പൊതുഗതാഗതത്തിൽ, പ്രത്യേകിച്ച് സുരക്ഷ മെച്ചപ്പെടുത്തുന്നതിനായി ന്യൂ സൗത്ത് വെയിൽസ് സർക്കാർ ഇ-ബൈക്കുകൾക്കായി പുതിയ നിയമങ്ങൾ കൊണ്ടുവരുന്നു. നവംബർ 1 മുതൽ, ആഫ്റ്റർ മാർക്കറ്റ് മോട്ടോറുകളോ ബാറ്ററികളോ ഉപയോഗിച്ച് മോഡിഫൈ ചെയ്തതോ പരിവർത്തനം ചെയ്തതോ ആയ ഇ-ബൈക്കുകൾ ട്രെയിനുകളിലും മെട്രോ സർവീസുകളിലും അനുവദനീയമല്ല. ഈ ബൈക്കുകളിൽ പലതും സുരക്ഷിതമല്ലാത്ത ബാറ്ററികളാണ് ഉപയോഗിക്കുന്നതെന്ന് ഉദ്യോഗസ്ഥർ പറയുന്നു, ഇത് നിരവധി തീപിടുത്തങ്ങൾക്ക് കാരണമായിട്ടുണ്ട്. നിരോധിത ഇ-ബൈക്കുകൾ പൊതുഗതാഗതത്തിലേക്ക് കൊണ്ടുവരുന്ന ആളുകൾക്ക് $400 മുതൽ $1,100 വരെ പിഴ ചുമത്താം.
അതേസമയം സിഡ്‌നിയിൽ നിരവധി പരിവർത്തനം ചെയ്ത ഇ-ബൈക്ക് തീപിടുത്തങ്ങളെയും തുടർന്നാണ് നിരോധനം നടപ്പിലാക്കിയത്, കഴിഞ്ഞ മാസം നഗരത്തിന്റെ തെക്ക്-പടിഞ്ഞാറൻ ഭാഗത്തുള്ള ലിവർപൂളിൽ നടന്ന രണ്ട് സംഭവങ്ങളും ഇതിൽ ഉൾപ്പെടുന്നു. ഫയർ ആൻഡ് റെസ്‌ക്യൂ എൻ‌എസ്‌ഡബ്ല്യു ഈ വർഷം 77 ഇ-ബൈക്ക് സംബന്ധമായ ലിഥിയം-അയൺ ബാറ്ററി തീപിടുത്തങ്ങൾ റിപ്പോർട്ട് ചെയ്തിട്ടുണ്ട്.
"ഞങ്ങളുടെ റെയിൽ യാത്രക്കാരുടെയും ജീവനക്കാരുടെയും സുരക്ഷ ഞങ്ങൾ വളരെ ഗൗരവമായി കാണുന്നു, അതുകൊണ്ടാണ് ട്രെയിൻ ബോഗികളിൽ നിന്ന് ഏറ്റവും കൂടുതൽ അപകടസാധ്യതയുള്ള ഇ-ബൈക്കുകൾ ഞങ്ങൾ ഒഴിവാക്കുന്നത്," എൻ‌എസ്‌ഡബ്ല്യു ഗതാഗത മന്ത്രി ജോൺ ഗ്രഹാം പറഞ്ഞു. അതേസമയം അപകടകരമായ മാറ്റങ്ങളൊന്നുമില്ലാതെ സുരക്ഷിതവും നല്ല നിലവാരമുള്ളതുമായ ഇ-ബൈക്കുകൾ വാങ്ങാൻ താമസക്കാരെ പ്രോത്സാഹിപ്പിക്കാനാണ് സംസ്ഥാന സർക്കാർ ആഗ്രഹിക്കുന്നതെന്ന് എൻ‌എസ്‌ഡബ്ല്യു ഗതാഗത സെക്രട്ടറി ജോഷ് മുറെ പറഞ്ഞു.