഗമായി പ്രഖ്യാപിച്ച ഈ നിക്ഷേപം റീഫിന്റെ പുനരുദ്ധാരണത്തിനും പരിസ്ഥിതി സംരക്ഷണ പ്രവർത്തനങ്ങൾക്കും സഹായകരമാകുമെന്ന് സർക്കാർ അറിയിച്ചു. കാലാവസ്ഥാ വ്യതിയാനം, സമുദ്ര താപനില ഉയരുക, കോറൽ ബ്ലീച്ചിങ്ങ്, നക്ഷത്രമത്സ്യങ്ങളുടെ (Crown-of-thorns starfish) വ്യാപനം എന്നിവ റീഫിന് വലിയ ഭീഷണിയായി തുടരുന്ന സാഹചര്യത്തിലാണ് പുതിയ ഫണ്ട് പ്രഖ്യാപിച്ചിരിക്കുന്നത്. ഈ തുക റീഫ് പുനരുദ്ധാരണ പദ്ധതികൾ, ശാസ്ത്രീയ ഗവേഷണം, ജലഗുണനിലവാര നിരീക്ഷണം, സംരക്ഷണ പ്രവർത്തനങ്ങൾ എന്നിവയ്ക്കായി വിനിയോഗിക്കും. 9ന്യൂസ് വെളിപ്പെടുത്തുന്നത് പ്രകാരം, ഈ മാസത്തെ ബജറ്റിൽ 330.5 മില്യൺ ഡോളറാണ് നീക്കിവയ്ച്ചിരിക്കുന്നത്.
ഗ്രേറ്റ് ബാരിയർ റീഫ് ഓസ്ട്രേലിയയുടെ പ്രധാന വിനോദസഞ്ചാര കേന്ദ്രങ്ങളിലൊന്നാണ്. ആയിരക്കണക്കിന് തൊഴിലവസരങ്ങൾക്കും ബില്യൺ ഡോളറുകളുടെ സാമ്പത്തിക പ്രവർത്തനങ്ങൾക്കും റീഫ് പിന്തുണ നൽകുന്നുണ്ടെന്ന് അധികൃതർ ചൂണ്ടിക്കാട്ടി. അതിനാൽ പരിസ്ഥിതി സംരക്ഷണത്തോടൊപ്പം സാമ്പത്തിക പ്രാധാന്യവും കണക്കിലെടുത്താണ് നിക്ഷേപം വർധിപ്പിക്കുന്നതെന്ന് സർക്കാർ വ്യക്തമാക്കി. റീഫിന്റെ ദീർഘകാല സംരക്ഷണത്തിനായി ഫെഡറൽ സർക്കാരും സംസ്ഥാന സർക്കാരും ചേർന്ന് ഇതിനകം ബില്യൺ ഡോളറുകളുടെ നിക്ഷേപം നടത്തിയിട്ടുണ്ട്. പുതിയ ധനസഹായം റീഫിന്റെ പ്രതിരോധശേഷി വർധിപ്പിക്കാനും ഭാവി തലമുറകൾക്കായി ഈ ലോക പൈതൃക കേന്ദ്രത്തെ സംരക്ഷിക്കാനുമുള്ള ശ്രമങ്ങൾക്ക് കരുത്തേകുമെന്ന് വിലയിരുത്തപ്പെടുന്നു.