ബ്രിസ്ബെയ്ൻ: വനിതാ ഏകദിന ക്രിക്കറ്റിൽ വെറും 15 മത്സരങ്ങൾക്കിടെ മൂന്നാം സെഞ്ചറി നേടി ഓസ്ട്രേലിയൻ ഓപ്പണർ ജോർജിയ വോൾ. ബംഗ്ലാദേശിനെ ഒൻപത് വിക്കറ്റിന് തകർത്ത ഓസ്ട്രേലിയ മൂന്ന് മത്സര പരമ്പരയിൽ 2-0ന്റെ അപരാജിത ലീഡ് സ്വന്തമാക്കി. ബ്രിസ്ബെയ്നിലെ അലൻ ബോർഡർ ഫീൽഡിൽ ആദ്യം ബാറ്റ് ചെയ്ത ബംഗ്ലാദേശ് ആറു വിക്കറ്റ് നഷ്ടത്തിൽ 220 റൺസെടുത്തു. 134 പന്തിൽ 118 റൺസെടുത്ത ഷൊഭാന മൊസ്താരിയും ക്യാപ്റ്റൻ നിഗർ സുൽത്താനയും ചേർന്നാണ് ടീമിനെ തകർച്ചയിൽനിന്ന് കരകയറ്റിയത്. പുറത്താകാതെ 74 റൺസെടുത്ത സുൽത്താനയും മൊസ്താരിയും നാലാം വിക്കറ്റിൽ 195 റൺസ് കൂട്ടിച്ചേർത്തു. വനിതാ ഏകദിന ക്രിക്കറ്റിൽ ഓസ്ട്രേലിയക്കെതിരായ ഏറ്റവും ഉയർന്ന വിക്കറ്റ് കൂട്ടുകെട്ടാണിത്. ബംഗ്ലാദേശിന്റെ വനിതാ ഏകദിന ചരിത്രത്തിലെ ഏതൊരു വിക്കറ്റിലെയും ഏറ്റവും ഉയർന്ന കൂട്ടുകെട്ടുമാണിത്.
മറുപടി ബാറ്റിങ്ങിൽ ഓസ്ട്രേലിയക്ക് കാര്യമായ വെല്ലുവിളി നേരിടേണ്ടിവന്നില്ല. ജോർജിയ വോളും ഫോബി ലിച്ച്ഫീൽഡും ഒന്നാം വിക്കറ്റിൽ 119 പന്തിൽ 162 റൺസ് കൂട്ടിച്ചേർത്തു. 51 പന്തിൽ 70 റൺസെടുത്ത ലിച്ച്ഫീൽഡ് പുറത്തായെങ്കിലും വോൾ 97 പന്തിൽ പുറത്താകാതെ 131 റൺസുമായി ടീമിനെ വിജയത്തിലെത്തിച്ചു. 28.1 ഓവറിൽ ഓസ്ട്രേലിയ ലക്ഷ്യം മറികടന്നു. അലൻ ബോർഡർ ഫീൽഡിൽ വനിതാ ഏകദിനത്തിലെ ഏറ്റവും ഉയർന്ന വ്യക്തിഗത സ്കോറാണ് വോളിന്റെ ഇന്നിങ്സ്. മണിക്കൂറുകൾക്ക് മുമ്പ് മൊസ്താരി 118 റൺസുമായി തുല്യമാക്കിയ റെക്കോർഡാണ് വോൾ മറികടന്നത്. 2024ൽ ഇന്ത്യക്കെതിരെ ഇതേ വേദിയിൽ 101 റൺസ് നേടിയിരുന്ന വോൾ, അലൻ ബോർഡർ ഫീൽഡിൽ രണ്ട് ഏകദിന സെഞ്ചറികൾ നേടുന്ന ആദ്യ വനിതാ താരവുമായി.
ബംഗ്ലാദേശിന്റെ ഇന്നിങ്സിൽ തുടക്കത്തിൽ തന്നെ തകർച്ചയുണ്ടായി. എട്ടാം ഓവറിൽ മൂന്ന് വിക്കറ്റ് നഷ്ടത്തിൽ എട്ട് റൺസ് എന്ന നിലയിലായിരുന്ന ടീമിനെ മൊസ്താരിയും സുൽത്താനയും ചേർന്നാണ് രക്ഷിച്ചത്. ഓസ്ട്രേലിയക്കായി മെഗൻ ഷട്ട് 36 റൺസ് വഴങ്ങി നാല് വിക്കറ്റ് വീഴ്ത്തി. മൊസ്താരിയുടെ മികച്ച ഇന്നിങ്സിന് ഷട്ടാണ് വിരാമമിട്ടത്. മൂന്ന് മത്സര പരമ്പരയിലെ ആദ്യ ഏകദിനത്തിൽ ഓസ്ട്രേലിയ ഏഴ് വിക്കറ്റിന് വിജയിച്ചിരുന്നു. വെള്ളിയാഴ്ച നടന്ന ആദ്യ മത്സരത്തിലെ ടീമുകളിൽ മാറ്റമില്ലാതെയാണ് ഇരുടീമുകളും രണ്ടാം മത്സരത്തിനിറങ്ങിയത്. മത്സരത്തിലെ മികച്ച താരമായി ജോർജിയ വോളിനെ തിരഞ്ഞെടുത്തു.b