ഓസ്ട്രേലിയൻ റഗ്ബി ലീഗ് (NRL) താരം ബ്രാൻഡൻ സ്മിത്തിനെതിരായ ഇൻസൈഡർ ബെറ്റിങ് ആരോപണം തെളിവില്ലാത്തതിനാൽ കോടതി പിൻവലിച്ചു. എന്നാൽ, മറ്റൊരു എൻആർഎൽ താരത്തിന് കൊക്കെയ്ൻ വിതരണം ചെയ്തെന്ന കേസ് ഇപ്പോഴും തുടരുകയാണ്. സൗത്ത് സിഡ്നി റാബിറ്റോസ് ടീമിന്റെ ഹുക്കറായ സ്മിത്ത് വ്യാഴാഴ്ച സൗത്ത്പോർട്ട് മജിസ്ട്രേറ്റ് കോടതിയിൽ ഹാജരായി. 2025 ജൂലൈ 2-ന് പരിക്കിൽ നിന്ന് തിരിച്ചെത്തിയ മത്സരത്തിൽ ടീമിന്റെ ആദ്യ ഇലവനിൽ ഉൾപ്പെടുമെന്ന രഹസ്യവിവരം ഒരു പരിചയക്കാരന് കൈമാറി ബെറ്റിങിന് സഹായിച്ചെന്ന ആരോപണമാണ് പൊലീസ് പിൻവലിച്ചത്. ഈ വിവരം ലഭിച്ചയാൾ സ്മിത്ത് ആദ്യ ട്രൈ നേടുമെന്നതിന് 91-1 ഓഡ്സിൽ 200 ഓസ്ട്രേലിയൻ ഡോളർ പന്തയം വെച്ചതായും വിജയിച്ചാൽ 18,000 ഡോളറിലധികം ലഭിക്കുമായിരുന്നുവെന്നും പൊലീസ് കോടതിയെ അറിയിച്ചിരുന്നു.
എന്നാൽ, സ്മിത്തിന്റെ സന്ദേശങ്ങൾ ന്യൂ സൗത്ത് വെയിൽസിലെ മൊബൈൽ ടവറിലൂടെയാണ് അയച്ചതെന്ന കണ്ടെത്തൽ കേസിന്റെ നിയമസാധുതയെ ബാധിച്ചതായി പ്രോസിക്യൂഷൻ കോടതിയെ അറിയിച്ചു. ഇതോടെ ഈ കുറ്റത്തിന് പിന്തുണയ്ക്കുന്ന മതിയായ തെളിവില്ലെന്ന് ചൂണ്ടിക്കാട്ടി പ്രോസിക്യൂഷൻ കേസ് പിൻവലിക്കുകയായിരുന്നു. സ്മിത്തിന്റെ അഭിഭാഷകൻ പോൾ മക്ഗിർ, പൊലീസിന്റെ ചൂതാട്ട വിദഗ്ധന്റെ റിപ്പോർട്ട് വെറും ഊഹാപോഹങ്ങൾ മാത്രമാണെന്നും, Sportsbet അധികൃതരിൽ നിന്ന് പോലും മൊഴിയെടുത്തിരുന്നില്ലെന്നും ചൂണ്ടിക്കാട്ടി. അന്വേഷണവും കുറ്റപത്രവും ഗുരുതര വീഴ്ചകളോടെയാണെന്നും അദ്ദേഹം ആരോപിച്ചു.
അതേസമയം, 2025 ജൂൺ 7-ന് ക്വീൻസ്ലാൻഡിലെ സൺഷൈൻ കോസ്റ്റിലെ കറിമുണ്ടിയിൽ, സിഡ്നി റൂസ്റ്റേഴ്സ് താരമായ വിക്ടർ റാഡ്ലിക്ക് കൊക്കെയ്ൻ വിതരണം ചെയ്തെന്ന കേസിൽ സ്മിത്തിനെതിരെ വിചാരണ തുടരും. ഈ കേസുമായി ബന്ധപ്പെട്ട് റാഡ്ലിക്കെതിരെ ഇതുവരെ കുറ്റം ചുമത്തിയിട്ടില്ല. ഗോൾഡ് കോസ്റ്റ് വിമാനത്താവളത്തിൽ സ്മിത്തിന്റെ മൊബൈൽ ഫോൺ പിടിച്ചെടുത്തതിനെ തുടർന്നാണ് അന്വേഷണം ആരംഭിച്ചത്. പിന്നീട് ഗോൾഡ് കോസ്റ്റിനെതിരായ മത്സരത്തിനായി ക്വീൻസ്ലാൻഡിലെത്തിയപ്പോൾ അദ്ദേഹത്തെ പൊലീസ് ചോദ്യം ചെയ്തെങ്കിലും അന്ന് അറസ്റ്റ് ചെയ്തിരുന്നില്ല. കേസിൽ അന്വേഷണവും കുറ്റപത്രവും കൈകാര്യം ചെയ്ത രീതിക്കെതിരെ പൊലീസിൽ നിന്ന് നഷ്ടപരിഹാരം ഈടാക്കണമെന്ന ആവശ്യവും സ്മിത്തിന്റെ അഭിഭാഷകൻ കോടതിയിൽ ഉന്നയിച്ചു. 2017-ൽ എൻആർഎല്ലിൽ അരങ്ങേറ്റം കുറിച്ച മുൻ ന്യൂസിലൻഡ് അന്താരാഷ്ട്ര താരം ബ്രാൻഡൻ സ്മിത്ത് ഇതുവരെ 164 എൻആർഎൽ മത്സരങ്ങളിൽ കളിച്ചിട്ടുണ്ട്.