പോക്കിമോന്റെ 30-ാം വാർഷികത്തോടനുബന്ധിച്ച് പുറത്തിറക്കിയ പ്രത്യേക ശേഖരം സ്വന്തമാക്കാൻ ഓസ്ട്രേലിയയിലുടനീളം വൻ തിരക്ക്. അർധരാത്രിയിൽ തുറന്ന Kmart, Target സ്റ്റോറുകൾക്ക് മുന്നിൽ നൂറുകണക്കിന് ആരാധകരാണ് ക്യൂവിൽ കാത്തുനിന്നത്. 30th Celebration Elite Trainer Box (ETB), Poster Collection, Pokémon X-Box, Tech Sticker Collection, Knock Out Collection തുടങ്ങിയ ഉൽപ്പന്നങ്ങൾക്കായാണ് ആരാധകർ എത്തിയിരുന്നത്. ചില സ്റ്റോറുകളിൽ എത്തിയവർ ഒന്നിലധികം സ്ഥലങ്ങളിൽ കയറിയിറങ്ങി ഉൽപ്പന്നങ്ങൾ വാങ്ങാൻ ശ്രമിച്ചു.
എന്നാൽ ശേഖരത്തിലെ നിരവധി ഉൽപ്പന്നങ്ങൾ വിൽപ്പന ആരംഭിച്ച് മിനിറ്റുകൾക്കുള്ളിൽ തന്നെ വിറ്റുതീർന്നു. Binder Collection, Mini Tins, Booster Bundles, Figure Collections, വസ്ത്രങ്ങൾ, ആക്സസറികൾ എന്നിവയുടെ പ്രീ-ഓർഡറുകളും മിനിറ്റുകൾക്കകം തീർന്നു. സിഡ്നിയിലെ Castle Hill-ലെ Good Games ഉൾപ്പെടെയുള്ള സ്റ്റോറുകളിലും വലിയ തിരക്കാണ് അനുഭവപ്പെട്ടത്. Poster Collection, Booster Boxes എന്നിവ മിനിറ്റുകൾക്കുള്ളിൽ വിറ്റുതീർന്നതിനെ തുടർന്ന് ശേഷിക്കുന്ന ഉൽപ്പന്നങ്ങൾക്ക് ഒരാൾക്ക് ഒരെണ്ണം വീതം മാത്രമെന്ന പരിധിയും ചില സ്റ്റോറുകൾ ഏർപ്പെടുത്തി.
ശേഖരത്തിലെ ഉൽപ്പന്നങ്ങളുടെ വില 30 ഓസ്ട്രേലിയൻ ഡോളർ മുതൽ 160 ഡോളർ വരെയാണ്. ETB അടക്കമുള്ള ഉൽപ്പന്നങ്ങൾ ഓൺലൈനിൽ പുനർവിൽപ്പന നടത്താനായി വാങ്ങിയവരുമുണ്ട്. വിൽപ്പന ആരംഭിച്ച് മണിക്കൂറുകൾക്കുള്ളിൽ തന്നെ eBay-യിൽ നിരവധി ലിസ്റ്റിംഗുകളും പ്രത്യക്ഷപ്പെട്ടു. 1990കളുടെ അവസാനം ട്രേഡിങ് കാർഡ് ഗെയിമായി ആരംഭിച്ച Pokémon TCG പിന്നീട് ആഗോളതലത്തിൽ വലിയ ശേഖരണ വിപണിയായി വളർന്നു. ഇതുവരെ 64 ബില്യണിലധികം പോക്കിമോൻ കാർഡുകൾ അച്ചടിച്ചതായാണ് കണക്ക്.