ഡാർവിൻ: യാത്രക്കാരുടെ എണ്ണത്തിലുണ്ടായ വൻ കുറവും ഉയർന്ന പ്രവർത്തനച്ചിലവും കാരണം നോർത്തേൺ ടെറിട്ടറിയിലെ പ്രധാന വ്യോമപാതകളിൽ കടുത്ത നിയന്ത്രണങ്ങൾ പ്രഖ്യാപിച്ച് പ്രമുഖ വിമാനക്കമ്പനിയായ ക്വാന്റാസ്. പതിറ്റാണ്ടുകളായി സർവീസ് നടത്തിയിരുന്ന ആലീസ് സ്പ്രിങ്സ്-മെൽബൺ ( ഡയറക്ട് ഫ്ലൈറ്റുകൾ കമ്പനി അനിശ്ചിതകാലത്തേക്ക് റദ്ദാക്കി. ഇതോടൊപ്പം തന്ത്രപ്രധാനമായ ഡാർവിൻ-സിംഗപ്പൂർ സർവീസ് ടൂറിസ്റ്റ് സീസണുകളിലെ 'പീക്ക് പീരിയഡുകളിൽ' മാത്രമായി പരിമിതപ്പെടുത്താനും കമ്പനി തീരുമാനിച്ചു. ഇതനുസരിച്ച് വരുന്ന ഒക്ടോബർ അവസാനം മുതൽ 2027 ജൂൺ വരെ ഈ റൂട്ടിൽ വിമാനങ്ങൾ ഉണ്ടാകില്ല.
ആലീസ് സ്പ്രിങ്സിലുള്ള യാത്രക്കാർക്ക് ഇനിമുതൽ സിഡ്നി, അഡ്ലെയ്ഡ് വഴിയുള്ള സ്റ്റോപ്പ് ഓവർ കണക്ഷൻ ഫ്ലൈറ്റുകളെ ആശ്രയിച്ച് മാത്രമേ മെൽബണിലേക്ക് പോകാൻ സാധിക്കൂ എന്ന് ക്വാന്റാസ് ഡൊമസ്റ്റിക് ചീഫ് എക്സിക്യൂട്ടീവ് മാർക്കസ് സ്വെൻസൺ അറിയിച്ചു. ആറ് മാസം മുൻപ് ഏറ്റവും ആധുനികവും ഇന്ധനക്ഷമതയേറിയതുമായ എയർബസ് A220 വിമാനങ്ങൾ ഈ റൂട്ടിൽ ഇറക്കിയിട്ടും, വൺ-വേ ടിക്കറ്റ് നിരക്കുകൾ 199 ഡോളർ വരെയായി കുറച്ചിട്ടും യാത്രക്കാരെ ആകർഷിക്കാൻ കഴിഞ്ഞില്ലെന്ന് അദ്ദേഹം വ്യക്തമാക്കി. ഡയറക്ട് ഫ്ലൈറ്റ് നിർത്തലാക്കുന്നതിന് പകരമായി ആലീസ് സ്പ്രിങ്സ്-സിഡ്നി റൂട്ടിൽ ശനിയാഴ്ചകളിൽ ഒരു പുതിയ സർവീസ് കൂടി ഉൾപ്പെടുത്തി ഇത് ആഴ്ചയിൽ ഏഴ് ദിവസമാക്കി ഉയർത്തിയിട്ടുണ്ട്.
ടൂറിസം മേഖലയ്ക്ക് കനത്ത ആഘാതം; പ്രതിവർഷ ചിലവ് 1 ബില്യൺ ഡോളർ:
ദശാബ്ദങ്ങളായി നിലനിന്നിരുന്ന ഒരു പ്രധാന വ്യോമപാത ഇല്ലാതായത് നോർത്തേൺ ടെറിട്ടറിയിലെ ടൂറിസം മേഖലയ്ക്ക് വലിയ തിരിച്ചടിയാണെന്ന് വ്യോമയാന വിദഗ്ദ്ധർ ചൂണ്ടിക്കാട്ടുന്നു.
പ്രതിവർഷം 1 ബില്യൺ ഡോളർ ചിലവ്: നോർത്തേൺ ടെറിട്ടറിയിലേക്കും തിരിച്ചുമുള്ള വിമാന സർവീസുകൾക്കായി വിമാനക്കമ്പനികൾക്ക് പ്രതിവർഷം ഏകദേശം 1 ബില്യൺ ഡോളറിലധികം (ഏകദേശം 8,300 കോടി രൂപ) ചിലവ് വരുന്നുണ്ടെന്ന് ഏവിയേഷൻ അനലിസ്റ്റ് ബ്രൂസ് ഡെയ്ൽ (Bruce Dale) പറഞ്ഞു. സീറ്റുകൾ പകുതി മാത്രം നിറഞ്ഞ് സർവീസ് നടത്തുന്നത് കമ്പനികൾക്ക് ലക്ഷക്കണക്കിന് ഡോളറിന്റെ നഷ്ടമാണുണ്ടാക്കുന്നത്.
ടൂറിസത്തിന് വൻ തിരിച്ചടി: ഓസ്ട്രേലിയയിലെ പണപ്പെരുപ്പവും പശ്ചിമേഷ്യയിലെ (ഇറാൻ) സംഘർഷങ്ങളും കാരണം ഇതിനകം തന്നെ പ്രതിസന്ധിയിലായ ടൂറിസം വ്യവസായത്തിന് ഈ തീരുമാനം കനത്ത പ്രഹരമാണെന്ന് ടൂറിസം സെൻട്രൽ ഓസ്ട്രേലിയ ചീഫ് എക്സിക്യൂട്ടീവ് ഡാനിയൽ റോച്ച്ഫോർഡ് പറഞ്ഞു. ഇത് പ്രദേശത്തിന്റെ ജനജീവിതത്തെയും ബാധിക്കും.
ഡാർവിൻ-സിംഗപ്പൂർ റൂട്ടിൽ ക്വാന്റാസ് പിന്നോട്ട് പോയെങ്കിലും മറ്റ് ചില വിമാനക്കമ്പനികൾ ഈ റൂട്ടിൽ വർഷം മുഴുവൻ സർവീസ് നടത്തുന്നത് യാത്രക്കാർക്ക് ആശ്വാസമാകും. ഓഫ്-സീസണുകളിൽ ടെറിട്ടറിയിലേക്ക് വിനോദസഞ്ചാരികളെ ആകർഷിക്കാൻ സർക്കാർ തലത്തിൽ പുതിയ തന്ത്രങ്ങൾ ആവിഷ്കരിക്കേണ്ടതുണ്ടെന്നാണ് വിദഗ്ദ്ധരുടെ പക്ഷം.
