ഡാർവിൻ: വടക്കൻ ഓസ്ട്രേലിയയിലെ ഡാർവിനിൽ പുതിയ ആശുപത്രി നിർമ്മിക്കുന്നതിനായുള്ള ഫെഡറൽ ഫണ്ടിംഗ് പ്രതീക്ഷകൾ തള്ളി ഓസ്ട്രേലിയൻ പ്രധാനമന്ത്രി ആന്റണി ആൽബനീസ്. അതേസമയം, റോയൽ ഡാർവിൻ ആശുപത്രിയിലെ (RDH) മാതൃപരിചരണ വിഭാഗം നവീകരിക്കുന്നതിനായി 10 മില്യൺ ഡോളറിന്റെ പ്രത്യേക ഗ്രാന്റ് അദ്ദേഹം പ്രഖ്യാപിച്ചു. കഴിഞ്ഞ വർഷം ഡാർവിൻ പ്രൈവറ്റ് ആശുപത്രിയിലെ മാതൃപരിചരണ വിഭാഗം പൂട്ടിപ്പോയതിനെത്തുടർന്ന് റോയൽ ഡാർവിൻ ആശുപത്രിയിൽ പ്രസവാനുകൂല്യ സേവനങ്ങൾക്കായി കടുത്ത തിരക്കാണ് അനുഭവപ്പെട്ടിരുന്നത്. തിങ്കളാഴ്ച രാവിലെ ആശുപത്രി സന്ദർശിച്ച പ്രധാനമന്ത്രി, ഡിസംബറിലെ ധനകാര്യ അവലോകനത്തോടെ ഈ തുക ലഭ്യമാകുമെന്ന് സ്ഥിരീകരിച്ചു. ഡാർവിനിൽ പുതിയൊരു ആശുപത്രി അനുവദിക്കുമോ എന്ന മാധ്യമങ്ങളുടെ ചോദ്യത്തിന്, താൻ ഇവിടെ എത്തിയിരിക്കുന്നത് മാതൃപരിചരണത്തിനായുള്ള 10 മില്യൺ ഡോളർ പ്രഖ്യാപിക്കാനാണെന്നായിരുന്നു ആൽബനീസിന്റെ മറുപടി.
കഴിഞ്ഞ നവംബറിലുണ്ടായ 'ഫിന' ചുഴലിക്കാറ്റിൽ കെട്ടിടത്തിന്റെ സീലിംഗ് തകർന്നു വീണതിനെത്തുടർന്ന് റോയൽ ഡാർവിൻ ആശുപത്രിയുടെ സുരക്ഷ മുൻനിർത്തി പുതിയ ആശുപത്രി വേണമെന്ന് നോർത്തേൺ ടെറിട്ടറി ഹെൽത്ത് ഡിപ്പാർട്ട്മെന്റ് നിരന്തരം ആവശ്യപ്പെട്ടിരുന്നു. പുതിയ ഫണ്ട് ഉപയോഗിച്ച് നിലവിലുള്ള 16 ബർത്തിംഗ് സ്യൂട്ടുകൾ, പ്രൈവറ്റ് ബാത്ത്റൂമുകൾ, വാർഡുകൾ, നവജാതശിശുക്കളുടെ തീവ്രപരിചരണ വിഭാഗം (NICU), പ്രത്യേക ലക്റ്റേഷൻ റൂം എന്നിവ ആധുനിക രീതിയിൽ പുനരുദ്ധരിക്കും. നോർത്തേൺ ടെറിട്ടറി മുഖ്യമന്ത്രി ലിയ ഫിനോച്ചിയാരോ സർക്കാരിന്റെ തീരുമാനത്തെ സ്വാഗതം ചെയ്തപ്പോൾ, അടിസ്ഥാന സൗകര്യങ്ങൾ മെച്ചപ്പെടുമെങ്കിലും മേഖലയിലെ ജീവനക്കാരുടെ ക്ഷാമവും ഒബ്സ്റ്റട്രീഷ്യൻമാരുടെ കുറവും പരിഹരിക്കാൻ ഈ തുക തികയില്ലെന്ന് പ്രാദേശിക മാതൃപരിചരണ സംഘടനയായ 'അവർ ബർത്ത് അവർ വോയ്സ്' പ്രതികരിച്ചു.
