2028ലെ യുഎസ് പ്രസിഡന്റ് തിരഞ്ഞെടുപ്പിൽ ഡെമോക്രാറ്റിക് പാർട്ടിയുടെ സ്ഥാനാർഥിയാകാനുള്ള സാധ്യതയുള്ളവരുടെ പട്ടികയിൽ ജോർജിയ സെനറ്റർ ജോൺ ഒസോഫ് മുന്നിൽ. വാഷിങ്ടണിലെ അദ്ദേഹത്തിന്റെ നേരിട്ടുള്ള ഇടപെടലുകളും ശക്തമായ പ്രസംഗശൈലിയും ഡെമോക്രാറ്റിക് പാർട്ടിയിലെ മിതവാദികളെയും ഇടതുപക്ഷത്തെയും ഒരുപോലെ ആകർഷിക്കുന്നതായാണ് വിലയിരുത്തൽ.
എന്നാൽ ഒസോഫിന്റെ പശ്ചാത്തലത്തിലെ ശ്രദ്ധേയമായൊരു വസ്തുത അദ്ദേഹത്തിന്റെ ഓസ്ട്രേലിയൻ ബന്ധമാണ്. അദ്ദേഹത്തിന്റെ അമ്മ സിഡ്നിയിൽ ജനിച്ച് വളർന്നതാണ്. ബ്രിസ്ബേനിൽ നിന്നുള്ള മുത്തശ്ശിയും മെൽബണിലെ ഫുട്സ്ക്രേയിൽ നിന്നുള്ള മുത്തച്ഛനുമാണ് ഒസോഫിന്റെ കുടുംബ പശ്ചാത്തലത്തിലുള്ളത്. ഓസ്ട്രേലിയൻ പൗരത്വം ഉണ്ടായിരുന്നെങ്കിലും പിന്നീട് അത് പുതുക്കാതെ അവസാനിപ്പിച്ചതായും ഒസോഫ് വെളിപ്പെടുത്തിയിട്ടുണ്ട്. ഓസ്ട്രേലിയയിൽ നിന്നുള്ള സ്വാധീനത്തെക്കുറിച്ച് ചോദിച്ചപ്പോൾ വെജിമൈറ്റും രാജ്യത്തിന്റെ ശാന്തമായ ജീവിതശൈലിയും പരാമർശിച്ച അദ്ദേഹം, അമേരിക്കക്കാർ ചിലപ്പോൾ കാര്യങ്ങളിൽ കൂടുതൽ ആവേശഭരിതരാകാറുണ്ടെന്നും അഭിപ്രായപ്പെട്ടു.
39 വയസ്സുള്ള ഒസോഫ് 2028ൽ തിരഞ്ഞെടുക്കപ്പെട്ടാൽ അമേരിക്കൻ ചരിത്രത്തിലെ ഏറ്റവും പ്രായം കുറഞ്ഞ പ്രസിഡന്റായിരിക്കും. 1961ൽ അധികാരമേറ്റ ജോൺ എഫ്. കെന്നഡിയേക്കാൾ രണ്ട് വയസ്സ് കുറവായിരിക്കും 2029ലെ സ്ഥാനാരോഹണ സമയത്ത് അദ്ദേഹത്തിന്. അതേസമയം 2020ൽ ജോർജിയയിൽ നിന്ന് സെനറ്റിലേക്ക് തിരഞ്ഞെടുക്കപ്പെട്ട ഒസോഫ് ഒരു തലമുറയ്ക്ക് ശേഷം ആ സീറ്റ് നേടുന്ന ആദ്യ ഡെമോക്രാറ്റായിരുന്നു. വാഷിങ്ടണിലെ അഴിമതിക്കെതിരായ ശക്തമായ നിലപാടാണ് അദ്ദേഹത്തിന്റെ രാഷ്ട്രീയ പ്രചാരണത്തിന്റെ പ്രധാന വിഷയങ്ങളിലൊന്ന്. സോഷ്യൽ മീഡിയയിൽ വ്യാപകമായി പ്രചരിക്കുന്ന അദ്ദേഹത്തിന്റെ പ്രസംഗ വീഡിയോകളും ജനപ്രീതി നേടുന്നുണ്ട്.
അതേസമയം, ഒസോഫിന്റെ വളർച്ചയെ മുൻ പ്രസിഡന്റ് ഡൊണാൾഡ് ട്രംപ് രൂക്ഷമായി വിമർശിച്ചിട്ടുണ്ട്. ജോർജിയയിൽ നടത്തിയ പ്രസംഗത്തിൽ ഒസോഫിനെതിരെ ട്രംപ് കടുത്ത പരാമർശങ്ങൾ നടത്തിയിരുന്നു.
2028ലെ പ്രസിഡന്റ് തിരഞ്ഞെടുപ്പിൽ ഒസോഫ് ഡെമോക്രാറ്റിക് സ്ഥാനാർഥിയാകുമോ എന്നത് ഇപ്പോഴും ഉറപ്പായിട്ടില്ല. എന്നാൽ അദ്ദേഹത്തിന്റെ രാഷ്ട്രീയ വളർച്ചയും ഓസ്ട്രേലിയൻ കുടുംബപശ്ചാത്തലവും ഇതിനകം തന്നെ ശ്രദ്ധ നേടിക്കഴിഞ്ഞു. അമേരിക്കൻ പ്രസിഡന്റിന് ഓസ്ട്രേലിയയുമായുള്ള ശക്തമായ ബന്ധം ഇതാദ്യമല്ല. മുൻ പ്രസിഡന്റ് ഹെർബർട്ട് ഹൂവർ പ്രസിഡന്റാകുന്നതിന് മുമ്പ് പടിഞ്ഞാറൻ ഓസ്ട്രേലിയയിലെ കൂൾഗാർഡിയിലായിരുന്നു താമസിച്ചിരുന്നത്. അവിടെ സ്വർണഖനന മേഖലയുമായി ബന്ധപ്പെട്ട് അദ്ദേഹം ജോലി ചെയ്തിരുന്നു.